ଓ୍ବାଶିଂଟନ, ୧୩।୧୧:ଆମେରିକା ନିର୍ବାଚନରେ ଡେମୋକ୍ରାଟିକ୍ ପାର୍ଟି ନେତା ଜୋ ବାଇଡେନ୍ ରାଷ୍ଟ୍ରପତି ତଥା ରିପବ୍ଲିକାନ୍ ପାର୍ଟି ନେତା ଡୋନାଲ୍ଡ ଟ୍ରମ୍ପ୍ଙ୍କ ଠାରୁ ଅଧିକ ୭୪ ଇଲେକ୍ଟୋରାଲ ଭୋଟ ପାଇ ବିଜୟୀ ହୋଇଛନ୍ତି। ତେବେ ପରାଜୟକୁ ସ୍ବୀକାର କରିବାକୁ ରାଷ୍ଟ୍ରପତି ଟ୍ରମ୍ପ୍ ନାରାଜ। ଭୋଟରେ ଜାଲିଆତି ହୋଇଥିବା କହି ସେ ବିଭିନ୍ନ ଝୁଲା ରାଜ୍ୟରେ ଫଳାଫଳକୁ ଅଦାଲତରେ ଚ୍ୟାଲେଞ୍ଜ କରିଛନ୍ତି। ବାଇଡେନ୍ ପ୍ରଶାସନକୁ ନୁହେଁ, ଦ୍ୱିତୀୟ ଟ୍ରମ୍ପ୍ ପ୍ରଶାସନକୁ କ୍ଷମତା ହସ୍ତାନ୍ତର ହେବ ବୋଲି ପରରାଷ୍ଟ୍ର ସଚିବ ମାଇକ୍ ପମ୍ପେଓ ଖବରଦାତାମାନଙ୍କୁ କହିଥିବାବେଳେ ଭୋଟ ଜାଲିଆତି ଅଭିଯୋଗର ଅନୁଧ୍ୟାନ କରିବା ଲାଗି ଆଟର୍ନି ଜେନେରାଲ ଓ୍ବିଲିୟମ ବାର୍ ନ୍ୟାୟ ବିଭାଗକୁ କହିଛନ୍ତି। ସେପଟେ ରାଷ୍ଟ୍ରପତି ଟ୍ରମ୍ପ୍ ପେଣ୍ଟାଗନ୍ ଶୀର୍ଷ ନେତୃତ୍ୱଙ୍କୁ ବରଖାସ୍ତ କରି ସେମାନଙ୍କ ସ୍ଥାନରେ ନିଜର ବିଶ୍ୱସ୍ତଙ୍କୁ ନିଯୁକ୍ତି ଦେଇଥିବାରୁ ବିଶ୍ୱର ସର୍ବପ୍ରଥମ ଗଣତନ୍ତ୍ରିକ ରାଷ୍ଟ୍ରରେ କ୍ଷମତା ବିଦ୍ରୋହ ଘଟିବା ନେଇ କଳ୍ପନାଜଳ୍ପନା ପ୍ରକାଶ ପାଇଛି।
୨୪୪ ବର୍ଷ ଆମେରିକା ଇତିହାସରେ ଏଭଳି ଘଟଣା କେବେ ଘଟି ନ ଥିଲା। ନିର୍ବାଚନ ହାରିବା ପରେ କୌଣସି ରାଷ୍ଟ୍ରପତି ହ୍ବାଇଟ୍ ହାଉସ୍ ଛାଡ଼ିବାକୁ ମନା କରି ନ ଥିଲେ। ନିର୍ବାଚନ ପ୍ରକ୍ରିୟାରେ ଜାଲିଆତି ହୋଇଥିବା ନେଇ ଟ୍ରମ୍ପ୍ କୋର୍ଟ ଯାଇଥିଲେ ହେଁ ସେ ଏଥିପାଇଁ କୌଣସି ପ୍ରମାଣ ଦାଖଲ କରିପାରି ନାହାନ୍ତି। ଆଇନଗତ ପଦକ୍ଷେପ ଦେଶରେ କେବଳ ଅରାଜକତା ସୃଷ୍ଟି କରିବା ସହ ରାଷ୍ଟ୍ରପତି ନିଯୁକ୍ତି ପ୍ରକ୍ରିୟାକୁ ବିଳମ୍ବିତ କରାଇବ। ତେବେ ଏହା ବାଇଡେନଙ୍କୁ ରାଷ୍ଟ୍ରପତି ହେବାରୁ ରୋକିପାରିବ ନାହିଁ ବୋଲି କୁହାଯାଉଛି।
ଯଦି ପରାଜିତ ରାଷ୍ଟ୍ରପତି କ୍ଷମତା ହସ୍ତାନ୍ତର ନ କରନ୍ତି ତେବେ କ’ଣ ପଦକ୍ଷେପ ନିଆଯିବ ସେନେଇ ଆମେରିକା ସମ୍ବିଧାନରେ କିଛି କୁହାଯାଇନାହିଁ। ତେବେ ଟ୍ରମ୍ପ୍ ଯଦି ତାଙ୍କ ଜିଦ୍ରେ ଅଟଳ ରହନ୍ତି, ତେବେ ନିଜ ଦଳ ଓ କଂଗ୍ରେସରୁ ତାଙ୍କ ଉପରେ ଚାପ ପଡ଼ିପାରେ। ତେଣୁ ଶେଷରେ ଟ୍ରମ୍ପ୍ ପରାଜୟ ସ୍ବୀକାର କରିନେଇପାରନ୍ତି ବୋଲି କୁହାଯାଉଥିଲେ ହେଁ ଏହା ଉପରେ କୌଣସି ଗ୍ୟାରେଣ୍ଟି ନାହିଁ। କାର୍ଯ୍ୟକାଳ ଶେଷ ହେବା ପରେ ଅନିଚ୍ଛା ସତ୍ତ୍ୱେ ସେ ହ୍ବାଇଟ ହାଉସ୍ ଛାଡ଼ିପାରନ୍ତି ବୋଲି ତାଙ୍କ ନିକଟତମ ମହଲରୁ ଜଣାପଡିଛି। ଯଦି ସେ ନ ଯାଆନ୍ତି, ତେବେ ତାଙ୍କୁ ଗିରଫ କରିବା ପାଇଁ ଏଫ୍ବିଆଇ କିମ୍ବା ନାଭି ସିଲ୍ସ ଅଥବା ଆଇନକୁ କାର୍ଯ୍ୟକାରୀ କରୁଥିବା ଅନ୍ୟ କୌଣସି ସଂସ୍ଥାର ସହାୟତା ନିଆଯାଇପାରେ ବୋଲି କୁହାଯାଉଛି।