ୱାଶିଂଟନ,୩ ।୧୦: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ତାଙ୍କ ସହଧର୍ମିଣୀ ତଥା ଆମେରିକାର ଫାଷ୍ଟ ଲେଡି ମେଲାନିଆ ଟ୍ରମ୍ପ କରୋନାରେ ଆକ୍ରାନ୍ତ ହେବା ପରେ ତାଙ୍କ ନିକଟକୁ ଏବେ ଶୀଘ୍ର ସୁସ୍ଥ ହେବାର ବାର୍ତ୍ତା ପହଞ୍ଚୁଛି । ପ୍ରଥମେ କୁହାଯାଉଥିଲା କି ଟ୍ରମ୍ପଙ୍କର କରୋନା ଚିକିତ୍ସା ହ୍ୱାଇଟ ହାଉସ୍ ଭିତରେ ହେବ । ହେଲେ ତାଙ୍କ ଡାକ୍ତରଙ୍କ ପରାମର୍ଶ କ୍ରମେ ଏବେ ଟ୍ରମ୍ପ କିଛିଦିନ ପାଇଁ ଆମେରିକା ସ୍ଥିତ ୱାଲଟର ରିଡ ହସ୍ପିଟାଲରେ ରହିବେ । ସେହିଠାରୁ ହିଁ ସେ କାର୍ଯ୍ୟ କରିବେ ବୋଲି ଏକ ଭିଡିଓ ବାର୍ତ୍ତାରେ ସୂଚନା ଦେଇଛନ୍ତି ନିଜେ ଟ୍ରମ୍ପ । ସେ କହିଛନ୍ତି ସମସ୍ତଙ୍କ ଶୁଭକାମନା ରହିଥିବାରୁ ସେ ଶୀଘ୍ର ସୁସ୍ଥ ହୋଇଯିବେ । ଫାଷ୍ଟ ଲେଡି ମଧ୍ୟ ଏବେ ଠିକ୍ ଅଛନ୍ତି । ଉଭୟଙ୍କ ନିକଟରେ ସାମାନ୍ୟ କରୋନା ଲକ୍ଷଣ ଦେଖା ଦେବାରୁ ସେମାନଙ୍କର ଟେଷ୍ଟ ପରେ ଜଣାପଡିଥିଲା ଯେ ସେମାନେ କରୋନାରେ ପୀଡ଼ିତ ଅଛନ୍ତି । ଏହାପୂର୍ବରୁ ହ୍ୱାଇଟ ହାଉସ ପକ୍ଷରୁ ଟ୍ରମ୍ପ ହସ୍ପିଟାଲରେ ରହିବା କଥା କୁହାଯାଇଥିଲା । ସୂଚନାଯୋଗ୍ୟ, ଆଗକୁ ରାଷ୍ଟ୍ରପତି ନିର୍ବାଚନ ଥିବା ବେଳେ ଟ୍ରମ୍ପଙ୍କ ଅସୁସ୍ଥତା ଏହା ଉପରେ ପ୍ରଭାବ ପକାଇପାରେ ବୋଲି ଆଲୋଚନା ହେଉଛି ।