ଓ୍ବାଶିଂଟନ,୧୯।୧ : ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ଫେସବୁକକୁ ଫେରିବାକୁ ଚାହୁଁଛନ୍ତି। ହିଂସା ସୃଷ୍ଟି ଅଭିଯୋଗରେ ଫେସବୁକ ସୋସିଆଲ ମିଡିଆ ପ୍ଲାଟଫର୍ମରୁ ଡୋନାଲ୍ଡ ଟ୍ରମ୍ପଙ୍କୁ ବାରଣ କରାଯାଇଥିଲା। ଏବେ ଉଭୟ ପକ୍ଷ ମଧ୍ୟରେ ଆଲୋଚନା ଚାଲିଛି। ଡୋନାଲ୍ଡ ଟ୍ରମ୍ପ ୨୦୨୪ ରେ ଆମେରିକାର ରାଷ୍ଟ୍ରପତି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ବୋଲି ଚର୍ଚ୍ଚା ହେଉଛି। ସେ ନିର୍ବାଚନ ପ୍ରଚାର ଆରମ୍ଭ କରିସାରିଛନ୍ତି। ଏପରି ପରିସ୍ଥିତିରେ, ଫେସବୁକକୁ ଫେରିବା ତାଙ୍କ ପାଇଁ ସହାୟକ ହୋଇପାରେ।
ଡୋନାଲ୍ଡ ଟ୍ରମ୍ପ କହିଛନ୍ତି ଯେ ମୋର ମେଟା ସହ ଆଲୋଚନା ଜାରି ରହିଛି। ଯଦି ମେଟା ମତେ ଫେରାଇ ନିଏ, ତେବେ ଏହା ମୋ ପାଇଁ ବହୁତ ଲାଭଦାୟକ ହେବ। ଉଲ୍ଲେଖନୀୟ କଥା ହେଉଛି, ଚଳିତ ମାସରେ ସୋସିଆଲ ମିଡିଆ ପ୍ଲାଟଫର୍ମରୁ ଡୋନାଲ୍ଡ ଟ୍ରମ୍ପଙ୍କ ପ୍ରତ୍ୟାହାର ସମ୍ପର୍କରେ ମେଟା ନିଷ୍ପତ୍ତି ନେଇପାରେ।
୬ ଜାନୁଆରୀ ୨୦୨୧ ରେ ଆମେରିକା ସଂସଦ ଉପରେ ହୋଇଥିବା ଆକ୍ରମଣ ପରେ ଡୋନାଲ୍ଡ ଟ୍ରମ୍ପଙ୍କୁ ଫେସବୁକ ଦ୍ୱାରା ବାରଣ କରାଯାଇଥିଲା। ବାସ୍ତବରେ, ଡୋନାଲ୍ଡ ଟ୍ରମ୍ପ ତାଙ୍କ ପୋଷ୍ଟରେ ଦାବି କରିଥିଲେ ଯେ ୨୦୨୦ ରାଷ୍ଟ୍ରପତି ନିର୍ବାଚନ ସମୟରେ ବ୍ୟାପକ ଭୋଟ ହେରଫେର କାରବାର ହୋଇଥିଲା। ଏହା ପରେ ହିଁ ହିଂସା ସୃଷ୍ଟି କରିବା ଅଭିଯୋଗରେ ଫେସବୁକ ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟକୁ ବାରଣ କରିଥିଲା। ଟୁଇଟର ମଧ୍ୟ ଡୋନାଲ୍ଡ ଟ୍ରମ୍ପଙ୍କୁ ବାରଣ କରିଛି। ତେବେ ଏଲନ ମସ୍କ ଟୁଇଟର ଅଧିଗ୍ରହଣ କରିବା ପରେ ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟ ପୁଣି ଆରମ୍ଭ ହୋଇଥିଲା। ତେବେ ଟ୍ରମ୍ପ ଏପର୍ଯ୍ୟନ୍ତ କିଛି ଟୁଇଟ କରିନାହାଁନ୍ତି। ସେ ଟୁଇଟର ବଦଳରେ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ ସୋସିଆଲରେ ପୋଷ୍ଟ କରୁଛନ୍ତି।
