ଓ୍ବାଶିଂଟନ, ୨୩।୮: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଏବେ ପର୍ନ ଷ୍ଟାର ଷ୍ଟୋର୍ମି ଡାନିଏଲ୍ଙ୍କୁ ୩୩ ଲକ୍ଷ ଟଙ୍କା ଦେବେ। ଏନେଇ ଆମେରିକାର ଏକ କୋର୍ଟ ନିର୍ଦ୍ଦେଶ ଦେଇଛନ୍ତି। ଟ୍ରମ୍ପ୍ଙ୍କ ସହିତ ସମ୍ପର୍କ ଥିଲା ବୋଲି ଷ୍ଟୋର୍ମି ଦାବି କରିଛନ୍ତି। ତେବେ ଏହାକୁ ଟ୍ରମ୍ପ୍ ଖଣ୍ଡନ କରିଛନ୍ତି। ୪୧ ବର୍ଷ ବୟସ୍କା ଷ୍ଟୋର୍ମି ଟମ୍ପ୍ଙ୍କ ବିରୋଧରେ ମାମଲା ଦାଏର କରିଥିଲେ। ପରବର୍ତ୍ତୀ ସମୟରେ ଏହା ରଦ୍ଦ ହୋଇଯାଇଥିଲା। ତେଣୁ ଷ୍ଟୋର୍ମିଙ୍କର ଖର୍ଚ୍ଚ ହୋଇଥିବା ଟଙ୍କାର ଭରଣା ଟ୍ରମ୍ପ୍ କରିବେ ବୋଲି କାଲିଫର୍ନିଆର ଏକ କୋର୍ଟ ନିର୍ଦ୍ଦେଶ ଦେଇଛନ୍ତି। କୋର୍ଟ ନିର୍ଦ୍ଦେଶ ପରେ ଷ୍ଟୋର୍ମି ଟୁଇଟ୍ କରି ପୁଣି ଏକ ବିଜୟ ବୋଲି ସୂଚନା ଦେଇଛନ୍ତି। ମାମଲା ଦାଏର କରିବା ପରେ ଷ୍ଟୋର୍ମି ଏକ ପୁସ୍ତକ ମଧ୍ୟ ଲେଖିଥିଲେ। ସେ ଏଥିରେ ଟ୍ରମ୍ପ୍ ଙ୍କ ସହିତ ସମ୍ପର୍କ ଥିବା ବିଷୟରେ ଉଲ୍ଲେଖ କରିଥିଲେ। ୨୦୦୬ରେ ଟ୍ରମ୍ପ୍ଙ୍କ ସହିତ ଷ୍ଟୋର୍ମିଙ୍କର ସମ୍ପର୍କ ଥିବା ପୁସ୍ତକରେ ଦର୍ଶାଯାଇଛି। ଏଥିପାଇଁ ଚୁପ୍ ରହିବା ଲାଗି ଷ୍ଟୋର୍ମିଙ୍କୁ ଟ୍ରମ୍ପ୍ଙ୍କ ଆଇନଜୀବୀଙ୍କ ପକ୍ଷରୁ ୯୭ ଲକ୍ଷ ଟଙ୍କା ଦିଆଯାଇଥିବା ପୁସ୍ତକରେ ପ୍ରକାଶ ପାଇଛି। ଏହି ପୁସ୍ତକ ବେଶ୍ ଚର୍ଚ୍ଚାରେ ରହିଛି।
