ଓ୍ବାଶିଂଟନ,୨୬।୧ : ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ଫେସବୁକ ଏବଂ ଇନଷ୍ଟାଗ୍ରାମରେ ନିଜର ପ୍ରତିକ୍ରିୟା ଦେଉଥିବାର ନଜର ଆସିବେ। ଆସନ୍ତା ସପ୍ତାହରେ ଟ୍ରମ୍ପଙ୍କ ଫେସବୁକ ଏବଂ ଇନଷ୍ଟାଗ୍ରାମ ଆକାଉଣ୍ଟ ପୁନଃସ୍ଥାପିତ ହେବ ବୋଲି ମେଟା ଘୋଷଣା କରିଛି।
କ୍ୟାପିଟୋଲ ହିଲ ହତଂସା ପରେ ମେଟା ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟକୁ ବ୍ଲକ୍ କରିଥିଲେ। ମିଡିଆ ରିପୋର୍ଟ ଅନୁଯାୟୀ ସୋସିଆଲ ମିଡିଆ କମ୍ପାନୀ ଏକ ବ୍ଲଗ ପୋଷ୍ଟରେ କହିଛି ଯେ ବିବାଦୀୟ ପୋଷ୍ଟକୁ ଏଡାଇବା ପାଇଁ ଏହା ନୂଆ ନିୟମ କରିଛି। ରାଜନୈତିକ ପ୍ରସାର ତଥା ପାଣ୍ଠି ସଂଗ୍ରହ ପାଇଁ ଫେସବୁକ ଏବଂ ଇନଷ୍ଟାଗ୍ରାମ ହେଉଛି ପ୍ରମୁଖ ଉପକରଣ ବୋଲି ଟ୍ରମ୍ପ କହିଛନ୍ତି।
ଏହାପୂର୍ବରୁ ଖବର ଆସିଥିଲା ଯେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ଫେସବୁକକୁ ଫେରିବାକୁ ଚାହୁଁଛନ୍ତି। ଡୋନାଲ୍ଡ ଟ୍ରମ୍ପ କହିଥିଲେ ଯେ ଆମେ ମେଟା ସହ ଆଲୋଚନା କରୁଛୁ। ଉଲ୍ଲେଖନୀୟ କଥା ହେଉଛି, ଏହି ମାସରେ ସୋସିଆଲ ମିଡିଆ ପ୍ଲାଟଫର୍ମରୁ ଡୋନାଲ୍ଡ ଟ୍ରମ୍ପଙ୍କ ପ୍ରତ୍ୟାହାର ସମ୍ପର୍କରେ ମେଟା ନିଷ୍ପତ୍ତି ନେଇପାରେ।
