ଭୁବନେଶ୍ୱର,୨୩।୧୦: ଇତିହାସ ସାଙ୍ଗକୁ ପୁରାଣରେ ବର୍ଣ୍ଣତ ରହିଛି ଯେ ଆୟୁର୍ବେଦ ଦେବତା ଧନ୍ବନ୍ତରୀଙ୍କ ଜନ୍ମଦିବସକୁ ଧନ୍ତେରସ ଭାବେ ଜୈନ ଧର୍ମାବଲମ୍ବୀମାନେ ପାଳନ କରୁଥିବା ବେଳେ ସମୟକ୍ରମେ ଧୀରେ ଧୀରେ ଭାରତବର୍ଷରେ ଏହାର ପ୍ରଭାବ ଦେଖିବାକୁ ମିଳିଥିଲା। ଏପରିକି ଧନ୍ତେରସରେ ଧନପ୍ରାପ୍ତି ଓ ପାରିବାରିକ ଶାନ୍ତି (ଗୃହକୁ ଲକ୍ଷ୍ମୀ ପ୍ରବେଶ କରିଥାନ୍ତି) ପାଇଁ ନିଜ ନିଜର ସକ୍ଷମ ଅନୁସାରେ ଲୋକେ ସୁନା କିଣିଥାନ୍ତି। ଏପରିକି ସୁନା ନିଷେଧ ବର୍ଗର ଲୋକମାନେ ରୁପା, ହୀରା ଓ ଅନ୍ୟ ମୂଲ୍ୟବାନ୍ ଅଳଙ୍କାର ସାଙ୍ଗକୁ ପିତଳ ଓ ତମ୍ବାର ବାସନକୁସନ ମଧ୍ୟ କିଣିଥାନ୍ତି ବୋଲି ଶାସ୍ତ୍ର ବିଶାରଦମାନେ ମତବ୍ୟକ୍ତ କରିଛନ୍ତି। ଅପରପକ୍ଷରେ ଧନପ୍ରାପ୍ତି ଓ ରୋଗ ଦାଉରୁ ବର୍ଷ ତମାମ ମୁକ୍ତି ପାଇବା ଆଶାରେ ଲୋକେ ଉଭୟ ଲୋକକଥା ଓ ପୁରୁଣା ଗାଥାକୁ ବିଶ୍ୱାସକୁ ନେଇ ଧନ୍ତେରସକୁ ଏକ ପର୍ବ ଭାବେ ପାଳନ କରୁଛନ୍ତି। କାରଣ ଜୀବନର ସବୁଠାରୁ ବଡ ଧନ ଉତ୍ତମ ସ୍ବାସ୍ଥ୍ୟ ନୀରୋଗ ଜୀବନ ହୋଇଥାଏ ବୋଲି କୁହାଯାଏ। ଉଲ୍ଲେଖଯୋଗ୍ୟ , ବ୍ରହ୍ମଲୋକରେ ଚିକିତ୍ସକ ଭାବେ ଜଣାଶୁଣା ଆୟୁର୍ବେଦ ଦେବତା ଧନ୍ବନ୍ତରୀଙ୍କ ପୂଜା କଲେ ଉଭୟ ଧନପ୍ରାପ୍ତି ଓ ନୀରୋଗ (ଉତ୍ତମ ସ୍ବାସ୍ଥ୍ୟ) ରହି ସୁଖରେ ଜୀବନଯାପନର ସୌଭାଗ୍ୟ ମିଳିଥାଏ।