ପାଟନା,୬।୫: ବିହାର ପଛୁଆ ରାଜ୍ୟ ହେବା ପାଇଁ ନୀତୀଶ କୁମାରଙ୍କ ୧୫ବର୍ଷର ଶାସନ ଦାୟୀ ବୋଲି ଗୁରୁବାର ନିର୍ବାଚନ ରଣନୀତିକାର ପ୍ରଶାନ୍ତ କିଶୋର ସମାଲୋଚନା କରିଥିଲେ। ନୂଆ ଚିନ୍ତାଧାରା ଓ ଉଦ୍ୟମରେ ରାଜ୍ୟରେ ବିକାଶ ଆଣିବା ଲାଗି ସେ ଏକ ମିଶନ ଘୋଷଣା କରିଥିଲେ। ତେବେ ପ୍ରଶାନ୍ତଙ୍କ ମନ୍ତବ୍ୟକୁ ମୁଖ୍ୟମନ୍ତ୍ରୀ ନୀତୀଶ କୁମାର ଅଗ୍ରାହ୍ୟ କରିଛନ୍ତି। କ’ଣ ସତ ତାହା ହେଉଛି ଗୁରୁତ୍ୱପୂର୍ଣ୍ଣ, ପ୍ରଶାନ୍ତ କିଶୋରଙ୍କ ମନ୍ତବ୍ୟ ନୁହେଁ ବୋଲି ସେ ଗଣମାଧ୍ୟମକୁ କହିଛନ୍ତି। ବିହାର ପାଇଁ ତାଙ୍କ ସରକାର କ’ଣ ଭଲ କାମ କରିଛି କି ନାହିଁ ତାହା ଜନସାଧାରଣ ଭଲ ଭାବେ ଜାଣନ୍ତି। ତେଣୁ ରାଜ୍ୟବାସୀ ଏହାର ଜବାବ ଦେବା ଲାଗି ସେ ଅନୁରୋଧ କରିଛନ୍ତି। ସୂଚନାଯୋଗ୍ୟ, ଲାଲୁ ଯାଦବ ଏବଂ ନୀତୀଶ କୁମାରଙ୍କ ୩୦ବର୍ଷର ଶାସନରେ ବିହାର ଦେଶର ସବୁଠୁ ପଛୁଆ ଓ ଗରିବ ରାଜ୍ୟରେ ପରିଣତ ହୋଇଥିବା ନିର୍ବାଚନ ରଣନୀତିକାର ଅଭିଯୋଗ କରିଥିଲେ। ସୂଚନା ମୁତାବକ, ୨୦୧୫ରେ ପ୍ରଶାନ୍ତ କିଶୋର ଓ ତାଙ୍କ ସଂଗଠନ ଆଇ-ପିଏସି ବିହାର ବିଧାନସଭା ନିର୍ବାଚନରେ ନୀତୀଶଙ୍କୁ ମୁଖ୍ୟମନ୍ତ୍ରୀ କରାଇବା ଲାଗି କାର୍ଯ୍ୟ କରିଥିଲେ। ମୁଖ୍ୟମନ୍ତ୍ରୀ ହେବା ପରେ ନୀତୀଶ ନିର୍ବାଚନ ପ୍ରତିଶ୍ରୁତି କାର୍ଯ୍ୟକାରୀ କରିବା ଲାଗି ଯୋଜନା ଓ କାର୍ଯ୍ୟକ୍ରମ ରୂପାୟନ ନିମନ୍ତେ ପ୍ରଶାନ୍ତଙ୍କୁ ତାଙ୍କ ଉପଦେଷ୍ଟା ନିଯୁକ୍ତ କରିଥିଲେ।