ଭୁବନେଶ୍ୱର, ୯।୭ (ଅଭୟ ଦାଶ): ଟାଟା ଷ୍ଟିଲ୍ ଫାଉଣ୍ଡେଶନ (ଟିଏସ୍ଏଫ୍) ପକ୍ଷରୁ ସକ୍ଷମ ଓ ଆଇଆଇଟି ଦିଲ୍ଲୀର ଆସିଷ୍ଟେକ୍ ଲାବ୍ର ଅଭିଯାନ ଜ୍ୟୋତିର୍ଗମୟ ସହ ନିକଟରେ ଏକ ବୁଝାମଣା ପତ୍ର(ଏମ୍ଓୟୁ) ସ୍ବାକ୍ଷର କରାଯାଇଛି। ବିଶେଷକରି ଆସିଷ୍ଟିଭ୍ ଟେକ୍ନୋଲୋଜି ଜରିଆରେ ଦୃଷ୍ଟିହୀନମାନଙ୍କୁ ଚିହ୍ନଟ କରିବା ସହିତ ଆବଶ୍ୟକ ପ୍ରଶିକ୍ଷଣ ପ୍ରଦାନକୁ ଗୁରୁତ୍ୱ ଦିଆଯାଇଛି। ଏପରିକି ଦୃଷ୍ଟିହୀନମାନଙ୍କୁ ପଢ଼ାପଢ଼ି ଓ ଲେଖାଲେଖିରେ ସ୍ବାଧୀନ କରିବା ସହ ବିଭିନ୍ନ ପ୍ରକାର ଅନ୍ଲାଇନ କାର୍ଯ୍ୟକଳାପ ଯଥା ବ୍ୟାଙ୍କଖାତା ପରିଚାଳନା, ବ୍ୟାଙ୍କ କାରବାର, ରେଳ ଟିକେଟ ସଂରକ୍ଷଣ, ଅନ୍ଲାଇନ ଶପିଙ୍ଗ୍ କିମ୍ବା କୌଣସି ସ୍ଥାନରେ ପହଞ୍ଚତ୍ବା ଲାଗି ଗୁଗଲ୍ ମ୍ୟାପ୍ ବ୍ୟବହାର କରିବାରେ ସକ୍ଷମ କରିବା ଲାଗି ଆସିଷ୍ଟିଭ୍ ପ୍ରଯୁକ୍ତି ଆଧାରିତ ସମାଧାନର ଗୁରୁତ୍ୱକୁ ସ୍ବୀକୃତି ପ୍ରଦାନ ଲାଗି ଜ୍ୟୋତିର୍ଗମୟ କାର୍ଯ୍ୟକ୍ରମ ପ୍ରସ୍ତୁତ କରାଯାଇଛି। ଏହି ପରିପ୍ରେକ୍ଷୀରେ ସକ୍ଷମର ପ୍ରତିଷ୍ଠାତା ଡ. ଦୀପେନ୍ଦ୍ର ମନୋଚା ଓ ସକ୍ଷମର ଷ୍ଟ୍ରାଟେଜିକ୍ ଆଡଭାଇଜର ରାଜୀବ ରାତୁରୀ, ଟିଏସ୍ଏଫ୍ର ସିଇଓ ସୌରଭ ରାୟ ଓ ଟିଏସ୍ଏଫ୍ର ଦକ୍ଷତା ବିକାଶ ମୁଖ୍ୟ କ୍ୟାପ୍ଟେନ୍ ଅମିତାଭ ପ୍ରମୁଖ ଉକ୍ତ ଏମ୍ଓୟୁରେ ସ୍ବାକ୍ଷର କରିଛନ୍ତି।
ଏ ସମ୍ପର୍କରେ ଟାଟା ଷ୍ଟିଲ୍ ଫାଉଣ୍ଡେଶନର ସିଇଓ ସୌରଭ ରାୟ କହିଛନ୍ତି, ଦିବ୍ୟାଙ୍ଗକୁ ସମ୍ମାନ ଦେବା ଓ ସକ୍ଷମ କରିବାର ସନ୍ଧାନରେ ସବଲ୍ ପକ୍ଷରୁ ଏକ ପ୍ଲାଟ୍ଫର୍ମ ଗଠନ କରାଯାଇଛି, ଯାହା ନାଗରିକ ସମାଜ, କମ୍ପାନୀ ଓ ସାର୍ବଜନୀନ ବ୍ୟବସ୍ଥାକୁ ଏକଜୁଟ କରିଛି। ଏହା ପ୍ରତି ବର୍ଷ ୧୦,୦୦୦ରୁ ଅଧିକ ଲୋକଙ୍କ ସହ କାର୍ଯ୍ୟ କରୁଛି,ଯେଉଁଥିରେ ସମ୍ବେଦନଶୀଳ ଜୀବନଯାପନ କରୁଥିବା ଦିବ୍ୟାଙ୍ଗଙ୍କ ଉପରେ ଗୁରୁତ୍ୱ ଦିଆଯାଉଛି। ଆମର ବିଶ୍ୱାସ ରହିଛି, ସକ୍ଷମ ଓ ଆଇଆଇଟି ଦିଲ୍ଲୀ ଭଳି ସହଯୋଗୀଙ୍କ ସହ ଜ୍ୟୋତିର୍ଗମୟ ଭଳି କାର୍ଯ୍ୟକ୍ରମର ସବଲ୍ ସହିତ ସମାନ ମୂଲ୍ୟବୋଧ ରହିଛି ଏବଂ ଏହି ସହଯୋଗିତାର ସମ୍ଭାବନାକୁ ନେଇ ଆମେ ବେଶ୍ ଉତ୍ସାହିତ ରହିଛୁ। ଉକ୍ତ ପ୍ରକଳ୍ପର ଲକ୍ଷ୍ୟ ହେଉଛି, ଦୃଷ୍ଟିହୀନ ଓ ପଢ଼ି ପାରୁ ନ ଥିବା ଲୋକଙ୍କ ମଧ୍ୟରେ ଆସିଷ୍ଟିଭ୍ ଟେକ୍ନୋଲୋଜି ଓ ତା’ର ବ୍ୟବହାରକୁ ନେଇ ସଚେତନତା ସୃଷ୍ଟି କରିବା ଏବଂ ସେମାନେ ସମାଜରେ ତାହାର ସଚେତନତା ବଢ଼ାଇବେ ଏବଂ ବ୍ୟବହାରକାରୀଙ୍କ ନେଟ୍ୱର୍କ ସମ୍ପ୍ରସାରଣ କରିବେ। ଆସନ୍ତା ୨ ବର୍ଷରେ ୧୨୫୮ ଜଣ ଭିନ୍ନକ୍ଷମଙ୍କୁ ସାହାଯ୍ୟ କରିବାକୁ ପ୍ରକଳ୍ପ ଜରିଆରେ ଲକ୍ଷ୍ୟ ରଖାଯାଇଛି।