ନୂଆଦିଲ୍ଲୀ,୩।୩:ଟାଟା ଷ୍ଟିଲ୍ ମାଇନିଂ ଲିମିଟେଡ୍ (ଟିଏସ୍ଏମ୍ଏଲ୍) ଏବଂ ଗେଲ୍ (ଇଣ୍ଡିଆ) ମଧ୍ୟରେ ଏକ ଦ୍ୱିପାକ୍ଷିକ ବୁଝାମଣାପତ୍ର (ଏମ୍ଓୟୁ) ନିକଟରେ ସ୍ବାକ୍ଷରିତ ହୋଇଯାଇଛି। ବିଶେଷକରି ଟିଏସ୍ଏମ୍ଏଲ୍ ପରିଚାଳନା କ୍ଷେତ୍ରରେ କାର୍ବନ ଫୁଟ୍ପ୍ରିଣ୍ଟ ହ୍ରାସ କରିବାର ପ୍ରତିବଦ୍ଧତାକୁ ଦୋହରାଇ କଟକର ଆଠଗଡ଼ ସ୍ଥିତ ଫେରୋ ଆଲଏଜ୍ କାରଖାନାକୁ ନାଚୁରାଲ୍ ଗ୍ୟାସ୍ ଯୋଗାଣ କରିବା ଲାଗି ଏହି ଏମ୍ଓୟୁ କରାଯାଇଥିବା ଜଣାପଡ଼ିଛି। ଏ ସମ୍ପର୍କରେ ଟାଟା ଷ୍ଟିଲ୍ ମାଇନିଂର ପରିଚାଳନା ନିର୍ଦ୍ଦେଶକ ପଙ୍କଜ ସତିଜା କହିଛନ୍ତି,ଏକ ଦାୟିତ୍ୱବାନ୍ ଖଣି କମ୍ପାନୀ ଭାବେ ସ୍ବଚ୍ଛ ଇନ୍ଧନ ବ୍ୟବହାରକରି ପରିବେଶର ସୁରକ୍ଷା ପାଇଁ ଆମେ ପ୍ରତିବଦ୍ଧ ରହିଛୁ। ଏପରିକି ଗେଲ୍ (ଇଣ୍ଡିଆ) ସହ ଉକ୍ତ ବୁଝାମଣା ଆମକୁ ଏ ଦିଗରେ ଆହୁରି ସହାୟକ ହୋଇପାରିବ। ବିଶେଷକରି ଆଠଗଡ଼ କାରଖାନାରେ ଫର୍ନେସ୍ ଅଏଲ୍ ବଦଳରେ ସ୍ବଚ୍ଛ ଇନ୍ଧନ ବ୍ୟବହାର କରିବା ଲାଗି ପାଇପ୍ଲାଇନ ଜରିଆରେ ନାଚୁରାଲ୍ ଗ୍ୟାସ୍ ଯୋଗାଇବା ପାଇଁ ପୂର୍ବରୁ ଟାଟା ଷ୍ଟିଲ୍ ମାଇନିଂ ପକ୍ଷରୁ ଗେଲ୍ ସହ ଯୋଗାଯୋଗ କରାଯାଇଥିଲା। ଉକ୍ତ ପଦକ୍ଷେପ ଫଳରେ କାର୍ବନ୍ ଫୁଟ୍ପ୍ରିଣ୍ଟକୁ ହ୍ରାସ କରିବା ଏବଂ ଏକ ଚିରସ୍ଥାୟୀ ଭବିଷ୍ୟତ ଦିଗରେ କମ୍ପାନୀର ଉଦ୍ୟମକୁ ଆହୁରି ସୁଦୃଢ଼ କରିବ। ସେହିଭଳି ନାଚୁରାଲ୍ ଗ୍ୟାସ୍ ତୁଳନାରେ ଫର୍ନେସ୍ ଅଏଲ୍ ଅଧିକ ସିଓ୨, ନାଇଟ୍ରୋଜେନ୍ ଅକ୍ସାଇଡ୍ ଓ ସଲ୍ଫର ଅକ୍ସାଇଡ୍ ନିର୍ଗମନ କରିଥାଏ। ନାଚୁରାଲ୍ ଗ୍ୟାସ୍ ୨୭% କମ୍ ସିଓ୨ ନିର୍ଗମନ କରିଥାଏ ଏବଂ ଏହାର ପ୍ରଦୂଷଣ ସ୍ତର ମଧ୍ୟ କମ୍। ଏହି ପ୍ରକଳ୍ପ ଦ୍ୱାରା ବର୍ଷକୁ ୯୬୮ ଟନ୍ ସିଓ୨ ଗ୍ରୀନ୍ ହାଉସ୍ ଗ୍ୟାସ୍ ନିର୍ଗମନକୁ ହ୍ରାସ କରିବ।