ଟ୍ରେନ୍ରେ ଯାତ୍ରା କରିବା ସମୟରେ ଟିଟିଇଙ୍କୁ ଟିକେଟ ଯାଞ୍ଚ କରୁଥିବା ଦେଖିବାକୁ ମିଳେ। ଟିକେଟ ନ ଥିଲେ ଯାତ୍ରୀଙ୍କଠାରୁ ସେ ଜରିମାନା ମଧ୍ୟ ଆଦାୟ କରନ୍ତି। ଆଜିକାଲି ସେହିଭଳି ଜଣେ ଟିଟିଇ ଏବେ ଚର୍ଚ୍ଚାରେ। ସେ ହେଲେ ଶଶି କୁମାର। ସେ ବର୍ଷକରେ ୧୬ ହଜାର ରେଳଯାତ୍ରୀଙ୍କଠାରୁ ୧ କୋଟି ୧୧ ଲକ୍ଷ ୫୧ ହଜାର ଟଙ୍କାର ଜରିମାନା ଆଦାୟ କରି ରେକର୍ଡ କରିଛନ୍ତି। ଏହି ରେକର୍ଡ ଲାଗି ତାଙ୍କୁ ସମ୍ମାନୀତ କରାଯାଇଛି।
ଶଶି କୁମାର ବିହାର ରାଜଧାନୀ ପାଟଣାରୁ ବକ୍ସର ଯାଏ ଡ୍ୟୁଟି କରିଥାନ୍ତି। ପ୍ରତିଦିନ ସେ ଟିକେଟ ଯାଞ୍ଚ କରିବାକୁ ବାହାରିଯାନ୍ତି। ଦୈନିକ ୩୦ରୁ ଅଧିକ ଟ୍ରେନ୍ରେ ବିନା ଟିକେଟରେ ଯାତ୍ରା କରୁଥିବା ଯାତ୍ରୀମାନଙ୍କୁ ଧରି ତାଙ୍କଠାରୁ ଜରିମାନା ଆଦାୟ କରିଥାନ୍ତି। ଏହିଭଳି ସେ ୨୦୨୧ରୁ ୨୦୨୨ ମଧ୍ୟରେ ୧୬ ହଜାର ୪୪୩ଜଣ ଯାତ୍ରୀଙ୍କଠାରୁ ଜରିମାନା ଆଦାୟ କରିଥିଲେ। ଏହାଫଳରେ ପୂର୍ବ କେନ୍ଦ୍ରୀୟ ରେଳବାଇର ପାଞ୍ଚଟି ବିଭାଗରେ ସେ ଏକମାତ୍ର ଟିଟିଇ ଭାବେ ସର୍ବାଧିକ ଜରିମାନା ଆଦାୟର ରେକର୍ଡ କରିଛନ୍ତି। ଏହି କାର୍ଯ୍ୟ ଲାଗି ତାଙ୍କୁ ସମ୍ମାନିତ କରାଯାଇଛି।
ନିଜର ଉପଲବ୍ଧି ବିଷୟରେ ଶଶି କୁହନ୍ତି, ସେ କେବଳ ଟିକେଟ ଯାଞ୍ଚ କରନ୍ତି ନାହିଁ, ଟ୍ରେନ୍ରେ ହେଉଥିବା ଅନ୍ୟ ଅପରାଧ ଉପରେ ନଜର ରଖିଥାନ୍ତି। ଗତ ବର୍ଷ ସେ ଜଣେ ୬ ବର୍ଷର ଶିଶୁକନ୍ୟାଙ୍କୁ ବିକ୍ରି ହେବାରୁ ରକ୍ଷା କରିଥିଲେ। ଘରୁ ଫେରାର ହେବାକୁ ଚାହୁଁଥିବା କିଛି ଲୋକଙ୍କୁ ବୁଝାଇ ଘରକୁ ପଠାଇଥିଲେ। ଏବେ ତାଙ୍କୁ ‘ସର୍ବଶ୍ରେଷ୍ଠ ଟିଟିଇ’ ବୋଲି କୁହାଯାଉଥିବାରୁ ସେ ବହୁତ ଖୁସି ଥିବା କହିଛନ୍ତି।