ଇସଲାମାବାଦ,୧୪।୧ : ପଡୋଶୀ ଦେଶ ପାକିସ୍ତାନ ଗୁରୁତର ଆର୍ଥିକ ସଙ୍କଟ ଦେଇ ଗତି କରୁଛି। ଅନ୍ୟପକ୍ଷରେ ପାକିସ୍ତାନରେ ଆତଙ୍କବାଦୀ ଘଟଣା ମଧ୍ୟ ବନ୍ଦ ହେବାର ନାମ ନେଉନାହିଁ। ଆତଙ୍କବାଦୀ ସଂଗଠନ ତେହେରିକ-ଇ-ତାଲିବାନ ପାକିସ୍ତାନ(ଟିଟିପି) ଦ୍ୱାରା ହୋଇଥିବା ସଦ୍ୟତମ ଆକ୍ରମଣରେ ତିନି ଜଣ ପୋଲିସଙ୍କର ମୃତ୍ୟୁ ଘଟିଛି।
ଟିଟିପି ପାକିସ୍ତାନର ପେଶୱାରର ଏକ ପୋଲିସ ଷ୍ଟେଶନ ଉପରେ ଆକ୍ରମଣ କରିଛି। ଏଥିରେ ଜଣେ ବରିଷ୍ଠ ପୋଲିସ କର୍ମଚାରୀଙ୍କ ସମେତ ମୋଟ ୩ ଜଣ ପୋଲିସଙ୍କର ମୃତ୍ୟୁ ଘଟିଛି।
ପେଶୱାରର ଏସଏସପି କାସିଫ ଅବ୍ବାସି ସୂଚନା ଦେଇଛନ୍ତି ଯେ ୬ରୁ ୭ ଜଣ ସଶସ୍ତ୍ର ଆତଙ୍କବାଦୀ ହ୍ୟାଣ୍ଡ ଗ୍ରେନେଡ,ସ୍ବୟଂଚାଳିତ ଅସ୍ତ୍ରଶସ୍ତ୍ର ଏବଂ ସ୍ନାଇପର ଅସ୍ତ୍ର ସାହାଯ୍ୟରେ ପେଶୱାରର ସରବନ୍ଦ ପୋଲିସ ଷ୍ଟେଶନ ଉପରେ ଏକ ବଡ଼ ଆକ୍ରମଣ କରିଛନ୍ତି। ଏହି ଆକ୍ରମଣରେ କ୍ରସ ଫାୟାରିଙ୍ଗରେ ୩ ଜଣ ପୋଲିସ କର୍ମଚାରୀଙ୍କ ମୃତ୍ୟୁ ଘଟିଛି। ଆତଙ୍କବାଦୀ ସଂଗଠନ ତେହେରିକ-ଇ-ତାଲିବାନ ପାକିସ୍ତାନ ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରିଛି। ଏହି ଆକ୍ରମଣରେ ନିହତ ହୋଇଥିବା ପୋଲିସ କର୍ମଚାରୀଙ୍କ ମଧ୍ୟରେ ଡେପୁଟି ସୁପରିଣ୍ଟେଣ୍ଡେଣ୍ଟ ସର୍ଦ୍ଦାର ହୁସେନ ଏବଂ ଦୁଇ ଜଣ କନଷ୍ଟେବଳ ଅଛନ୍ତି।
ଖାଇବର ପାସ୍ତୁନଖ୍ବା ମୁଖ୍ୟମନ୍ତ୍ରୀ ମହମୁଦ ଖାନ ଏହି ଆକ୍ରମଣକୁ ନିନ୍ଦା କରିବା ସହ ଆତଙ୍କବାଦ ମୁକାବିଲାରେ ପୋଲିସର ବଳିଦାନ ବୃଥା ହେବ ନାହିଁ ବୋଲି କହିଛନ୍ତି। ଆତଙ୍କବାଦୀଙ୍କ ସନ୍ଧାନରେ ଏହି ଅଞ୍ଚଳରେ ସର୍ଚ୍ଚ ଅପରେଶନ ଚାଲିଛି। ଅନ୍ୟପକ୍ଷରେ ଏହି ଆକ୍ରମଣରେ ୪ଜଣ ପୋଲିସଙ୍କ ମୃତ୍ୟୁ ଘଟିଥିବା ଏବଂ ୩ ଜଣ ପୋଲିସ ଆହତ ହୋଇଥିବା ଟିଟିପି ଦାବି କରିଛି। ଏଥିସହ ଦୁଇଟି କାଲାଶନିକୋଭ, ମାଗାଜିନ ଏବଂ ୪୭ ହଜାର ପାକିସ୍ତାନୀ ଟଙ୍କା ଲୁଟି ନେଇଥିବା ଟିଟିପି ପକ୍ଷରୁ କୁହାଯାଇଛି। ଡେରା ଗାଜି ଖାନ ଜିଲାର ତୁନସା ସରିଫ ତହସିଲରେ ପୋଲିସ ଚେକପୋଷ୍ଟ ଉପରେ ହୋଇଥିବା ଆକ୍ରମଣ ପାଇଁ ଟିଟିପି ମଧ୍ୟ ଦାୟୀ କରିଛି।