ଭୁବନେଶ୍ୱର, ୨୯ା୧୧(ବ୍ୟୁରୋ): ଯକ୍ଷ୍ମା ନିରାକରଣରେ ଓଡ଼ିଶା ଜାତୀୟସ୍ତରରେ ଦ୍ୱିତୀୟ ସ୍ଥାନରେ ରହିଛି। ଏନେଇ ଶନିବାର ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଟୁଇଟ୍ କରି ସୂଚନା ଦିଆଯାଇଛି। ବିଭାଗ ପକ୍ଷରୁ କୁହାଯାଇଛି ଯେ, ୨୦୧୮ରେ ଓଡ଼ିଶା ଏ କ୍ଷେତ୍ରରେ ୨୫ ର଼୍ୟାଙ୍କ୍ରେ ରହିଥିଲା। ରୋଗ ଚିହ୍ନଟ, ପରୀକ୍ଷଣ ସୁବିଧା ଓ ଚିକିତ୍ସାରେ ବ୍ୟାପକ ପଦକ୍ଷେପ ନିଆଯିବାରୁ ୨୦୨୦ରେ ଯକ୍ଷ୍ମା ନିରାକରଣ ପ୍ରୟାସରେ ଓଡ଼ିଶା ଭାରତରେ ଦ୍ୱିତୀୟ ର଼୍ୟାଙ୍କ୍ ପାଇଛି। ଏଥିସହିତ ରାଜ୍ୟର ୪ଟି ଜିଲା ଦେଶର ସମସ୍ତ ଜିଲା ମଧ୍ୟରେ ଶ୍ରେଷ୍ଠ ୧୦ ଭିତରେ ରହିଛି। ସୋନପୁର ଦ୍ୱିତୀୟ ର଼୍ୟାଙ୍କ୍ରେ ଥିବାବେଳେ ଦେବଗଡ଼ ତୃତୀୟ, ଜଗତ୍ସିଂହପୁର ପଞ୍ଚମ ଓ ବୌଦ୍ଧ ଷଷ୍ଠ ସ୍ଥାନରେ ରହିଛି। କୋଭିଡ୍-୧୯ ମହାମାରୀ ସତ୍ତ୍ୱେ ଏହି ପ୍ରଭାବୀ ପ୍ରଦର୍ଶନ ପାଇଁ ରାଜ୍ୟ ତଥା ଜିଲା ଯକ୍ଷ୍ମା ଦଳ (ଟିବି ଟିମ୍)କୁ ଅଭିନନ୍ଦନ ଜଣାଇଛି ସ୍ବାସ୍ଥ୍ୟ ବିଭାଗ। ୨୦୨୫ ସୁଦ୍ଧା ରାଜ୍ୟରୁ ଯକ୍ଷ୍ମାକୁ ସମ୍ପୂର୍ଣ୍ଣ ହଟାଇବାକୁ କେନ୍ଦ୍ର ସରକାରଙ୍କ ଏନ୍ଟିଇପି କାର୍ଯ୍ୟକ୍ରମର ଯାହା ଲକ୍ଷ୍ୟ ରହିଛି ତାହାକୁ ହାସଲ କରିବାକୁ ଆଶା ରହିଥିବା ବିଭାଗ ପକ୍ଷରୁ କୁହାଯାଇଛି।
