ଦଶମନ୍ତପୁର,୨୫ା୨ (ଡି.ଏନ.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ପିଣ୍ଡାପଦର ପଞ୍ଚାୟତ ଜଡ଼ାପୁଟ ଗ୍ରାମରେ ପାନୀୟ ଜଳ ସଙ୍କଟ ଦେଖିବାକୁ ମିଳିଛି। ଗ୍ରାମବାସୀ ବର୍ଷ ବର୍ଷ ଧରି ଝରଣା ପାଣିରେ ଚଳୁଥିବା ଜଣାପଡିଛି। ଏହି ଗ୍ରାମରେ ୪୦ରୁ ଊର୍ଦ୍ଧ୍ୱ ଆଦିବାସୀ ପରିବାର ବସବାସ କରନ୍ତି। ଗ୍ରାମବାସୀଙ୍କ ମୁଖ୍ୟ ସମସ୍ୟା ରୂପେ ପାନୀୟ ଜଳ ରହିଛି। ଗ୍ରାମରେ ଥିବା ଗୋଟିଏ ମାତ୍ର ନଳକୂପ ଜଳସଙ୍କଟ ଦୂର କରିପାରୁନି। ୮ ବର୍ଷ ହେଲା ଏହି ନଳକୂପ ମଧ୍ୟ ଅଚଳ ହୋଇପଡ଼ିଛି। ଗ୍ରାମବାସୀ ବାଧ୍ୟ ହୋଇ ଗ୍ରାମଠାରୁ ୫୦୦ ମିଟର ଦୂରରେ ଥିବା ପୋଡ଼ାଆମ୍ବପୋଦା ଝରଣାରୁ ଜଳ ସଂଗ୍ରହ କରି ଚଳୁଛନ୍ତି । ଏହି ଜଳକୁ ମଧ୍ୟ ପ୍ରାଥମିକ ବିଦ୍ୟାଳୟ, ପ୍ରାକ ବିଦ୍ୟାଳୟ ଓ ଅଙ୍ଗନଓ୍ବାଡି କେନ୍ଦ୍ରରେ ବ୍ୟବହାର କରାଯାଉଛି। ପୂର୍ବରୁ ଗ୍ରାମରେ ପାନୀୟ ଜଳ ସମସ୍ୟା ନ ଥିଲା। ଝରଣା ପାଣି ଗ୍ରାମକୁ ଆସୁଥିଲା। ତେବେ ଗ୍ରାମଦେଇ ନୂତନ ରୂପେ ନିର୍ମିତ ହେଉଥିବା ପିଏମ୍ଜିଏସ୍ଓ୍ବାଇ ରାସ୍ତା ନିର୍ମାଣ ବେଳେ ଗ୍ରାମକୁ ସଂଯୋଗ ହେଉଥିବା ପାଣି ପାଇପଗୁଡିକ ଠିକାଦାର ଭାଙ୍ଗି ଦେବାରୁ ଆମ ଗ୍ରାମରେ ପାନୀୟ ଜଳ ସଙ୍କଟ ଦେଖା ଦେଇଛି ବୋଲି ଗ୍ରାମର ପୁସ୍ତ ମୁଦୁଲି, କଇତା ମୁଦୁଲି, କୁରୁଞ୍ଜି ମୁଦୁଲି, ଲକ୍ଷ୍ମୀ ମୁଦୁଲି, ସପତି ଜାନି, ସଇତ ମୁଦୁଲି, ଭୁଇଲି ଜାନି, ନାରଙ୍ଗୀ ମୁଦୁଲି, ଦାନ ଜାନି ଅଭିଯୋଗ କରିଛନ୍ତି। ଏହି ପାଣି ପିଇ ଆମେ ଅନେକ ରୋଗର ଶିକାର ହେଉଛୁ ବୋଲି ଗ୍ରାମବାସୀ କହିଛନ୍ତି । ଏସମ୍ପର୍କରେ ଜଳ ଓ ପରିମଳ ବିଭାଗ କନିଷ୍ଠ ଯନ୍ତ୍ରୀ-୨ ସଞ୍ଜୀବ ଅଲ୍ଲିିଙ୍କୁ ପଚାରିବାରୁ ସେ କହିଲେ, ଖୁବ ଶୀଘ୍ର ଜଡାପୁଟ ଗ୍ରାମର ନଳକୂପ ମରାମତି କରିଦେବେ। ସରପଞ୍ଚ ନବୀନ ମୁଦୁଲିଙ୍କୁ ପଚାରିବାରୁ ଜଡାପୁଟରେ ଏକ ନୂତନ ନଳକୂପ ଖନନ ବ୍ୟବସ୍ଥା ହେବ ବୋଲି କହିଥିଲେ।