କେସିଙ୍ଗା,୨୧।୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଦେଓଗାଁ ପଞ୍ଚାୟତ ଅଧୀନ ମାଟିଆ ଗ୍ରାମର ମୁଖ୍ୟ ରାସ୍ତାରେ ଆଣ୍ଠୁଏ ପାଣି ଜମି ରହୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏନେଇ ଗ୍ରାମବାସୀ ଆର୍ଡ଼ି ବିଭାଗ ଏବଂ କେସିଙ୍ଗା ବିଡିଓଙ୍କୁ ବାରମ୍ବାର ଜଣାଇବା ସତ୍ତ୍ୱେ ରାସ୍ତା ମରାମତି କରାଯାଉ ନାହିଁ। ଫଳରେ ଉକ୍ତ ରାସ୍ତା ଦେଇ ଯାଉଥିବା ଛାତ୍ରୀଛାତ୍ରଙ୍କ ସମେତ ବୟୋଜ୍ୟେଷ୍ଠ ବ୍ୟକ୍ତି ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି।
ମାଟିଆ ଗ୍ରାମ ଦେଇ ଗେଓଗାଁରୁ ଗାଇଦର ଯାଏ ୯ କି.ମି. ରାସ୍ତା ଆର୍ଡି ବିଭାଗ ଦ୍ୱାରା ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ନିର୍ମାଣ କରାଯାଇଛି। ରାସ୍ତା ନିର୍ମାଣ ସମୟରେ ଠିକାଦାର ଠିକ ଭାବେ ମାଟି ଫିଲିଙ୍ଗ କରି ନ ଥିବାରୁ ଗ୍ରାମ ମଝିରେ ପ୍ରାୟ ୨୦୦ ଫୁଟ ଯାଏ ରାସ୍ତାରେ ବର୍ଷା ପାଣି ଜମି ରହୁଛି। ଫଳରେ ମଶା, ମାଛିଙ୍କ ପ୍ରାଦୁର୍ଭାବ ବୃଦ୍ଧି ପାଇ ଡେଙ୍ଗୁ, ମ୍ୟାଲେରିଆ ଭଳି ରୋଗ ହେବାର ସମ୍ଭାବନା ଦେଖାଦେଇଛି।
ଏପରିକି ମାଟିଆ ଗ୍ରାମର ଛାତ୍ରୀଛାତ୍ରମାନେ ସ୍କୁଲ ଯିବା ସମୟରେ ଆଣ୍ଠୁଏ କାଦୁଅ ପାଣିରେ ଯିବା ଆସିବା କରୁଛନ୍ତି। ଏପରିକି ଉକ୍ତ ରାସ୍ତାରେ ଆର୍ଡବ୍ଲ୍ୟୁଏସ୍ଏସ୍ ବିଭାଗ ପକ୍ଷରୁ ପାଇପ ଲାଇନ କାମ ଉକ୍ତ ରାସ୍ତା ଦେଇ ଯାଇଛି। ଫଳରେ ଗାଁ ମଝିରେ ପାଇପ୍ ଲାଇନ ଯୋଗୁ ଗାଡ଼ୱାଲ ମଧ୍ୟ କରିଥିବାରୁ ଖାଲ ହୋଇଛି। ଫଳରେ ବର୍ଷା ପାଣି ଆଣ୍ଠୁଏ ଜମି ରହୁଛି। ଏନେଇ ସ୍କୁଲ ଯିବା ସମୟରେ ଛାତ୍ରୀଛାତ୍ରମାନେ କାଦୁଅରେ ଖସି ପଡୁଥିବା ଅଭିଭାବକ ଧନେଶ୍ୱର ଗୌଡ଼, ମହେଶ୍ୱର ମାଝିଙ୍କ ସହ ଶିକ୍ଷା କମିଟିର ସଦସ୍ୟମାନେ ଅଭିଯୋଗ କରିଛନ୍ତି। ଏ ନେଇ ଗ୍ରାମର ଅଭିଭାବକ, ଶିକ୍ଷା କମିଟିର ସଦସ୍ୟଙ୍କ ସମେତ ପ୍ରଧାନ ଶିକ୍ଷକ, ସ୍ଥାନୀୟ ସରପଞ୍ଚ, ଆରଡି ବିଭାଗର ଯନ୍ତ୍ରୀ, କେସିଙ୍ଗା ବିଡିଓ, ଗୋଷ୍ଠୀ ଶିକ୍ଷା ଅଧିକାରୀଙ୍କୁ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିପାର ନାହିଁ। ଏ ସଂକ୍ରାନ୍ତରେ ଆରଡି ବିଭାଗ ଯନ୍ତ୍ରୀ ସୁଖୀଶ୍ୟାମ ନାଏକଙ୍କୁ ପଚାରିବାରୁ ପାଣି ଶୁଖିଗଲେ ପଥର ଗୁଣ୍ଡ ଦେଇ ମରାମତି କରାଯିବ ବୋଲି ପ୍ରକାଶ କରିଥିଲେ।