ନୂଆଦିଲ୍ଲୀ,୮ା୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ପାର୍ଲାମେଣ୍ଟରେ କଂଗ୍ରେସ ଦଳକୁ କଡ଼ା ସମାଲୋଚନା କରିଛନ୍ତି। ବ୍ରିଟିଶ ଶାସକ ଚାଲିଯାଇଛନ୍ତି ହେଲେ ସେମାନଙ୍କ ‘ବିଭାଜନ ଓ ଶାସନ’ ନୀତି ଏହି ଦଳର ଚରିତ୍ରରେ ପରିଣତ ହୋଇଛି। କଂଗ୍ରେସ ‘ଟୁକ୍ଡେ-ଟୁକ୍ଡେ ଗ୍ୟାଙ୍ଗ’ର ନେତା ପାଲଟିଥିବା ପ୍ରଧାନମନ୍ତ୍ରୀ କହିଛନ୍ତି। ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଭିଭାଷଣ ଉପରେ ଲୋକ ସଭାରେ ଧନ୍ୟବାଦ ପ୍ରସ୍ତାବ ଆଲୋଚନାରେ ଭାଗନେଇ ପ୍ରଧାନମନ୍ତ୍ରୀ କହିଥିଲେ, ବାରମ୍ବାର ହାରିବା ସତ୍ତ୍ୱେ ଏହି ସର୍ବପୁରାତନ ଦଳ ନିଜର ଅହଂକାର ଛାଡ଼ିପାରି ନାହିଁ। ଏହି ଦଳ କରିଥିବା କୁକର୍ମ ଲାଗି ଆଗାମୀ ୧୦୦ ବର୍ଷ ଯାଏ କ୍ଷମତାକୁ ଆସିବ ନାହିଁ, ତାହା ଏହାର ନେତାମାନେ ଧରିନେଇଥିବା ଜଣାପଡ଼ୁଛି ବୋଲି ମୋଦି କହିଥିଲେ।
କୋଭିଡ୍ ମହାମାରୀ ବେଳେ କଂଗ୍ରେସ ସବୁ ସୀମା ଟପିଯାଇଥିଲା। ପ୍ରଥମ ଲହର ବେଳେ ଦେଶବ୍ୟାପୀ ଲକ୍ଡାଉନ୍କୁ ଲୋକେ ମାନୁଥିବାବେଳେ ମୁମ୍ବାଇ ଷ୍ଟେଶନରେ କଂଗ୍ରେସ ନେତା ଛିଡ଼ାହୋଇ ନିରୀହ ଶ୍ରମିକମାନଙ୍କୁ ଭୟଭୀତ କରାଇଥିଲେ ଓ ସେମାନଙ୍କୁ ନିଜ ରାଜ୍ୟକୁ ଚାଲିଯିବା ପାଇଁ ବାଧ୍ୟ କରିଥିଲେ। ଫଳରେ ହଜାର ହଜାର ଲୋକ ଚାଲି ଚାଲି ଓ ଟ୍ରକ୍ ଯୋଗେ ନିଜ ରାଜ୍ୟକୁ ଫେରିଯାଇଥିଲେ, ଯେଉଁଥିପାଇଁ ସାରା ଦେଶକୁ ସଂକ୍ରମଣ ବ୍ୟାପିଗଲା। ଏପରି କରି କଂଗ୍ରେସ ବଡ଼ ପାପ କରିଥିବା ପ୍ରଧାନମନ୍ତ୍ରୀ କହିଛନ୍ତି। ପ୍ରାୟ ୧୦୦ ମିନିଟର ଭାଷଣରେ ମୋଦି ବିରୋଧୀ ଦଳକୁ ସମାଲୋଚନା କରି ଏହି ଦଳ ଅନ୍ଧ ଭାବେ ବିରୋଧ କରୁଥିବା ଏବଂ ବିଚ୍ଛିନ୍ନତାବାଦକୁ ସୁଦୃଢ଼ କରୁଥିବା କହିଥିଲେ। ସମାଲୋଚନା ଗଣତନ୍ତ୍ର ପାଇଁ ଅଳଙ୍କାର ହୋଇଥିବାବେଳେ ଅନ୍ଧ ବିରୋଧ ଗଣତନ୍ତ୍ର ପାଇଁ ଅପମାନ ବୋଲି ପ୍ରଧାନମନ୍ତ୍ରୀ ମତ ଦେଇଥିଲେ।
କେନ୍ଦ୍ର ସରକାର ଭୋକାଲ ଫର୍ ଲୋକାଲ କଥା କହୁଛନ୍ତି, ଯାହା ମହାତ୍ମା ଗାନ୍ଧୀଙ୍କ ସ୍ବପ୍ନ ଥିଲା। ହେଲେ ବିରୋଧୀ ଏହାକୁ ତାଚ୍ଛଲ୍ୟ କରୁଛନ୍ତି। ସେହିପରି ଆମେ ଯୋଗ ଓ ଫିଟ୍ ଇଣ୍ଡିଆ କଥା କହୁଥିବାବେଳେ ସେମାନେ ଏହାକୁ ଉପହାସ କରୁଛନ୍ତି। ବିଭାଜନକାରୀ ମାନସିକତା କଂଗ୍ରେସର ଡିଏନ୍ଏରେ ରହିଯାଇଛି ବୋଲି ମୋଦି କହିଛନ୍ତି। ୧୯୭୧ରେ ନିର୍ବାଚନ ଜିତିବା ବେଳେ କଂଗ୍ରେସର ସ୍ଲୋଗାନ ଥିଲା ‘ଦାରିଦ୍ର୍ୟ ଦୂରୀକରଣ’। ଦାରିଦ୍ର୍ୟ ଦୂର ହେଲା ନାହିଁ। ଲୋକେ ଏହି ଦଳକୁ କ୍ଷମତାରୁ ଦୂରେଇ ଦେଲେ। ଅନେକ ରାଜ୍ୟ ବହୁ ଦଶନ୍ଧି ହେଲା କଂଗ୍ରେସକୁ ପ୍ରତ୍ୟାଖ୍ୟାନ କରିଛନ୍ତି। ଏବେ ଦେଶ ଆଜାଦୀ କା ଅମୃତ ମହୋତ୍ସବ ପାଳନ କରୁଛି। ଆଗାମୀ ଦିନରେ ଭାରତ କିପରି ବିଶ୍ୱରେ ନେତୃତ୍ୱ ଭୂମିକା ତୁଲାଇ ପାରିବ ତାହା ଚିନ୍ତା କରିବାର ଏହା ପ୍ରକୃଷ୍ଟ ସମୟ। ମହାମାରୀ ପରେ ବିଶ୍ୱ ଏବେ ଏକ ନୂଆ ବିଶ୍ୱ ଗଠନ ଦିଗରେ ଦ୍ରୁତ ବେଗରେ ଆଗେଇ ଚାଲିଛି। ଭାରତ ଏହି ସୁଯୋଗକୁ ହାତଛଡ଼ା କରିବା ଉଚିତ ନୁହେଁ ବୋଲି ପ୍ରଧାନମନ୍ତ୍ରୀ କହିଛନ୍ତି। ପରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଲୋକ ସଭାରେ ଗୃହୀତ ହୋଇଛି।