କୋକସରା, ୧୮।୧୦ (ଡି.ଏନ.ଏ.) କଳାହାଣ୍ଡି ଜିଲା କୋକସରା ବ୍ଲକ ଗୋତମୁଣ୍ଡା ପଞ୍ଚାୟତ ଅନ୍ତର୍ଗତ ବନ୍ଧପଡାରେ ରହୁଥିବା ଅରକ୍ଷିତ ନାଏକଙ୍କ ମଝିଆ ପୁଅ ତୁମେଶ୍ୱର(୫)। ପାଞ୍ଚବର୍ଷର ହୋଇଥିଲେ ବି ସେ ଚଲାବୁଲା କରି ପାରୁ ନାହାନ୍ତି। ଖଟରେ ଦିନରାତି ଶୋଇ ରହିଛନ୍ତି। ଗରୀବ ମାବାପ ପୁଅର ଚିକିତ୍ସା କରାଇ ପାରୁ ନାହାନ୍ତି। ସ୍ଥାନୀୟ ସରପଞ୍ଚଙ୍କଠାରୁ ଆରମ୍ଭ କରି ବ୍ଲକ ଅଫିସ ଯାଏ ଜଣାଇଲେ ମଧ୍ୟ ତୁମେଶ୍ୱରଙ୍କୁ ଭିନ୍ନକ୍ଷମ ଭତ୍ତା ମିଳୁ ନ ଥିଲା। ଏ ନେଇ ଧରିତ୍ରୀ ଓ୍ବେବପୋର୍ଟାଲରେ ଖବର ପ୍ରସାରଣ ପରେ ବ୍ଲକ ପ୍ରଶାସନ ତତ୍ପରତା ପ୍ରକାଶିତ କରିଛି। ବ୍ଲକ ସାମାଜିକ ସୁରକ୍ଷା ଅଧିକାରୀ ଦୀପକ ବେହେରା ତୁମେଶ୍ୱରଙ୍କ ଆବଶ୍ୟକ କାଗଜ ପତ୍ର ପଞ୍ଚାୟତ ନିର୍ବାହୀ ଅଧିକାରୀଙ୍କ ଜରିଆରେ ସଂଗ୍ରହ କରି ଭିନ୍ନକ୍ଷମ ପ୍ରମାଣପତ୍ର ସହ ଭତ୍ତା ଯୋଜନାରେ ସାମିଲ କରିଛନ୍ତି । ଗୋତମୁଣ୍ଡା ସରପଞ୍ଚ ଜବାହାର ଗୋପାଳ ତୁମେଶ୍ୱରଙ୍କ ଘରକୁ ଯାଇ ୩ ମାସର ଭତ୍ତା ବାବଦ ୧୫ଶହ ଟଙ୍କା ସହ ତାର ଚିକିତ୍ସା ପାଇଁ ପ୍ରତିଶ୍ରୁତି ଦେଇଛନ୍ତି ।
