ଇସ୍ତାନବୁଲ,୫।୩ : ତୁର୍କୀରେ ଆଭ୍ୟନ୍ତରୀଣ ମନ୍ତ୍ରୀ ସୁଲେମାନ ସୋଏଲୁ କହିଛନ୍ତି ଯେ ଗତ ମାସରେ ତୁର୍କୀରେ ହୋଇଥିବା ଭୟଙ୍କର ଭୂକମ୍ପରେ ମୃତ୍ୟୁ ସଂଖ୍ୟା ୪୫,୯୬୮କୁ ବୃଦ୍ଧି ପାଇଛି। ଏହି ସଂଖ୍ୟା ପୁଣି ବଢ଼ିବାର ଆଶଙ୍କା ରହିଛି। କାରଣ ଏବେ ମଧ୍ୟ ଭଙ୍ଗା କୋଠା ତଳେ ଦବି ହୋଇ ରହିଥିବା ମୃତଦେହ ଉଦ୍ଧାର କାର୍ଯ୍ୟ ଜାରି ରହିଛି।
ଭୂକମ୍ପ ପ୍ରଭାବିତ ଦକ୍ଷିଣ ସହର ଆଣ୍ଟାକିଆରେ ଏକ କାର୍ଯ୍ୟକ୍ରମରେ ଯୋଗ ଦେଇ ସୋଏଲୁ କହିଛନ୍ତି ଯେ ତୁର୍କୀରେ ମୃତ୍ୟୁ ଘଟିଥିବା ଲୋକଙ୍କ ମଧ୍ୟରୁ ୪,୨୬୭ ଜଣ ସିରିଆର।
ଭୟଙ୍କର ଭୂକମ୍ପ ପରେ ଉଭୟ ଦେଶ ପାଇଁ ଅନେକ ସ୍ଥାନରୁ ସହାୟତା ଆସୁଛି। ଅପରେଶନ ଦୋସ୍ତ ଅଧୀନରେ ଭାରତ ମଧ୍ୟ ଉଭୟ ଦେଶକୁ ମାନବିକ ସହାୟତା ଯୋଗାଇ ଦେଇଛି। ଏହାକୁ ଦୃଷ୍ଟିରେ ରଖି ବର୍ତ୍ତମାନ ଆମେରିକାର ବିଭିନ୍ନ ସ୍ଥାନରୁ ଭାରତୀୟ-ଆମେରିକୀୟମାନେ ତୁର୍କୀ ଏବଂ ସିରିଆର ଭୂକମ୍ପରେ ପୀଡିତଙ୍କ ପାଇଁ ତିନି ଲକ୍ଷ ଡଲାରରୁ ଅଧିକ ଆର୍ଥିକ ସହାୟତା ସଂଗ୍ରହ କରିଛନ୍ତି।
ଆମେରିକୀୟ ଆସୋସିଏଶନ ଅଫ ଫିଜିସିଆନ୍ସ ଅଫ ଇଣ୍ଡିଆନ ଓରିଜିନର ପୂର୍ବତନ ସଭାପତି ଡାକ୍ତର ହେମନ୍ତ ପଟେଲଙ୍କ ନେତୃତ୍ୱରେ ବିଶିଷ୍ଟ ଭାରତୀୟ ଆମେରିକୀୟ ସମ୍ପ୍ରଦାୟ ଏହି ଆର୍ଥିକ ସହାୟତା ସଂଗ୍ରହ କରାଯାଇଛି।
ତୁର୍କୀର ପରିବେଶ ଏବଂ ସହରୀକରଣ ମନ୍ତ୍ରୀ ମୁରତ କୁରୁମ କହିଛନ୍ତି ଯେ ଭୟଙ୍କର ଭୂକମ୍ପ ଯୋଗୁଁ ୧୬୪,୦୦୦ କୋଠା ଭୁଶୁଡି ପଡିଛି ଅବା ନଷ୍ଟ ହୋଇଯାଇଛି। ଏହି ସମୟରେ, ଉତ୍ତର-ପଶ୍ଚିମ ସିରିଆର ସ୍ଥାନୀୟ ନାଗରିକ ପ୍ରତିରକ୍ଷା କହିଛି ଯେ ଦେଶରେ ଆଉ ଏକ ଭୂକମ୍ପ ଭୟରେ ହଜାର ହଜାର ଶିଶୁ ଏବଂ ହଜାର ହଜାର ପରିବାର କାର ଏବଂ ତମ୍ବୁରେ ଆଶ୍ରୟ ନେଇଛନ୍ତି।
