ଆମଷ୍ଟରଡମ,୭ ।୨: ତୁର୍କୀ ଓ ସିରିଆରେ ସୋମବାର ଆସିଥିବା ଭୂକମ୍ପରେ ଏବେ ପର୍ଯ୍ୟନ୍ତ ପ୍ରାୟ ୪୩୬୫ ଲୋକଙ୍କ ମୃତ୍ୟୁ ହୋଇଥିବା ଖବର ଆସିଛି । ଆହୁରି ଶହ ଶହ ଲୋକେ ବଡବଡ କୋଠାର ଭଗ୍ନାବଶେଷ ତଳେ ଚାପି ହୋଇ ରହିଛନ୍ତି । ତେଣୁ ଆଗକୁ ଏହି ମୃତ୍ୟୁ ସଂଖ୍ୟା କେତେ ହେବ ତାହା ଏବେ କଳନା କରିବା କାଠିକାର ପାଠ ହୋଇଯାଇଛି । ତେବେ ଏହି ଭୂକମ୍ପ ସମ୍ପର୍କରେ ୩ ଦିନ ପୂର୍ବରୁ କରାଯାଇଥିବା ଏକ ଭବିଷ୍ୟବାଣୀକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । ଟୁଇଟରରେ ଏମିତି ଏକ ଭବିଷ୍ୟବାଣୀ କରାଯାଇଥିବା ବେଳେ ଲୋକେ ଏହାକୁ ଗମ୍ଭିରତାର ସହ ନେଇ ନ ଥିଲେ । ଅନେକ ଏହାକୁ ପାଗଳାମି ବୋଲି ବି କହିଥିଲେ ।
ସୂଚନାଯୋଗ୍ୟ, ଭୂକମ୍ପ ଗତିବିଧିର ଅଧ୍ୟୟନ କରୁଥିବା ସୋଲର ସିଷ୍ଟମ ଜିଓମେଟ୍ରି ସର୍ଭେର ଜଣେ ଗବେଷକ ଫ୍ରେକ ହୁଗରବିଟସ୍ ଟୁଇଟରରେ ୩ ଦିନ ପୂର୍ବରୁ ଭବିଷ୍ୟବାଣୀ କରିଥିଲେ କି ଆଜି ନୁହେଁ ତ କାଲି ଦକ୍ଷିଣ-ମଧ୍ୟ ତୁର୍କୀ, ଜୋର୍ଡାନ, ସିରିଆ ଓ ଲେବାନନର ଆଖପାଖ ଅଞ୍ଚଳରେ ୭.୫ ତୀବ୍ରତାର ଭୂକମ୍ପ ଆସିବ । ହେଲେ ତାଙ୍କର ଏହି ଟୁଇଟକୁ କେହି ଗମ୍ଭିରତାର ସହ ନେଇ ନ ଥିଲେ । କେତେଜଣ ତାଙ୍କର ଏହି ଟୁଇଟକୁ ନେଇ ତାଙ୍କୁ ଜଣେ ମିଛୁଆ ବୈଜ୍ଞାନିକ ବୋଲି ବି କହିଥିଲେ । ତାଙ୍କ ପୂର୍ବ ଭବିଷ୍ୟବାଣୀକୁ ନେଇ ବି ପ୍ରଶ୍ନ ଉଠିଥିଲା ।