ଅସଗାବଟ,୧୪ ।୧୧: ରାସ୍ତା କଡ଼ରେ ସାଧାରଣତଃ ବଡ ବଡ ନେତାଙ୍କ ପ୍ରତିମୂର୍ତ୍ତି ଲାଗିଥିବା ସମସ୍ତେ ଦେଖିଥିବେ । ହେଲେ ରାସ୍ତା କଡରେ କୌଣସି ପଶୁଜନ୍ତୁଙ୍କ ପ୍ରତିମୂର୍ତ୍ତି କଥା ଚିନ୍ତା କଲେ ଟିକେ ଅଡୁଆ ଲାଗିପାରେ । ହେଲେ ତୁର୍କମେନିସ୍ତାନ ଶାସନରେ ଏଭଳି ଘଟଣା ଦେଖିବାକୁ ମିଳିଛି । ତୁର୍କମେନିସ୍ତାନର ରାଷ୍ଟ୍ରପତି ଗୁର୍ବାଙ୍ଗୁଲେ ବରଡିମୁହାମେଡୋ ନିଜ ପସନ୍ଦର କୁକୁରର ପ୍ରତିମୂର୍ତ୍ତି ତିଆରି କରି ତୁର୍କମେନିସ୍ତାନର ରାଜଧାନୀର ନୂଆ ଅଞ୍ଚଳରେ ଲଗାଇ ଦେଇଛନ୍ତି । ୨୦୦୭ରେ ରାଷ୍ଟ୍ରପତି ଆସନରେ ବସିଥିବା ଗୁର୍ବାଙ୍ଗୁଲେ ବୁଧବାର ଅଲବି ପ୍ରଜାତିର ଏହି କୁକୁର ପ୍ରତିମୂର୍ତ୍ତିକୁ ଉଦ୍ଘାଟନ କରିଛନ୍ତି । ଏହି ମୂର୍ତ୍ତି କଂସାରେ ତିଆରି ହୋଇଛି । ପ୍ରାୟ ୫୦ ଫୁଟ ଉଚ୍ଚତାର ଏହି କୁକୁର ପ୍ରତିମୂର୍ତ୍ତିରେ ୨୪ କ୍ୟାରେଟ ସୁନାର ଆବରଣ ଲଗାଯାଇଛି । ଯେଉଁ ଅଞ୍ଚଳରେ ତୁର୍କମେନିସ୍ତାନ ଅଧିକାରୀମାନେ ରହିବାକୁ ନୂଆ ଘର ତିଆରି କରାଯାଇଛି ସେହିଠାରେ ଏହି କୁକୁର ପ୍ରତିମୂର୍ତ୍ତି ଲଗାଯାଇଛି । ତେବେ ସାରା ବିଶ୍ୱରେ ଏହି ଅଲବି ପ୍ରଜାତିର କୁକୁରକୁ ବେଶ ପସନ୍ଦ କରିଥାଆନ୍ତି ।