ତେନ୍ତୁଳିଖୁଣ୍ଟି, ୧୭।୬(ଚିଦାନନ୍ଦ ସାହୁ): ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ଅଞ୍ଚଳଗୁମ୍ମା ପଞ୍ଚାୟତରେ ହଠାତ୍ ୪୪୦ ହାଇ ଭୋଲ୍ଟେଜ ଆସିଯିବାରୁ ଲୋକଙ୍କ ଟିଭି, କୁଲର, ଫ୍ରିଜ୍, ଘରର ସମସ୍ତ ବଲ୍ବ୍, କମ୍ପ୍ୟୁଟର, ମଟର, ଇନ୍ଭୋଟର ଓ ଇଣ୍ଡକ୍ଶନ ଚୁଲା ଆଦି ବିଭିନ୍ନ ସରଞ୍ଜାମ ପୋଡ଼ି ଯାଇଥିବା ଅଭିଯୋଗ ହୋଇଛି। ଏଥିରେ ପ୍ରାୟ ୫୦ ଲକ୍ଷ ଟଙ୍କାର କ୍ଷୟକ୍ଷତି ହୋଇଥିବା ସୂଚନା ମିଳିଛି।
ସମସ୍ତଙ୍କ ଘରେ ବଲ୍ବ, ଟିଭି, କୁଲର, ଫ୍ରିଜ, ଫ୍ୟାନ ଆଦି ଲାଗିଥିଲା। ଏହି ସମୟରେ ହାଇ ଭୋଲ୍ଟେଜ ଆସି ଯିବାରୁ ଶର୍ଟ ସର୍କିଟ ହୋଇ ପ୍ରୀତିଶ ଚନ୍ଦ୍ରଙ୍କ ଟିଭି, ସମସ୍ତ ବଲ୍ବ, ଫ୍ରିଜ୍, ବିଶ୍ବରଞ୍ଜନ ସାହୁଙ୍କ ୨ଟି ଟିଭି, ଇନ୍ଭୋଟର, ଫ୍ୟାନ ପୋଡିଯାଇଛି। ସେହିପରି ବିକାଶ ଚୌଧୁରୀଙ୍କ ଟିଭି, ଫ୍ୟାନ, ବଲ୍ବ, ଇଣ୍ଡକସନ ପୋଡି ଯାଇଥିବା ବେଳେ କାଳିଆ ତ୍ରିପାଠୀଙ୍କ ଟିଭି, ଫ୍ରିଜ, ବଲ୍ବ ଆଦି ପୋଡିଯାଇଥିବା ଅଭିଯୋଗ ହୋଇଛି।
ରାମକୃଷ୍ଣ ବିଷୋୟୀଙ୍କ ଟିଭି, ଫ୍ୟାନ ପୋଡି ଯାଇଥିବା ବେଳେ ରାଜେଶ ଗଣ୍ଡାଙ୍କ ଟିଭି, ରିସିଭର ଏବଂ ହିମାଂଶୁ ଶେଖର ବିଷୋୟୀଙ୍କ ଟିଭି, ଫ୍ରିଜ, ଫ୍ୟାନ ପୋଡ଼ିଯାଇଛି। ଟାଟା ପାଓ୍ବାର ବିନା ଟ୍ରେନିଂରେ ହେଲପର ପିଲାଙ୍କୁ ନିଯୁକ୍ତି ପ୍ରଦାନ କରି ମେଣ୍ଟେନାନ୍ସ ଦାୟିତ୍ୱ ଦେଉଥିବାରୁ ଏପରି ହୋଇଛି ବୋଲି ଅଭିଯୋଗ ହୋଇଛି। ଅନ୍ୟପକ୍ଷେ ଗ୍ରାମବାସୀ ଟାଟା ପାୱାର ଗାଡିକୁ ଅଟକାଇ ରଖିଥିଲେ । ତେନ୍ତୁଳିଖୁଣ୍ଟି ଜେଇଙ୍କୁ ଅଭିଯୋଗପତ୍ର ପ୍ରଦାନ କରି ତୁରନ୍ତ ଏଥିପ୍ରତି ପଦକ୍ଷେପ ନେବାକୁ ସେମାନେ ଅନୁରୋଧ କରିଥିଲେ।