ଫ୍ଲୋରିଡା, ୨୩ ।୨: ଆମେରିକାରେ ପୁଣି ଫୁଟିଛି ଗୁଳି । ଆମେରିକାର ଫ୍ଲୋରିଡାରୁ ଏକ ଛାତିଥରା ଖବର ସାମ୍ନାକୁ ଆସିଛି । ଏଠାରେ ଜଣେ ଟେଲିଭିଜନ ଖବରଦାତାଙ୍କୁ ରିପୋର୍ଟିଂ ସମୟର ଗୁଳି କରି ହତ୍ୟା କରାଯାଇଛି । ଏହି ଗୁଳିକାଣ୍ଡରେ ଜଣେ ୯ ବର୍ଷର ଝିଅ ସମେତ ତାଙ୍କ ମାଆ ଓ ଜଣେ ଟେଲିଭିଜନ କ୍ର୍ୟୁ ମେମ୍ବର ଆହତ ହୋଇଛନ୍ତି । ଖବରଦାତା ଜଣକ ସ୍ପେକ୍ଟ୍ରମ ନ୍ୟୁଜ ୧୩ରେ କାମ କରୁଥିଲେ । ଏହି ଘଟଣାର କିଛି ସମୟ ପରେ ପୋଲିସ ଅଭିଯୁକ୍ତ ୧୯ ବର୍ଷୀୟ ବୋଲଭିନ ମୁସାଙ୍କୁ ଗିରଫ କରିଛି ।
ଅଧିକାରୀଙ୍କ ସୂଚନା ଅନୁଯାୟୀ, ଗୁଳିକାଣ୍ଡର କାରଣ ସମ୍ପର୍କରେ ଏପର୍ଯ୍ୟନ୍ତ କୌଣସି ସୂଚନା ମିଳିପାରି ନାହିଁ । ଗିରଫ କରିବା ସମୟରେ ଅଭିଯୁକ୍ତଙ୍କ ନିକଟରୁ କିଛି ଅସ୍ତ୍ର ଜବତ କରାଯାଇଛି । ଏବେ ଅଭିଯୁକ୍ତ ପୋଲିସକୁ ସହଯୋଗ କରୁ ନ ଥିବା ଜଣାପଡିଛି । ହ୍ୱାଇଟ ହାଉସର ପ୍ରେସ ସଚିବ କାରାଇନ ଜିନ-ପିୟରେ ଏକ ଟୁଇଟ କରି କହିଛନ୍ତି, ମୃତ ଖବରଦାତାଙ୍କ ପରିବାର ଓ ଫ୍ଲୋରିଡାର ଅରେଞ୍ଜ କାଉଣ୍ଟିରେ ଆହତ ହୋଇଥିବା ସଦସ୍ୟଙ୍କ ପ୍ରତି ସମବେଦନା ଜଣାଇଛନ୍ତି । ଏହାସହ ସ୍ପେକ୍ଟ୍ରମ ନ୍ୟୁଜର ଟିମକୁ ବି େ ସମବେଦନା ଜଣାଇଛନ୍ତି ।
