କରୋନାରେ ଟେଲି ତାରକାଙ୍କ ଅବସ୍ଥା ବେହାଲ: କିଏ ଆଇସିୟୁରେ ତ କିଏ ଖୋଜୁଛନ୍ତି ଶଯ୍ୟା, ଆଉ…
06 ବମ୍ବେ: କରୋନାର ଦ୍ୱିତୀୟ ଲହର ସହ ଲଢ଼ୁଛି ସାରା ଦେଶ। ସାଧାରଣ ଜନତାଙ୍କଠାରୁ ଆରମ୍ଭ କରି ସେଲିବ୍ରିଟିମାନେ ମଧ୍ୟ ଏଥିରେ ପ୍ରଭାବିତ ହେଉଛନ୍ତି। ଅନେକ କଳାକାର କରୋନା ସଂକ୍ରମିତ ହୋଇ ସୁସ୍ଥ ହୋଇସାରିଛନ୍ତି। ହେଲେ ଏଭଳି କେତେଜଣ ଅଛନ୍ତି ଯେଉଁମାନେ ମହାମାରୀ କବଳରେ ଫସିରହିଛନ୍ତି।
କିଛିଦିନ ପୂର୍ବେ ‘ପଟିଆଲା ବେବ୍ସ’ ଏବଂ ‘ଶକ୍ତି ଅସ୍ତିତ୍ୱ କେ ଏହସାସ କି’ ଭଳି ଧାରାବାହିକରେ ଅଭିନୟ କରି ବାହାବା ସାଉଁଟିଥିବା ଅଭିନେତା ଅନିରୁଦ୍ଧ ଦବେ କରୋନା ପଜିଟିଭ୍ ହୋଇଥିଲେ। ଏବେ ତାଙ୍କ ଅବସ୍ଥା ଗୁରୁତର ରହିଛି। ତାଙ୍କୁ ଆଇସିୟୁକୁ ସ୍ଥାନାନ୍ତର ମଧ୍ୟ କରାଯାଇଛି। ଏଭଳି ସମୟରେ ତାଙ୍କ ପାଇଁ ପ୍ରାର୍ଥନା କରିବାକୁ ଜଣେ ବନ୍ଧୁ ପ୍ରଶଂସକଙ୍କୁ ଅପିଲ କରିଛନ୍ତି।
‘ବିଗ୍ବସ୍୧୪’ ଫେମ୍ ଅଲି ଗୋନି ନିଜର ସୋସିଆଲ ପୋଷ୍ଟକୁ ନେଇ ଚର୍ଚ୍ଚାରେ। ରମଜାନ ମାସ ଚାଲିଥିବା ବେଳେ ଅଲି ନିଜ ପରିବାର ସହ ହୋମଟାଉନ୍ରେ ଅଛନ୍ତି। ସେଠାରେ ସେ ରୋଜା ରଖି ଆସୁଥିବା ବେଳେ ସ୍ବାସ୍ଥ୍ୟ ଖରାପ ହେବା ଯୋଗୁ ଅଧାରୁ ଛାଡ଼ିବାକୁ ପଡ଼ିଛି। ଇନ୍ଷ୍ଟା ଆକାଉଣ୍ଟରେ ଅଲି ଦେହ ଭଲ ଲାଗୁନାହିଁ ବୋଲି କହିଥିଲେ। ଏହାପରଠାରୁ ପ୍ରଶଂସକମାନେ ତାଙ୍କର ଆରୋଗ୍ୟ କାମନା କରୁଛନ୍ତି।
ସେହିଭଳି ଲୋକପ୍ରିୟ ଟେଲି ଅଭିନେତ୍ରୀ ତଥା ଭୋଜପୁରୀ ଫିଲ୍ମ ନାୟିକା ସମ୍ଭାବନା ସେଠଙ୍କ ବାପା କରୋନା ସଂକ୍ରମିତ ହୋଇଛନ୍ତି। ତାଙ୍କ ଅବସ୍ଥା ଗୁରୁତର ଥିଲେ ହେଁ ଡାକ୍ତରଖାନାରେ ବେଡ୍ ମିଳୁନାହିଁ। ଫଳରେ ଅଭିନେତ୍ରୀ ସୋସିଆଲ ମିଡିଆ ଜରିଆରେ ସହାୟତା ମାଗିଛନ୍ତି। ପୀତମପୁରା, ଦିଲ୍ଲୀର ଜୟପୁର ଗୋଲ୍ଡେନ ହସ୍ପିଟାଲରେ ଶଯ୍ୟା ପାଇଁ କେହି ସହାୟତା କରିପାରିବେ କି ବୋଲି ସେ ପୋଷ୍ଟ କରିଛନ୍ତି।