ବରଗଡ଼ ଅଫିସ,୭।୧: ବରଗଡ଼ ପୌର ପରିଷଦ ଅଧୀନ ଓ୍ବାର୍ଡ ନଂ-୧ ନିଗମାନନ୍ଦ ବିହାରସ୍ଥିତ ଏକ ଭଡ଼ାଘରେ ରହୁଥିବା ପୂଜା ୟାଦବ ଓ କଲ୍ଲୁ ୟାଦବଙ୍କ ଏକ ଶିଶୁପୁତ୍ର ସାଇ ଗୁରୁତର ଅସୁସ୍ଥ ଅଛନ୍ତି। ତାଙ୍କ ବୟସ ୧୪ ମାସ ହୋଇଥିବା ବେଳେ ସେ ଚଲାବୁଲା କରିବା ତ ଦୂରର କଥା, ଉଠାବସା କରିପାରୁ ନାହାନ୍ତି। ଅନ୍ୟପକ୍ଷରେ ତାଙ୍କ ଶିଶୁପୁତ୍ର ଜନ୍ମ ହେବା ପରେ ତାଙ୍କ ବାପା କର୍ମ ଅନ୍ବେଷଣରେ ରାଜ୍ୟ ବାହାରକୁ ଯାଇଥିବା ବେଳେ ଘରକୁ ଆଉ ଫେରି ନାହାନ୍ତି। ଏଭଳି ସ୍ଥିତିରେ ପୂଜା ଶିଶୁପୁତ୍ର ସାଇଙ୍କ ଚିକିତ୍ସା ପାଇଁ ଚିନ୍ତିତ ହୋଇ ପଡ଼ିଛନ୍ତି। ବାପଘରେ ପୁଅ ସହିତ ସେ ଆଶ୍ରୟ ନେଇଛନ୍ତି। କିନ୍ତୁ ପୁଅଙ୍କ ଚିକିତ୍ସା ପାଇଁ ତାଙ୍କୁ ଅର୍ଥ ପ୍ରତିବନ୍ଧକ ସାଜିଛି। ଏ ନେଇ ୭ ତାରିଖ ଗୁରୁବାର ‘୧୪ ମାସ ଶିଶୁର ଚିକିତ୍ସା ଚିନ୍ତା’ ଶୀର୍ଷକ ଏକ ଖବର ଧରିତ୍ରୀରେ ପ୍ରକାଶ ପାଇଥିଲା। ଉକ୍ତ ପ୍ରକାଶିତ ଖବରକୁ ବରଗଡ଼ର ସାମାଜିକ କର୍ମୀ ଦୀପା ବାରିକ ଏବଂ ରମେଶ ମେହେର ମୁଖ୍ୟମନ୍ତ୍ରୀଙ୍କ ସମେତ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପ୍ରମୁଖଙ୍କୁ ଟୁଇଟ୍ କରିଛନ୍ତି। ଏହାପରେ ବରଗଡ ବିଧାୟକ ଦେବେଶ ଆଚାର୍ଯ୍ୟ, ଅତାବିରା ବିଧାୟିକା ସ୍ନେହାଙ୍ଗିନୀ ଛୁରିଆ ପ୍ରମୁଖ ଚିକିତ୍ସା ସହାୟତା ପାଇଁ ଜିଲାପାଳ, ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ଦୃଷ୍ଟିକୁ ଆଣିଛନ୍ତି। ସେହିପରି ବରଗଡ଼ ସ୍ତ୍ରୀ ରୋଗ ଓ ପ୍ରସୂତି ବିଶେଷଜ୍ଞ ଡା. ସୁସ୍ମିତା ଦାଶ ମଧ୍ୟ ସହଯୋଗର ହାତ ବଢ଼ାଇବା ପାଇଁ ଟୁଇଟ୍ରେ ନିଜ ଇଚ୍ଛା ପ୍ରକାଶ କରିଛନ୍ତି।
