ବେଳେବେଳେ ଅଜବ କଥା ଶୁଣିବାକୁ ମିଳିଥାଏ। ଏଥିରୁ କିଛି କଥା ବିଶ୍ୱସନୀୟ ହୋଇଥିବା ବେଳେ ଆଉ କିଛି ଅବିଶ୍ୱସନୀୟ ଲାଗିଥାଏ। ସେହିପରି ଏକ ଘଟଣା ଦେଖିବାକୁ ମିଳିଛି ଅଷ୍ଟ୍ରେଲିଆରେ। ଏଠାରେ ରହୁଥିବା ଦୁଇ ଯାଁଳା ଭଉଣୀ ଏନା ଏବଂ ଲୁସିଙ୍କର ଜଣେ ପ୍ରେମିକ। ଦୁଇଜଣ ଅଲଗା ସିନା ଜୀବନ ମନ୍ତ୍ରକୁ ଗୋଟିଏରେ ପରିଣତ କରିଛନ୍ତି। କାରଣ ସେ ସବୁକିଛି ଏକା ସାଙ୍ଗରେ କରିବାକୁ ପସନ୍ଦ କରନ୍ତି। ଏପରିକି ଏକାସାଙ୍ଗରେ ଦୁଇଜଣ ପ୍ରେମିକଙ୍କୁ ବିବାହ କରିବା ସହ ଗର୍ଭବତୀ ହେବାକୁ ସ୍ଥିର କରିଛନ୍ତି।
ଏହି ଦୁଇ ଭଉଣୀ କିଛିଦିନ ପୂର୍ବରୁ ଟିଏଲ୍ସି ଏକ୍ସଟ୍ରିମ୍ ସିଷ୍ଟର୍ସ ନାମକ ଏକ ଶୋ’ରେ ନଜର ଆସିଥିଲେ। ଏହି ଯାଁଳା ଭଉଣୀ ଦୁନିଆର ସବୁଠୁ ନିକଟତର ବୋଲି କୁହାଯାଉଛି। କାରଣ ଏମାନେ ପ୍ରତ୍ୟେକ କାମ ଏକା ସମୟରେ କରିଥାନ୍ତି।
ଲୁସି ଏବଂ ଏନା ଏକା ସାଙ୍ଗରେ ଖାଇଥାନ୍ତି। ଏକାପ୍ରକାର ଡ୍ରେସ୍ ବି ପିନ୍ଧିଥାନ୍ତି। ସାଥୀ ହୋଇ ଓ୍ବାର୍କଆଉଟ୍ କରିବା ଠାରୁ ଆରମ୍ଭ କରି ଗାଧୋଇବା, ବସିବା, ଶୋଇବା, ବୁଲିବା ଆଦି ପ୍ରତ୍ୟେକ କାର୍ଯ୍ୟ ମିଶି କି କରିଥାନ୍ତି। ଜଣଙ୍କଠାରୁ ଜଣକୁ ଅଲଗା କରିବା ବହୁତ କଷ୍ଟ। ୪୦ ବର୍ଷରେ ପଦାର୍ପଣ କରିଥିବା ଏନା ଏବଂ ଲୁସି କୁହନ୍ତି, ସେମାନେ ଏକା ସମୟରେ ମା’ ହେବାକୁ ଚାହାନ୍ତି। ମାତ୍ର ଅଷ୍ଟ୍ରେଲିଆର ଏକ ନିୟମ ତାଙ୍କ ପାଇଁ ପାଚେରି ହୋଇ ଠିଆ ହୋଇଛି।
ଏନା ଏବଂ ଲୁସି ତାଙ୍କ ବୟଫ୍ରେଣ୍ଡ ବେନ୍ଙ୍କ ସହ ୨୦୧୨ରେ ସାକ୍ଷାତ ହୋଇଥିଲା। ବେନ୍ ପେସାରେ ଜଣେ ମେକାନିକ୍। ଏହି ଦୁଇ ଭଉଣୀଙ୍କୁ ଦେଖି ଆକର୍ଷିତ ହୋଇଥିଲେ ବେନ୍। ଦୁଇ ଭଉଣୀ ମଧ୍ୟ ବେନ୍ଙ୍କୁ ବହୁ ପସନ୍ଦ କରନ୍ତି। କିନ୍ତୁ ଅଷ୍ଟ୍ରେଲିଆର ନିୟମ କାନୁନ ଅନୁଯାୟୀ, ଏହା ହୋଇପାରିବ ନାହିଁ। ମ୍ୟାରେଜ ଆକ୍ଟ ୧୯୬୧ ଅନୁଯାୟୀ, ଜଣେ ବ୍ୟକ୍ତି ଦୁଇ ଜଣଙ୍କୁ ବିବାହ କରିପାରିବ ନାହିଁ।
ଏକ ରିୟାଲିଟି ଶୋ’ରେ ଏ ବିଷୟରେ କଥା ହେଉଥିବା ବେଳେ ଦୁଇ ଭଉଣୀ ଭାବବିହ୍ବଳ ହୋଇଯାଇଥିଲେ। କାରଣ ଦୀର୍ଘଦିନ ଧରି ଦୁହେଁ ଏକାସାଙ୍ଗରେ ବିବାହ କରିବାକୁ ପ୍ରସ୍ତୁତ ଚଳାଇ ଆସୁଛନ୍ତି। ମାତ୍ର ଏହା ଆଇନ ବିରୋଧୀ ବୋଲି ଅଷ୍ଟ୍ରେଲିଆ କାନୁନ କହୁଛି। ତେଣୁ ଦୁଇ ଭଉଣୀ ମାନସିକ ଦୁଃଶ୍ଚିନ୍ତାରେ ପଡ଼ିଛନ୍ତି। ଲୁସି କୁହନ୍ତି, ଆମେ ବିବାହ କଲେ କିଛି ଅସୁବିଧା ହେବ ନାହିଁ। କେହି କାହା ପ୍ରତି ଈର୍ଷା କରିବୁ ନାହିଁ। ବେନ୍ ମଧ୍ୟ ଏଥିରେ ରାଜି ଅଛନ୍ତି। ଦୁଇଜଣ ବେନ୍ଙ୍କୁ ବିବାହ କଲେ ଖୁସିରେ ରହିବେ ବୋଲି କହିଛନ୍ତି।