ନୋଏଡା,୨୮ ।୮: ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଉତ୍ତର ପ୍ରଦେଶ ନୋଏଡାର ସେକ୍ଟର-୯୩ଏରେ ଥିବା ଏମରାଲ୍ଡ କୋର୍ଟର ଟ୍ୱିନ ଟାୱାରକୁ ରବିବାର ଦିନ ପ୍ରାୟ ୨ଟା ୩୦ରେ ମାଟିରେ ମିଶାଇ ଦିଆଯାଇଛି । ଏଥିପାଇଁ ବନ୍ଦ ଥିବା ନୋଏଡା-ଗ୍ରେଟର ନୋଏଡା ହାଇୱେକୁ ସାଧାରଣ ଜନତାଙ୍କ ଗମନା ଗମନ ପାଇଁ ଖୋଲି ଦିଆଯାଇଛି । ଏହି ୩୨ ମହଲା ବିଶିଷ୍ଟ କୋଠାଟି ଭାଙ୍ଗିବାରେ କୌଣସି କ୍ଷତି ହୋଇ ନ ଥିବା ଜଣାପଡିଛି । କିନ୍ତୁ ଏହା ଭାଙ୍ଗିବା ପରେ ଉକ୍ତ ଅଞ୍ଚଳରେ କିଛି ମିଟର ପର୍ଯ୍ୟନ୍ତ ଧୂଳି ଧୂଆରେ ଭର୍ତ୍ତି ହୋଇଯାଇଥିବା ଦେଖାଯାଇଥିଲା । କିନ୍ତୁ ଏହାକୁ ଆୟତ୍ତ କରିବାକୁ ବି ବ୍ୟବସ୍ଥା କରାଯାଇଛି । ହେଲେ ପୂର୍ବରୁ ଯାହା ଅନୁମାନ କରାଯାଇଥିଲା ତା’ଠାରୁ ଅଧିକ ଦୂରକୁ ଏହି ଧୂଳି ଧୂଆଁ ବ୍ୟାପି ଯାଇଥିବା କୁହାଯାଉଛି । ସେଥିପାଇଁ ତୁରନ୍ତ ସ୍ମୋକ ଗ୍ୟାସ ଜରିଆରେ ଓ ପାଣି ସିଞ୍ଚନ କରି ଏହାକୁ ନିୟନ୍ତ୍ରଣକୁ ଆଣିବାକୁ ଚେଷ୍ଟା କରାଯାଇଛି । ସାଧାରଣ ଜନତା ଯେଭଳି ଏହାଦ୍ୱାର ପ୍ରଭାବିତ ନ ହେବେ ସେଥିପ୍ରତି ବିଶେଷ ଧ୍ୟାନ ଦିଆଯାଇଛି ।