ନୋଏଡା, ୨୭।୮ : ରବିବାର ଅପରାହ୍ନ ୨ଟା ୩୦ରେ ନୋଏଡାରେ ଆକାଶକୁ ଛୁଇଁଥିବା ଟୁଇନ ଟାଓ୍ବାର ଭାଙ୍ଗି ମାଟିରେ ମିଶିବ। ପ୍ରସ୍ତୁତି ଶେଷ ହୋଇଛି। ସେକ୍ଟର ୯୩-ଏ ରେ ଅବସ୍ଥିତ ଉଭୟ ୩୨ ଏବଂ ୨୯ ମହଲା ବିଶିଷ୍ଟ ଟାୱାରରେ ୩୭୦୦ କିଲୋଗ୍ରାମ ବାରୁଦ ଲଗାଯାଇଛି। ଏହାର ବିସ୍ଫୋରଣରେ ମାତ୍ର ୯-୧୨ ସେକେଣ୍ଡ ମଧ୍ୟରେ ଟୁଇନ ଟାଓ୍ବାର ଭାଙ୍ଗି ଯିବ। ୭୦ ମିଟର ଦୂରରୂ ବିସ୍ଫୋରଣ ପାଇଁ ବଟନ ଅନ୍ କରାଯିବ।
୧୦୨ମିଟର ଉଚ୍ଚ ଟାୱାର ଦ୍ୱାରା ୧୧ ମିଟର ଉଚ୍ଚ ଅଳିଆ ଗଦା ସୃଷ୍ଟି ହେବ ବୋଲି କୁହାଯାଉଛି। ସୁପରଟେକ ବିଲଡର ନିର୍ମିତ ହୋଇଥିବା ଟୁଇନ ଟାଓ୍ବାରରେ ୯୧୫ ଫ୍ଲାଟ ରହିଛି। ଟୁଇନ ଟାୱାର ଭାଙ୍ଗିବା ପୂର୍ବରୁ ଆଖପାଖରେ ବାସ କରୁଥିବା ଲୋକଙ୍କୁ ସତର୍କତା ଅବଲମ୍ବନ କରିବାକୁ କୁହାଯାଇଛି। ପ୍ରାୟ ୭ ହଜାର ପରିବାରଙ୍କୁ ଘର ଛାଡ଼ିବାକୁ ପଡ଼ିଛି। ଏହି ଅଞ୍ଚଳର ସମସ୍ତ ରାସ୍ତାକୁ ସିଲ କରାଯାଇଛି।
୬ଟି ସୋସାଇଟିର ଲୋକଙ୍କୁ ସେମାନଙ୍କ ଘର ଟେରାସକୁ ଯିବାକୁ ବାରଣ କରାଯାଇଛି। ତେବେ ଟାୱାର ଭାଙ୍ଗିବା ପାଇଁ ଦାୟୀ କମ୍ପାନୀ ଏବଂ ବିଶେଷଜ୍ଞମାନେ କହିଛନ୍ତି ଯେ ଏହାର ଆଖପାଖରେ ଥିବା ଅଟ୍ଟାଳିକାଗୁଡ଼ିକର କୌଣସି କ୍ଷତି ହେବ ନାହିଁ।