ବମ୍ବେ: ନିଜ ସମୟର ସଫଳ ଅଭିନେତ୍ରୀଙ୍କ ମଧ୍ୟରୁ ଜଣେ ଥିଲେ ଟ୍ବିଙ୍କଲ ଖନ୍ନା। ‘ବରସାତ’ ଚଳଚ୍ଚିତ୍ରରୁ କ୍ୟାରିୟର ଆରମ୍ଭ କରି ଅନେକ ହିଟ୍ ଫିଲ୍ମ ଭେଟି ଦେଇଛନ୍ତି ସେ। ତାଙ୍କର ଶେଷ ଚଳଚ୍ଚିତ୍ର ଥିଲା ‘ଲଭ୍ କେ ଲିଏ କୁଛ ଭି କରେଗା’। ୨୦୦୧ରେ ବଲିଉଡ୍ ଅଭିନେତା ଅକ୍ଷୟ କୁମାରଙ୍କୁ ବିବାହ କରିବା ପରେ ସେ ଅଭିନୟରୁ ଦୂରେଇ ଯାଇ ପରିବାରକୁ ଗୁରୁତ୍ୱ ଦେଉଛନ୍ତି। ହେଲେ ତାଙ୍କ ଜୀବନରେ ଏପରି ଜଣେ ବ୍ୟକ୍ତି ଥିଲେ ଯିଏ କି ତାଙ୍କୁ ଏକତରଫା ପ୍ରେମ କରୁଥିଲେ। ସେ ଆଉ କେହି ନୁହନ୍ତି ବରଂ ଲୋକପ୍ରିୟ ଫିଲ୍ମନିର୍ମାତା କରନ୍ ଜୋହର। ସେ ଅଭିନେତ୍ରୀଙ୍କୁ ହୃଦୟ ଦେଇ ବସିଥିଲେ। ନିଜେ ଟ୍ବିଙ୍କଲ ଏହି କଥା ଉପରୁ ପରଦା ଉଠାଇଛନ୍ତି।
‘ମିସେସ୍ ଫନିବୋନ୍ସ’ ପୁସ୍ତକ ଉନ୍ମୋଚନ ସମୟରେ ଟ୍ବିଙ୍କଲ କହିଥିଲେ, କରନ୍ ତାଙ୍କୁ ହୃଦୟର କଥା କହିଥିଲେ। ସେ ତାଙ୍କୁ ଭଲ ପାଆନ୍ତି ବୋଲି କହିଥିଲେ। କରନ୍ ସବୁବେଳେ ତାଙ୍କ ଓଠ ଉପରେ ଥିବା ଚୁଟିକୁ ଦେଖୁଥିଲେ। ଏହା ସୁନ୍ଦର ବୋଲି ସେ କହିବା ସହ ତାଙ୍କୁ ନିଶ ପସନ୍ଦ ବୋଲି କହିଥିଲେ।
ଅପରପକ୍ଷେ କରନ୍ ମଧ୍ୟ ଟ୍ବିଙ୍କଲଙ୍କୁ ପସନ୍ଦ କରୁଥିବା ସ୍ପଷ୍ଟ କରିଛନ୍ତି। ତାଙ୍କ ଜୀବନରେ ସେ ଏକମାତ୍ର ଏପରି ମହିଳା ଥିଲେ ଯାହାଙ୍କୁ ସେ ଭଲ ପାଉଥିଲେ। ଉଭୟ ଭଲ ବନ୍ଧୁ ଥିଲେ। ଅନେକ ସମୟରେ ନିଜ ସ୍କୁଲରୁ ଖସି ଆସି ଟ୍ବିଙ୍କଲଙ୍କୁ ଭେଟୁଥିଲେ କରନ୍।
ପିଲାଦିନରୁ ବନ୍ଧୁ ଥିବା ସତ୍ତ୍ୱେ ଟ୍ବିଙ୍କଲ କରନ୍ଙ୍କ ଡେବ୍ୟୁ ଫିଲ୍ମ କରିବାକୁ ମନା କରିଦେଇଥିଲେ। ସେତେବେଳେ କରନ୍ ଟ୍ବିଙ୍କଲଙ୍କୁ ‘ଟିନା’ ଭୂମିକା ଦେଇଥିଲେ। ହେଲେ ସେ ସଫାସଫା ମନା କରିଦେଇଥିଲେ। ଫଳରେ ପୁଣି ଥରେ ତାଙ୍କର ହୃଦୟ ଭାଙ୍ଗିଥିଲେ ବୋଲି କରନ୍ କହିଥିଲେ।
