ୱାଶିଂଟନ,୧୨ ।୧୧: ଟୁଇଟରର ଚଢେଇ ସାରା ବିଶ୍ୱର ମୁଣ୍ଡକୁ ବିଗାଡିବାରେ ଲାଗିଛି । ଟୁଇଟରର ନୂଆ ମାଲିକ ଏଲନ ମସ୍କ ଶୁକ୍ରବାର ଏକ ବଡ ନିଷ୍ପତ୍ତି ନେଇଛନ୍ତି ଯାହା ଏବେ ପୁଣି ଚର୍ଚ୍ଚାକୁ ଆସିଛି । ରିପୋର୍ଟ ଅନୁଯାୟୀ, କମ୍ପାନୀ ଚଳିତ ସପ୍ତାହ ଆରମ୍ଭରେ କରିଥିବା ୮ ଡଲାର ବାଲା ବ୍ଲୁ ଟିକ ସବସ୍କ୍ରିପଶନକୁ ଫେରାଇ ନେଇଛି । କମ୍ପାନୀର ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ପ୍ରୋଗ୍ରାମକୁ ଲଞ୍ଚ କରିବା ପରେ ଫେକ ଆକାଉଣ୍ଟ ସଂଖ୍ୟା ଦ୍ରୁତ ଗତିରେ ବଢିବାରେ ଲାଗିଲା । ଏହାକୁ ଦେଖି କମ୍ପାନୀ ଏହି ପ୍ରୋଗାମକୁ କ୍ୟାନସେଲ କରିବାକୁ ନିଷ୍ପତ୍ତି ନେଲା । ହେଲେ ଟୁଇଟରରେ ଆକାଉଣ୍ଟ ଥିବା ବ୍ୟକ୍ତିଙ୍କ ପାଇଁ ଏବେବି ଏହି ସୁବିଧା ରହିବ ।
ସୂଚନାଯୋଗ୍ୟ, ବ୍ଲୁ ଟିକ ସବସ୍କ୍ରିପଶନ ପ୍ରୋଗ୍ରାମ ଆରମ୍ଭ ହେବା ପରଠାରୂ ଫେକ ଆକାଉଣ୍ଟ ସଂଖ୍ୟା ଦ୍ରୁତ ଗତିରେ ବଢିବାରେ ଲାଗିଥିଲା । ହେଲେ କମ୍ପାନୀ ଏଥିପ୍ରତି ନଜର ଦେଇ ନ ଥିଲା କି ଏହାଦ୍ୱାରା କମ୍ପାନୀର କିଛି କ୍ଷତି ହୋଇ ନ ଥାଆନ୍ତା । ହେଲେ ଏହି ଫେକ ଆକାଉଣ୍ଟରେ ଏମିତି ସବୁ ଟୁଇଟ କରାଗଲା ଯାହାକୁ ଦେଖିବା ପରେ ଟୁଇଟର ବ୍ଲୁ ଟିକ୍ ସବସ୍କ୍ରିପଶନକୁ ବନ୍ଦ କରିବାକୁ ବାଧ୍ୟ ହେଲା । ଯେମିତି ଜଣେ ବ୍ୟକ୍ତି ଟେଲସା ଇଙ୍କର ଫେକ ଆକାଉଣ୍ଟ କରି କମ୍ପାନୀର ସୁରକ୍ଷା ରେକର୍ଡର ମଜାକ ଉଡାଇଲେ । ଅନ୍ୟଜଣେ ୟୁଜର ଜଣାଶୁଣା ଫାର୍ମା କମ୍ପାନୀ ଏଲି ଲିଲି ଆଣ୍ଡ କ୍ମମ୍ପାନୀ ଭାବେ ଭେରିଫାଏ କରିବା ପରେ ଟୁଇଟ କଲେ ଇନସୁଲିନ ଏବେ ମାଗଣାରେ । ଏସବୁ ଦେଖିବା ପରେ ଟୁଇଟର ତା’ର ନିଷ୍ପତ୍ତିରେ ପରିବର୍ତ୍ତନ କଲା ।
