ନୂଆଦିଲ୍ଲୀ,୨୪।୨: ଗୁଜରାଟର ଅହମ୍ମଦାବାଦ ସ୍ଥିତ ବିଶ୍ୱର ସର୍ବବୃହତ୍ କ୍ରିକେଟ ଷ୍ଟାଡିୟମକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନାମରେ ନାମିତ କରାଯାଇଛି। ୧.୩୨ ଲକ୍ଷ ଦର୍ଶକଙ୍କ କ୍ଷମତା ବିଶିଷ୍ଟ ଷ୍ଟାଡିୟମର ନାମ ଏବେ ଠାରୁ ନରେନ୍ଦ୍ର ମୋଦି ଷ୍ଟାଡିୟମ ଭାବେ ଜଣାଯିବ। ଭାରତ-ଇଂଲଣ୍ଡ ଟେଷ୍ଟ ସିରିଜ୍ର ୩ୟ ଓ ୪ର୍ଥ ଟେଷ୍ଟ ମ୍ୟାଚ୍ ଖେଳାଯିବାକୁ ଥିବା କ୍ରିକେଟ ଏରିନାକୁ ଉଦ୍ଘାଟନ କରିଥିଲେ ରାଷ୍ଟ୍ରପତି ରାମନାଥ କୋବିନ୍ଦ। ଏହି ଅବସରରେ ଉପସ୍ଥିତ ଥିଲେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ ଓ କ୍ରୀଡ଼ା ମନ୍ତ୍ରୀ କିରନ ରିଜୁଜି।
ଉଦ୍ଘାଟନ ପରେ ଦୁଇ ଭାଗ ହୋଇଯାଇଛନ୍ତି ସୋସିଆଲ ମିଡିଆର ୟୁଜର୍ସ। କଂଗ୍ରେସ ସର୍ମଥକ ବିରୋଧ କରୁଥିବାବେଳେ ଭାଜପା ଫ୍ୟାନ୍ସ ବିଶ୍ୱର ସବୁଠୁ ବଡ଼ ଷ୍ଟାଡିୟମ ପ୍ରଧାନମନ୍ତ୍ରୀ ମୋଦିଙ୍କ ନାମରେ ନାମିତ କରାଯିବା ଉଚିତ ବୋଲି କହିଛନ୍ତି। ଜଣେ ୟୁଜର ଲେଖିଛନ୍ତି, ମୋଦିଙ୍କ ଜୀବନରୁ ପ୍ରେରଣା ନେଇ ମୋଟେରା ଷ୍ଟଡିୟମ ପ୍ରଧାନମନ୍ତ୍ରୀଙ୍କ ନାମରେ ନାମିତ କରାଯାଇଛି। ଏହା ଅହଙ୍କାରର ପରିଣତି। ମୋଦି ବିଶ୍ୱର ପ୍ରଥମ ବ୍ୟକ୍ତି, ମୃତ୍ୟୁ ପୂର୍ବରୁ ଯାହାଙ୍କ ନାମରେ ସର୍ବସାଧାରଣ ସମ୍ପତ୍ତି ନାମକରଣ କରାଯାଇଛି। ଆଉ ଜଣେ ଭାଜପା ସମର୍ଥକ ଟୁଇଟ୍ କରିଛନ୍ତି, ” ମୋଟେରା ଷ୍ଟାଡିୟମ ନାମକରଣକୁ ବିରୋଧ କଲାବେଳେ ଯେମିତି ଭୁଲି ନ ଯିବା ଦେଶର ସର୍ବୋଚ୍ଚ କ୍ରୀଡ଼ା ସମ୍ମାନ ରାଜୀବ ଗାନ୍ଧୀ (ରାଜୀବ ଗାନ୍ଧୀ ଖେଳରତ୍ନ)ଙ୍କ ନାମରେ ଅଛି। ଦେଶରେ ଅଗଣିତ ଷ୍ଟାଡିୟମର ନାମକରଣ ପୂର୍ବତନ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ଓ ଇନ୍ଦିରା ଗାନ୍ଧୀଙ୍କ ନାମରେ କରାଯାଇଛି। ମୋଦି ଅତିକମ୍ରେ ଗୁଜରାଟ କ୍ରିକେଟ ଆସୋସିଏଶନ ସଭାପତି ଥିଲେ। “