ଲଣ୍ଡନ,୬।୯: ଚଳିତ ଓଭାଲ ଟେଷ୍ଟର ଉଭୟ ଇନିଂସରେ ଅର୍ଦ୍ଧଶତକୀୟ ପାଳି ଖେଳିଛନ୍ତି ଭାରତୀୟ ଅଲରାଉଣ୍ଡର ଶାର୍ଦ୍ଦୁଳ ଠାକୁର। ପ୍ରଥମ ଇନିଂସରେ ବିସ୍ଫୋରକ ୫୭ ରନ୍ର ପାଳି ଖେଳିଥିବା ମୁମ୍ବାଇ ଖେଳାଳି ଦ୍ୱିତୀୟ ୬୦ ରନ୍ର ଇନିଂସ ଖେଳିଥିଲେ। ଚମତ୍କାର ବ୍ୟାଟିଂ ପ୍ରଦର୍ଶନ ଯୋଗୁ ୨୯ ବର୍ଷୀୟ ଅଲରାଉଣ୍ଡରଙ୍କ ନୂଆ ନାମ ଦେଇଛନ୍ତି ପ୍ରଶଂସକ, ଯାହା ଏବେ ଟୁଇଟରରେ ଟ୍ରେଣ୍ଡିଂ ପାଲଟିଛି। ଏପରି କି ପୂର୍ବତନ କ୍ରିକେଟରମାନେ ମଧ୍ୟ ଶାର୍ଦ୍ଦୁଳଙ୍କୁ ନୂଆ ନାମକୁ ଉଲ୍ଲେଖ କରି ପ୍ରଶଂସା କରିଛନ୍ତି।
ପୂର୍ବତନ ଓପନର ବୀରେନ୍ଦ୍ର ସେହ୍ବାଗ ଲେଖିଛନ୍ତି, ମଧ୍ୟକ୍ରମର ବ୍ୟାଟ୍ସମାନଙ୍କୁ କେଉଁ ଭଳି ଖେଳିବାକୁ ହୁଏ, ତାହା ଦେଖାଉଛନ୍ତି ଲର୍ଡ ଶାର୍ଦ୍ଦୁଳ। ୬୦ ରନ୍ର ପାଳି ଚମତ୍କାର ଥିଲା। ଗୁରୁଦିବସରେ ଏହା ଠୁ ବଡ଼ ଉପହାର ଆଉ କ’ଣ ହେବ। ସେହିଭଳି ଲର୍ଡ ଶାର୍ଦ୍ଦୁଳ ଯେତେବେଳେ ବି ଆସନ୍ତି, ମ୍ୟାଚ୍କୁ ବଦଳି ରଖି ଦିଅନ୍ତି ବୋଲି ଟୁଇଟ୍ କରିଛନ୍ତି ପୂର୍ବତନ ବ୍ୟାଟ୍ସମ୍ୟାନ ଓ୍ବାସିମ ଜାଫର। ଉଲ୍ଲେଖଯୋଗ୍ୟ, ଉଭୟ ଇନିଂସରେ ଅର୍ଦ୍ଧଶତକୀୟ ଇନିଂସ ଖେଳିଥିବା ଶାର୍ଦ୍ଦୁଳ ପ୍ରଥମ ଇନିଂସରେ ଇଂଲଣ୍ଡ ପାଇଁ ସବୁଠୁ ଅଧିକ ରନ୍ କରିଥିବା ଓଲି ପୋପଙ୍କୁ ଆଉଟ୍ କରିଥିଲେ।
