ଓ୍ବାଶିଂଟନ୍, ୧୨ା୫: କରୋନା ମୁକାବିଲାରେ ଭାରତକୁ ସହାୟତା କରିବାକୁ ୧୫ ମିଲିୟନ ଆମେରିକୀୟ ଡଲାର(ପ୍ରାୟ ୧୧୦,୨୨,୧୭,୨୫୦ ଟଙ୍କା) ଦାନ କରିଛି ମାଇକ୍ରୋବ୍ଲଗିଂ ସାଇଟ୍ ଟୁଇଟର। ଏ ନେଇ ଟୁଇଟର ସିଇଓ ଜ୍ୟାକ୍ ପାଟ୍ରିକ୍ ଡୋର୍ସେ ସୋମବାର ଟୁଇଟ୍ କରି ସୂଚନା ଦେଇଛନ୍ତି। ୩ ବେସରକାରୀ ସଂସ୍ଥା କେୟାର, ଆସୋସିଏଶନ୍ ଫର୍ ଇଣ୍ଡିଆସ୍ ଡେଭଲପମେଣ୍ଟ (ଏଡ୍ ଇଣ୍ଡିଆ) ଏବଂ ସେବା ଇଣ୍ଟରନ୍ୟାଶନାଲ ୟୁଏସ୍ଏକୁ ଏହି ଟଙ୍କା ପ୍ରଦାନ କରିଥିବା ସେ କହିଛନ୍ତି। କେୟାରକୁ ୭୩.୪୪ କୋଟି ଏବଂ ଏଡ୍ ଇଣ୍ଡିଆ ଓ ସେବା ଇଣ୍ଟରନ୍ୟାଶନାଲ ୟୁଏସ୍ଏକୁ ୧୮.୩୬ କୋଟି ଲେଖାଏଁ ସହାୟତା ଦେଇଛି ଟୁଇଟର। ସାନ୍ ଫ୍ରାନ୍ସିସ୍କୋରେ ଥିବା ହିନ୍ଦୁ ସଙ୍ଗଠନ ସେବା ଇଣ୍ଟରନ୍ୟାଶନାଲ ଏହି ଅର୍ଥକୁ ଭାରତରେ କୋଭିଡ୍ ମୁକାବିଲା ନିମନ୍ତେ ଆବଶ୍ୟକ ଭେଣ୍ଟିଲେଟର, ବେଡ୍ ସହ ଅନ୍ୟାନ୍ୟ ଚିକିତ୍ସା ଉପକରଣ ବିଭିନ୍ନ ହସ୍ପିଟାଲକୁ ପ୍ରଦାନ କରାଯିବ ବୋଲି ଏକ ବିବୃତିରେ କହିଛି। ସେହିପରି ଅତ୍ୟାବଶ୍ୟକ ମେଡିକାଲ ଉପକରଣ, ଅକ୍ସିଜେନ, ସ୍ବାସ୍ଥ୍ୟକର୍ମୀଙ୍କ ନିମନ୍ତେ ପିପିଇ କିଟ୍, ଦୁର୍ବଳ ବର୍ଗର ଲୋକଙ୍କୁ ଚିକିତ୍ସା ପ୍ରଦାନ ଆଦି ସହାୟତା ଭାରତକୁ ଦିଆଯିବା ନିମନ୍ତେ ଏହି ଅର୍ଥ ଖର୍ଚ୍ଚ କରାଯିବ ବୋଲି କେୟାର ଏବଂ ଏଡ୍ ଇଣ୍ଡିଆ ପକ୍ଷରୁ କୁହାଯାଇଛି।
