ନୂଆଦିଲ୍ଲୀ, ୮।୧୧: ସୋସିଆଲ ମିଡିଆ ଜାଏଣ୍ଟ କୁହାଯାଉଥିବା ଟୁଇଟରର ମାଲିକାନା ବିଶ୍ୱର ସବୁଠୁ ଧନୀ ଏଲନ ମସ୍କଙ୍କ ହାତକୁ ଚାଲିଯିବା କମ୍ପାନୀ କର୍ମଚାରୀଙ୍କ ପାଇଁ ଏକ ଘୋର ବିପତ୍ତି ଆଣି ଦେଇଥିବା କହିବା କୌଣସି କ୍ଷେତ୍ରରେ ଭୁଲ ହେବନାହିଁ। ବର୍ତ୍ତମାନ ସୁଦ୍ଧା ଟୁଇଟର ଇଣ୍ଡିଆରୁ ୯୦% କର୍ମଚାରୀଙ୍କୁ କମ୍ପାନୀ ବାହାର କରିସାରିଛି। ଟୁଇଟର ଇଣ୍ଡିଆରେ ଏବେ ୧୨ଜଣ କର୍ମଚାରୀ ଥିବାବେଳେ ଏହାର ପ୍ରଡକ୍ଟ ଏବଂ ଇଞ୍ଜିନିୟରିଂ ଟିମ୍ରୁ ପ୍ରାୟ ୭୦% କର୍ମଚାରୀଙ୍କୁ ଛଟେଇ କରାଯାଇଛି। ପର୍ବରୁ କମ୍ପାନୀରେ ୨୦୦ ଭାରତୀୟ କର୍ମଚାରୀ କାମ କରୁଥିଲେ। ଭାରତ ରାଜଧାନୀ ଦିଲ୍ଲୀ, ମୁମ୍ବାଇ ଓ ବେଙ୍ଗାଲୁରୁରେ ଟୁଇଟରର ତିନିଟି ବ୍ରାଞ୍ଚ କାର୍ଯ୍ୟ କରୁଛି।
ଭାରତରେ ଗ୍ଲୋବାଲ ଇଣ୍ଟରନେଟ୍ କମ୍ପାନୀ ଗୁଗଲ, ମେଟା ଓ ଟୁଇଟର ବେଶ୍ ଆଦୃତ ଲାଭ କରିଛି। ୟୁଜର୍ସମାନଙ୍କ ଗୋପନୀୟତାକୁ ନେଇ ଏହି କମ୍ପାନୀଗୁଡ଼ିକ ଉପରେ କେନ୍ଦ୍ର ସରକାରଙ୍କ ପକ୍ଷରୁ ବହୁ ନିୟମ ଲାଗୁ କରାଯାଇଛି। ବର୍ତ୍ତମାନ ଟୁଇଟର କମ୍ପାନୀର ମାର୍କେଟ ଭାଲ୍ୟୁ ଉପରେ ନକାରାତ୍ମକ ପ୍ରଭାବ ବଡ଼ିଥିବାବେଳେ ୟୁଜରଙ୍କ ପ୍ରତି ଟୁଇଟର ରେସ୍ପଣ୍ଡ ମଧ୍ୟ କମିଯାଇଛି। କାଲିଫର୍ନିଆ ସାନ୍-ଫ୍ରାନ୍ସିସ୍କୋରେ ଥିବା ଏହାର ମୁଖ୍ୟାଳୟରେ ୫୦%ରୁ ଊର୍ଦ୍ଧ୍ୱ କର୍ମଚାରୀ ବିଦା ହୋଇସାରିଲେଣି। ମୋଟ ଉପରେ ଟୁଇଟରରେ ବର୍ତ୍ତମାନ ୩,୭୦୦ କର୍ମଚାରୀ କାମ କରୁଛନ୍ତି।