ନ୍ୟୁୟର୍କ,୨୫।୪: ବିଶ୍ୱର ଧନଶାଳୀ ବ୍ୟକ୍ତି ତଥା ବୈଦ୍ୟୁତିକ କାର୍ କମ୍ପାନୀ ଟେସ୍ଲାର ସିଇଓ ଏଲନ୍ ମସ୍କ ଖୁବ୍ଶୀଘ୍ର ମାଇକ୍ରୋବ୍ଲଗିଙ୍ଗ ସାଇଟ ଟୁଇଟରର ନୂଆ ମାଲିକ ହୋଇପାରନ୍ତି। ଏଲନ୍ ମସ୍କ ଟୁଇଟର୍ର ଗୋଟିଏ ଶେୟାର ବଦଳରେ ୫୪.୨୦ ଡଲାର ବା ୪ହଜାର୧୫୨ ଟଙ୍କା ଦେବେ ବୋଲି ଅଫର ଦେଇଥିଲେ। ତେବେ ସୋମବାର ସୋସିଆଲ ମିଡିଆ କମ୍ପାନୀ ଟୁଇଟର ମସ୍କଙ୍କ ଏହି ସର୍ବୋତ୍ତମ ଓ ଅନ୍ତିମ ଅଫରକୁ ଗ୍ରହଣ କରିଥିବା ଜଣାପଡ଼ିଛି। ରୟେଟର୍ସର ରିପୋର୍ଟ ଅନୁଯାୟୀ ଟୁଇଟରର ପରିଚାଳନା ବୋର୍ଡ ମସ୍କଙ୍କର ଏଭଳି ପ୍ରସ୍ତାବକୁ ଗ୍ରହଣ କରିଛି। କିନ୍ତୁ ଏଲନ୍ ମସ୍କ କିମ୍ବା ଟୁଇଟର ଏନେଇ ବର୍ତ୍ତମାନ ସୁଦ୍ଧା କୌଣସି ଆନୁଷ୍ଠାନିକ ଘୋଷଣା କରିନାହାନ୍ତି। ସୂଚନା ମୁତାବକ, ଟୁଇଟର କୌଣସି ବି ମୁହୁର୍ତ୍ତରେ ୪୩ ବିଲିୟନ ଡଲାର ବା ୩ଲକ୍ଷ ୨୫ ହଜାର କୋଟି ଟଙ୍କାର ଏହି ଡିଲ୍କୁ ସବୁଜ ସଙ୍କେତ ଦେଇପାରେ। ଅନ୍ୟପଟେ ଶେଷ ସମୟରେ ଏହି ଡିଲ୍ ଭାଙ୍ଗିଯିବାର ମଧ୍ୟ ସମ୍ଭାବନା ରହିଛି ବୋଲି ବିଶେଷ ସୂତ୍ରରୁ ସୂଚନା ମିଳିଛି। ଟୁଇଟରକୁ କିଣିବା ପାଇଁ ୪୬.୦୫ ଅରବ ଡଲାର ପାଣ୍ଠିର ବ୍ୟବସ୍ଥା କରିସାରିଛନ୍ତି ବୋଲି ପୂର୍ବରୁ ଏଲନ ମସ୍କ କହିଥିଲେ। ସୂଚନାଯୋଗ୍ୟ, ପୂର୍ବରୁ ମସ୍କ ଟୁଇଟରର ୯.୨ଅଂଶ କିଣିସାରିଛନ୍ତି।