ମୁମ୍ବାଇ, ୨୫।୪- ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ର ଚଳିତ ସଂସ୍କରଣରେ ଗ୍ଲେନ୍ ମ୍ୟାକ୍ସଓ୍ବେଲଙ୍କ ପ୍ରଦର୍ଶନରେ ଖୁବ୍ ପ୍ରଭାବିତ ହୋଇଛନ୍ତି ପୂର୍ବତନ ଭାରତୀୟ ଅଧିନାୟକ ସୁନୀଲ ଗାଭାସ୍କର। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଦଳରେ ଏବେ ୨ ଜଣ ୩୬୦ ଡିଗ୍ରୀ ଖେଳାଳି ବୋଲି ସେ ପ୍ରକାଶ କରିଛନ୍ତି। ବିପକ୍ଷ ଦଳର ବୋଲରମାନେ ଯେତେଯାହା କଲେ କରନ୍ତୁ, ସେମାନଙ୍କୁ ୨ ଜଣ ୩୬୦ ଡିଗ୍ରୀ ଖେଳାଳିଙ୍କୁ ବୋଲିଂ କରିବାକୁ ହେବ ବୋଲି ସେ କହିଛନ୍ତି। ଚଳିତ ଆଇପିଏଲରେ ଆରସିବି ଏ ପର୍ଯ୍ୟନ୍ତ ଚମତ୍କାର ପ୍ରଦର୍ଶନ କରିଆସିଛି। ଖେଳିଥିବା ୪ଟି ଯାକ ମ୍ୟାଚରେ ବିଜୟୀ ହୋଇଛି। ମ୍ୟାକ୍ସଓ୍ବେଲଙ୍କୁ ସାମିଲ କରିବା ବିରାଟ କୋହଲିଙ୍କ ଦଳ ପାଇଁ ବଢ଼ିଆ କାମ ଦେଇଛି। ଗତ ସିଜନରେ ୧୩ଟି ମ୍ୟାଚରେ ୧୦୮ ରନ କରିଥିବା ଏହି ଅଷ୍ଟ୍ରେଲୀୟ ଖେଳାଳି ଚଳିତ ସିଜନରେ ୩ ଇନିଂସରେ ୩୯, ୫୯ ଓ ୭୮ ରନ କରି ତାହାକୁ ଟପି ଯାଇଛନ୍ତି। ଆରସିବିର ପ୍ରଥମ ୩୬୦ ଡିଗ୍ରୀ ଖେଳାଳି ହେଲେ ଏବି ଡି’ଭିଲର୍ସ। ତାଙ୍କ ପରି ରିଭର୍ସ ସୁଇପ୍, ସ୍କୁପ୍ସ, ସୁଇଚ୍ ହିଟ୍ ଶଟ୍କୁ ମ୍ୟାକ୍ସଓ୍ବେଲ ଅତି ଦକ୍ଷତାର ସହ ଖେଳି ପାରୁଛନ୍ତି। ତେଣୁ ତାଙ୍କୁ ଚଳିତ ସିଜନରେ ରୋକିବା କଷ୍ଟକର ହୋଇପଡ଼ିବ ବୋଲି ଗାଭାସ୍କର କହିଛନ୍ତି। ମ୍ୟାକ୍ସଓ୍ବେଲ ଭଲ ଫର୍ମରେ ଥିବାରୁ ବିରାଟ ଏବଂ ଡି’ଭିଲର୍ସଙ୍କ ଉପରୁ ଚାପ କମାଇ ପାରିଛନ୍ତି। ଆରସିବି ଜଣେ ଏଭଳି ବ୍ୟାଟ୍ସମ୍ୟାନଙ୍କୁ ଆବଶ୍ୟକ କରୁଥିଲା। ପ୍ରକୃତରେ ମ୍ୟାକ୍ସଓ୍ବେଲ ଅବିଶ୍ୱସନୀୟ ପ୍ରଦର୍ଶନ କରୁଛନ୍ତି ବୋଲି ସେ କହିଛନ୍ତି। ସନ୍ରାଇଜର୍ସ ହାଇଦ୍ରାବାଦ ଏବଂ କୋଲକାତା ନାଇଟ ରାଇଡର୍ସ ବିପକ୍ଷରେ ମ୍ୟାକ୍ସଓ୍ବେଲ କ୍ରମାଗତ ୨ ଅର୍ଦ୍ଧଶତକ ହାସଲ କରିଛନ୍ତି। ଫଳରେ ଡେଥ୍ ଓଭରରେ ସେ ଦଳକୁ ଅନେକ ସହାୟକ ହୋଇ ପାରୁଛନ୍ତି। ଡି’ଭିଲର୍ସ ମଧ୍ୟ ଚମତ୍କାର ଖେଳୁଛନ୍ତି। ଟପ୍ ଅର୍ଡରରେ କ୍ଲାସିକାଲ ଖେଳାଳି ବିରାଟ ଓ ଦେବଦତ୍ତ ପଡିକାଲ ଦକ୍ଷତା ଦେଖାଇଛନ୍ତି। ଫଳରେ ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚରେ ଦଳ ୧୦ ଉଇକେଟରେ ବିଜୟୀ ହୋଇ ପାରିଛି। ଡି’ଭିଲର୍ସ ଓ ମ୍ୟାକ୍ସଓ୍ବେଲଙ୍କ ଉପସ୍ଥିତିରେ ଦଳ ଶେଷ ୭-୮ ଓଭରରେ ଭଲ ରନ କରିପାରୁଛି ବୋଲି ଗାଭାସ୍କର ପ୍ରକାଶ କରିଛନ୍ତି।
