ବାରିପଦା,୧୨ା୯(ନୀଳାଦ୍ରି ବିହାରୀ ଦଣ୍ଡପାଟ): ମୟୂରଭଞ୍ଜ ଜିଲା ସ୍ବତନ୍ତ୍ର ଉନ୍ନୟନ ପରିଷଦ ପକ୍ଷରୁ ଆୟୋଜିତ ‘ଆଦିରନ’ ମାରାଥନ କାର୍ଯ୍ୟକ୍ରମରେ ଟି-ଶାର୍ଟ ପିନ୍ଧି ଜିଲାର ଦୁଇ ପ୍ରଶାସନିକ ଅଧିକାରୀ ଅଡୁଆରେ ପଡ଼ିଛନ୍ତି। ଜିଲାପାଳ ବିନୀତ ଭରଦ୍ୱାଜ ଓ ଏସ୍ପି ବି.ଗଙ୍ଗାଧର ପିନ୍ଧିଥିବା ଟି-ଶାର୍ଟରେ ନବୀନ ପଟ୍ଟନାୟକଙ୍କ ଫଟୋ ଥିବାକୁ ନେଇ ଏମ୍ପି ଅପରାଜିତା ଷଡ଼ଙ୍ଗୀ ପ୍ରତିବାଦ ଜଣାଇଛନ୍ତି। ଉଚ୍ଚପଦସ୍ଥ ସରକାରୀ ଅଧିକାରୀ ହୋଇ ନୀତିନିୟମକୁ ଉଲ୍ଲଂଘନ କରି ଦଳୀୟ କାର୍ଯ୍ୟକ୍ରମ ସଦୃଶ ମଞ୍ଚରେ ଉପସ୍ଥିତ ରହିବା ଦୁର୍ଭାଗ୍ୟଜନକ ବୋଲି ଅପରାଜିତା ଏକ୍ସ(ଟୁଇଟ୍) ଯୋଗେ ରି-ପୋଷ୍ଟ କରିଛନ୍ତି। ତେବେ ଏହା ଏକ ସରକାରୀ କାର୍ଯ୍ୟକ୍ରମ ଥିଲା ବୋଲି ଜିଲାପାଳ ଭରଦ୍ୱାଜ ମତ ପ୍ରକାଶ କରିଛନ୍ତି ା
ଯେ, ରବିବାର ବାରିପଦାରେ ଆଦିବାସୀଙ୍କ ବିକାଶ ନିମନ୍ତେ ସ୍ବତନ୍ତ୍ର ଉନ୍ନୟନ ପରିଷଦ ପକ୍ଷରୁ ‘ଆଦିରନ’ ମାରାଥନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ମଞ୍ଚରେ ହକି ଇଣ୍ଡିଆର ସଭାପତି ଦିଲୀପ ତିର୍କୀ, ସ୍କୁଲ ଓ ଗଣଶିକ୍ଷା ମନ୍ତ୍ରୀ ସୁଦାମ ମାରାଣ୍ଡି, ମହିଳା ଓ ଶିଶୁ ବିକାଶ ତଥା ମିଶନଶକ୍ତି ମନ୍ତ୍ରୀ ବାସନ୍ତୀ ହେମ୍ବ୍ରମ, ରାଜ୍ୟ ସ୍ବତନ୍ତ୍ର ଉନ୍ନୟନ ପରିଷଦର ଉପଦେଷ୍ଟା ପ୍ରଦୀପ ମାଝୀ, ରାଜ୍ୟ ସଭା ସଦସ୍ୟା ମମତା ମହାନ୍ତ, ମୋରଡ଼ା ବିଧାୟକ ରାଜକିଶୋର ଦାସ, ରାଜ୍ୟ ଜାତି, ଜନଜାତି ଓ ସଂଖ୍ୟାଲଘୁ ଉନ୍ନୟନ ପରିଷଦର ଉପଦେଷ୍ଟା ସରୋଜିନୀ ହେମ୍ବ୍ରମ ପ୍ରମୁଖ ଉପସ୍ଥିତ ଥିଲେ। ଜିଲାପାଳ ଓ ଏସ୍ପି ଟି-ଶାର୍ଟ ପିନ୍ଧି ବିଜେଡି ନେତାଙ୍କ ଗହଣରେ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ଟି-ଶାର୍ଟ ପିନ୍ଧି ନେତାଙ୍କ ଗହଣରେ ଥିବା ଉଭୟ ଅଧିକାରୀଙ୍କ ଫଟୋକୁ ଜଣେ ବ୍ୟକ୍ତି ଏକ୍ସ(ଟୁଇଟ୍) କରିଥିଲେ। ଏହାକୁ ଭୁବନେଶ୍ୱର ଏମ୍ପି ଅପରାଜିତା ଷଡ଼ଙ୍ଗୀ ରିପୋଷ୍ଟ କରି ଏହା ଏକ ଦୁର୍ଭାଗ୍ୟଜନକ ବୋଲି କହିଛନ୍ତି। ସରକାରୀ ଅଧିକାରୀମାନେ ନିୟମ ଉଲ୍ଲଂଘନ କରିଥିବା ନେଇ କ୍ଷୋଭ ପ୍ରକାଶ କରିଛନ୍ତି।
ସଂକ୍ରାନ୍ତରେ କଂଗ୍ରେସ ଜିଲା ସଭାପତି ହେମନ୍ତ ଦାସ କହିଛନ୍ତି, ରାଜ୍ୟରେ ଏବେ ସରକାରୀକଳ କାର୍ଯ୍ୟ କରୁଛି। ଅଧିକାରୀ ଓ କର୍ମଚାରୀମାନେ ମିଶି ଜିଲାରେ ଦରବାରୀ ଶାସନ ଚଳାଇଛନ୍ତି। ସାଢ଼େ ୫ ବଷର୍ର୍ ଧରି ଜିଲାପାଳ ଜିଲାରେ ରହି ଦଳର ଜିଲା ସଭାପତି ସାଜିଛନ୍ତି। ସେ ଚାକିରି ଛାଡ଼ି ଦଳର ନେତା ସାଜିବାକୁ ପରାମର୍ଶ ଦେବା ସହ ଏଭଳି କାର୍ଯ୍ୟକୁ ନିନ୍ଦା କରିଛନ୍ତି। ଭାଜପା ଜିଲା ଉପସଭାପତି କବି ବିଷ୍ଣୁ ଶତପଥୀ କହିଛନ୍ତି, ପ୍ରଶାସନିକ ଅଧିକାରୀମାନେ ସାମ୍ବିଧାନିକ ବିଧିବ୍ୟବସ୍ଥା ପରିଧି ମଧ୍ୟରେ ରହି ଚଳିବା ଉଚିତ। ପ୍ରଶାସନିକ କାର୍ଯ୍ୟ ଓ ଦଳୀୟ ରାଜନୀତି ଦୁଇଟି ସମ୍ପୂର୍ଣ୍ଣ ଅଲଗା। ଏହାକୁ ସମ୍ପୃକ୍ତ ଅଧିକାରୀମାନେ ବୁଝିବାର ଆବଶ୍ୟକତା ରହିଛି। ଏଭଳି କାର୍ଯ୍ୟ ଦ୍ୱାରା ସମାଜକୁ ନକାରାତ୍ମକ ସନ୍ଦେଶ ଯାଉଛି। ଏଭଳି ଅଭିଯୋଗକୁ ସ୍ବତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷ ଡା. ଦେବାଶିଷ ମାରାଣ୍ଡି ଖଣ୍ଡନ କରିଛନ୍ତି। ସେ କହିଛନ୍ତି, ଏହା ଏକ ଦଳୀୟ କାର୍ଯ୍ୟକ୍ରମ ନ ଥିଲା। ସ୍ବତନ୍ତ୍ର ଉନ୍ନୟନ ପରିଷଦର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଭାବେ ଜିଲାପାଳ ରହିଛନ୍ତି। ସାମ୍ବିଧାନିକ ଦୃଷ୍ଟିରୁ ସରକାରୀ କାର୍ଯ୍ୟକ୍ରମରେ ଜିଲାପାଳଙ୍କ ଉପସ୍ଥିତି ଆବଶ୍ୟକ ରହିଛି। ଦଳୀୟ ଚିହ୍ନ ନ ଥିଲା। ଆଦିବାସୀଙ୍କ ବିକାଶ ପାଇଁ ରାଜ୍ୟ ସରକାର ସଦାସର୍ବଦା ଚେଷ୍ଟିତ ରହିଛନ୍ତି। ବିରୋଧୀ ରାଜନୀତୀକରଣ କରି ବିକାଶ ଦିଗରେ ପ୍ରତିବନ୍ଧକ ସାଜୁଛନ୍ତି।