ପ୍ରୟାଗରାଜ,୩ ।୧୨: ଲିଭ୍ ଇନ୍ ରିଲେସନଶିପରେ ରହୁଥିବା ପ୍ରେମୀଯୁଗଳଙ୍କ ପାଇଁ ଆଶ୍ୱସ୍ତିକର ଖବର । ଆହ୍ଲାବାଦ ହାଇକୋର୍ଟ କହିଛନ୍ତି ଲିଭ୍ ଇନ୍ ରିଲେସନଶିପ ଆଇନ ସମ୍ମତ ତେଣୁ ଏଥିରେ କେହି ହସ୍ତକ୍ଷେପ କରିପାରିବେ ନାହିଁ । ଏମିତିକି ଅଭିଭାବକ ମଧ୍ୟ ଏଥିରେ ହସ୍ତକ୍ଷେପ କରିପାରିବେ ନାହିଁ । କୋର୍ଟ କହିଛନ୍ତି ଏହା ବ୍ୟକ୍ତିଙ୍କ ମୌଳିକ ଅଧିକାର, ଯାହା ସମ୍ବିଧାନର ଅନୁଚ୍ଛେଦ ୨୧ ଆଧାରରେ ଜୀବନ ଓ ସ୍ୱ୍ୱତନ୍ତ୍ରତା ଆଧାରରେ ପ୍ରାପ୍ତ ହୋଇଛି । କୋର୍ଟ ଲିଭ୍ ଇନ୍ ରିଲେସନଶିପରେ ରହୁଥିବା ଫରୁଖାବାଦର ପ୍ରେମୀ ଯୁଗଳଙ୍କୁ ସୁରକ୍ଷା ଦେବା ଓ ସେମାନଙ୍କ ଜୀବନରେ ହସ୍ତକ୍ଷେପ ନ କରିବାକୁ ନିର୍ଦ୍ଦେଶ ଦେଇଛନ୍ତି । ଫରୁଖାବାଦରେ କାମିନି ଦେବୀ ଓ ଅଜୟ କୁମାରଙ୍କ ଆବେଦନର ଶୁଣାଣି କରି କୋର୍ଟ କହିଛନ୍ତି ସୁପ୍ରିମକୋର୍ଟ ଲିଭ୍ ଇନ୍ ରିଲେସନଶିପକୁ ଦେଇ ବିସ୍ତ୍ରୁତ ବ୍ୟାଖ୍ୟା କରିଛନ୍ତି । କୋର୍ଟ କହିଛନ୍ତି ବିଶ୍ୱର ଅନ୍ୟ ଦେଶଙ୍କ ଭଳି ଆମ ଦେଶରେ ଲିଭ୍ ଇନ୍ ରିଲେସନଶିପକୁ ସାମାଜିକ ମାନ୍ୟତା ମିଳିନାହିଁ ସତ ହେଲେ ଏହା କୌଣସି ଅପରାଧ ନୁହେଁ ।