ପୁରୀ ଅଫିସ,୧୦।୭: ଶ୍ରୀକ୍ଷେତ୍ରରେ ଅନେକ ତୀର୍ଥ ପୁଷ୍କରିଣୀ ରହିଛି। ହେଲେ ଏସବୁର ରକ୍ଷଣାବେକ୍ଷଣ ଦିଗରେ ଉପଯୁକ୍ତ ଧ୍ୟାନ ଦିଆଯାଉ ନାହିଁ। ଫଳରେ ଦିନକୁ ଦିନ ଏକାଧିକ ତୀର୍ଥ ପୁଷ୍କରିଣୀର ସ୍ଥିତି ଦୟନୀୟ ହୋଇପଡୁଛି। ସେହିପରି ପାର୍ବତୀ ସାଗର ପାଚେରି ଭୁଶୁଡ଼ିବା ଇତିମଧ୍ୟରେ ଅଢେଇ ବର୍ଷରୁ ଊର୍ଦ୍ଧ୍ୱ ସମୟ ବିତିଲାଣି, ମାତ୍ର ଏ ପର୍ଯ୍ୟନ୍ତ ଏହାକୁ ତିଆରି କରାଯାଉ ନାହିଁ। ମୁକୁଳା ପଡ଼ିିଛି ପ୍ରାୟ ୧୦୦ ଫୁଟର ପାଚେରି। ଏଭଳି ଭାବେ ଶ୍ରୀକ୍ଷେତ୍ରର ଅନେକ ପୁଷ୍କରିଣୀର ଅବସ୍ଥା ଶୋଚନୀୟ ହୋଇପଡ଼ିଛି। କାହାର ପାଚେରି ଭାଙ୍ଗିଛି ତ ଆଉ କାହାର ପାଚେରି ଦୁର୍ବଳ ହୋଇପଡ଼ିଛି। ଭଙ୍ଗା ପାଚେରି ଯୋଗୁ ଅଳିଆ ଆବର୍ଜନା ଏବଂ ବାହାର ପାଣି ପଶି ଅନେକ ପୁଷ୍କରିଣୀ ପ୍ରଦୂଷିତ ହୋଇପଡ଼ିଛି।
ପୁରୀକୁ ପ୍ରତିଦିନ ହଜାର ହଜାର ଭକ୍ତ ଓ ପର୍ଯ୍ୟଟକ ଆସିଥାନ୍ତି। ଶ୍ରୀମନ୍ଦିର ଏବଂ ବେଳାଭୂମି ପରେ ଅନେକ ଶ୍ରୀକ୍ଷେତ୍ରର ବିଭିନ୍ନ ତୀର୍ଥ ପୁଷ୍କରିଣୀକୁ ବୁଲି ଦେଖିଥାନ୍ତି। କିନ୍ତୁ ଏକାଧିକ ତୀର୍ଥ ପୁଷ୍କରିଣୀଗୁଡ଼ିକର ଅବସ୍ଥା ଦୟନୀୟ ଅବସ୍ଥାରେ ରହିଛି। ସେଥିମଧ୍ୟରୁ ପାର୍ବତୀ ସାଗର ଅନ୍ୟତମ। ପ୍ରସିଦ୍ଧ ଶୈବପୀଠ ଶ୍ରୀଲୋକନାଥ ମନ୍ଦିରକୁ ଲାଗିରହିଛି ପାର୍ବତୀ ସାଗର। ସୁଉଚ୍ଚ ପାଚେରି ଦ୍ୱାରା ଏହା ପରିବେଷ୍ଟିତ। ଲୋକନାଥ ମନ୍ଦିରକୁ ଯିବାବେଳେ ଶ୍ରଦ୍ଧାଳୁମାନେ ଏହି ପୁଷ୍କରିଣୀରେ ହାତ, ଗୋଡ଼ ଧୋଇଥାନ୍ତି। ଶ୍ରାବଣ ମାସରେ ବୋଲବମ୍ ଭକ୍ତ ଏଠାରେ ସ୍ନାନ କରିଥାନ୍ତି। ସେହିପରି ସରନ୍ତି ସୋମବାର ରାତିରେ ଶ୍ରଦ୍ଧାଳୁ ଗାଧୋଇବା ସହ ଠାକୁରଙ୍କ ବାସନକୁସନ ସଫା କରାଯାଏ। ଦୀର୍ଘଦିନ ହେବ ଏହାର ଉତ୍ତରପାର୍ଶ୍ୱ ପାଚେରି ଦୁର୍ବଳ ରହିଥିଲା। ୨୦୧୭ ଅକ୍ଟୋବର ୨୦ ତାରିଖରେ ଲଗାଣ ବର୍ଷାରେ ଉତ୍ତର ପାର୍ଶ୍ୱରେ ପ୍ରାୟ ୧୦୦ ଫୁଟ ପାଚେରି ଭୁଶୁଡି ପଡ଼ିଥିଲା। ଆଉ ସାଢେ ୩ ମାସ ପରେ ଏହି ପାଚେରି ଭୁଶୁଡ଼ିିବାକୁ ୩ବର୍ଷ ପୂରିବ। ତେବେ ଏ ଯାଏ ପାଚେରି ମରାମତି କରାଯାଇ ନାହିଁ। ଏଥିଯୋଗୁ ଅଳିଆ ଆବର୍ଜନା ଉଡ଼ିି ପାର୍ବତୀ ସାଗରରେ ପଡୁଛି। ପାର୍ବତୀ ସାଗର ପାଚେରି ମରାମତି ସମ୍ପର୍କରେ ଲୋକନାଥ ମନ୍ଦିରର ମ୍ୟାନେଜର ଅପଚ୍ଛ ପରିଡ଼ାଙ୍କୁ ପଚାରିବାରେ କହିଛନ୍ତି, ପୁରୀ ସହରର ଖାଲୁଆ ଅଞ୍ଚଳରେ ଶ୍ରୀଲୋକନାଥ ମନ୍ଦିର ଏବଂ ପାର୍ବତୀ ସାଗର ରହିଛି। ଏହି ପୋଖରୀର ତିନିପାର୍ଶ୍ୱରେ ପ୍ରବଳ ବାଲି ଅଛି। ବାଲିର ଚାପ ସର୍ବଦା ପାଚେରି ଉପରେ ରହୁଛି। ବର୍ଷା ହେଲେ ବାଲି ବୋହି ଏହି ଚାପ ଅଧିକ ମାତ୍ରାରେ ପଡ଼ିଥାଏ। ଲଗାଣ ବର୍ଷା ଯୋଗୁ ଉତ୍ତର ପାର୍ଶ୍ୱରେ ପ୍ରାୟ ୧୦୦ ଫୁଟ ପାଚେରି ଭୁଶୁଡ଼ିି ପଡ଼ିଥିଲା। ଏହାର ମରାମତି ପାଇଁ ମାପଚୁପ ସହ ଏଷ୍ଟିମେଟ ମଧ୍ୟ କରାଯାଇଛି। ବର୍ଷା ଦିନ ପରେ କାମ ଆରମ୍ଭ କରାଯିବ।