ଭୁବନେଶ୍ୱର,୨୦।୪(ବ୍ୟୁରୋ): କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ଚନ୍ଦକା ଅଞ୍ଚଳରୁ ୮ ଚୋରା ବନ୍ଧୁକ ଜବତ ସହ ୨ ବେପାରୀଙ୍କୁ ଗିରଫ କରିବା ମାମଲାରେ ଭୁବନେଶ୍ୱର ତୃତୀୟ ଅତିରିକ୍ତ ଜିଲା ଓ ଦୌରା ଜଜ୍ ବୁଧବାର ରାୟ ପ୍ରକାଶ କରିଛନ୍ତି। ଦୋଷୀ ସାବ୍ୟସ୍ତ ହୋଇଥିବା ଖୋର୍ଦ୍ଧା ସଦର ଥାନା ଅଞ୍ଚଳର ରାକେଶ କୁମାର ଜେନା (୩୪) ଓ ବିକାଶ ବେହେରା (୨୯)ଙ୍କୁ ଅଢ଼େଇ ବର୍ଷ ଜେଲଦଣ୍ଡ ହୋଇଛି। ଏଥିସହ ଅଭିଯୁକ୍ତଦ୍ୱୟଙ୍କୁ ୧୦ ହଜାର ଲେଖାଏ ଅର୍ଥଦଣ୍ଡରେ ମଧ୍ୟ ଦଣ୍ଡିତ କରାଯାଇଛି। ଜରିମାନା ଅନାଦାୟ ଅଧିକ ୨ ମାସ ଜେଲ ଭୋଗିବାକୁ ବିଚାରପତି ସସ୍ମିତା ପାଢ଼ୀ ତାଙ୍କ ରାୟରେ ଉଲ୍ଲେଖ କରିଛନ୍ତି।
ମାମଲାର ବିବରଣୀ ଅନୁଯାୟୀ, ୨୦୨୦ ଅକ୍ଟୋବର ୧୫ ସନ୍ଧ୍ୟାରେ ଚନ୍ଦକା ଦାଶପୁର ବ୍ରିଜ ନିକଟରେ ବନ୍ଧୁକ କାରବାର ହେଉଥିବା ଖବର ପାଇ ଏସ୍ଟିଏଫ୍ ଟିମ୍ ଚଢ଼ାଉ କରିଥିଲା। ଏକ ବାଇକରେ ବ୍ୟାଗ ଯୋଗେ ବନ୍ଧୁକ ଆଣି ଚାଲାଣ କରିବାକୁ ରାକେଶ, ବିକାଶ ଓ ସହଯୋଗୀ ନିଲୁ ବେହେରା ଠିଆ ହୋଇଥିବାବେଳେ ଏସ୍ଟିଏଫ୍ ଟିମ୍ ଚଢ଼ାଉ କରିଥିଲା। ହେଲେ ଅନ୍ଧାରର ସୁଯୋଗ ନେଇ ନିଲୁ ସେଠାରୁ ଖସି ପଳାଇଥିଲେ। ଏସ୍ଟିଏଫ୍ ଟିମ୍ ରାକେଶ, ବିକାଶଙ୍କୁ ଗିରଫ କରିବା ପରେ ସେମାନେ ଧରିଥିବା ବ୍ୟାଗ୍ରୁ ୮ଟି ବନ୍ଧୁକ ଓ ୧୨ଟି ଅଫୁଟା ଗୁଳି ଜବତ କରିଥିଲା। ଏନେଇ ଏସ୍ଟିଏଫ୍ ଏକ ମାମଲା (ନଂ.୨୫/୨୦୨୦) ରୁଜୁ କରି ଅଭିଯୁକ୍ତଦ୍ୱୟଙ୍କୁ କୋର୍ଟଚାଲାଣ କରିବା ପରେ ଉଭୟଙ୍କୁ ଜେଲ ପଠାଯାଇଥିଲା। ୨୦୨୧ ଜାନୁୟାରୀ ୧୫ରେ ଏହି ମାମାଲାରେ କୋର୍ଟରେ ଏସ୍ଟିଏଫ୍ ଚାର୍ଜଶିଟ ଦାଖଲ କରିବା ପରେ ଶୁଣାଣି ଆରମ୍ଭ ହୋଇଥିଲା। ୬ ଜଣଙ୍କ ସାକ୍ଷ୍ୟ ଓ ଅନ୍ୟ ଦସ୍ତାବିଜ ଆଧାରରେ କୋର୍ଟ ରାୟ ଶୁଣାଇଥିଲେ। ସରକାରଙ୍କ ପକ୍ଷରୁ ସ୍ବତନ୍ତ୍ର ସରକାରୀ ଓକିଲ ରଶ୍ମୀରଞ୍ଜନ ବ୍ରହ୍ମା ମାମଲା ପରିଚାଳନା କରୁଥିଲେ।