ଭୁବନେଶ୍ୱର,୧୯।୨(ବ୍ୟୁରୋ): ପୋଲିସ ପରିଚୟ ଦେଇ ମିଛ ମାମଲାରେ ଫସାଇବାକୁ ଧମକାଇ ଲୋକଙ୍କଠାରୁ ଟଙ୍କା ଆଦାୟ କରୁଥିବା ୨ଜଣଙ୍କୁ ଲିଙ୍ଗରାଜ ଥାନା ପୋଲିସ ଓ ସ୍ପେଶାଲ ସ୍କ୍ବାଡ୍ ଶୁକ୍ରବାର ଗିରଫ କରିଛି। ସେମାନେ ହେଲେ ଶହୀଦନଗର ଥାନାଞ୍ଚଳରେ ରହୁଥିବା ଅବସରପ୍ରାପ୍ତ ପୋଲିସ ଏଏସ୍ଆଇ ଜ୍ଞାନରଞ୍ଜନ ମହାନ୍ତି (୬୦) ଓ ନୟାପଲ୍ଲୀର କାହ୍ନୁଚରଣ ସାହୁ(୫୮)। ପୋଲିସ ଆଇପିସି ଦଫା ୩୯୪ ଓ ୯୪ରେ ମାମଲା (ନଂ. ୪୦/୨୦୨୨) ରୁଜୁ କରି ସେମାନଙ୍କୁ କୋର୍ଟ ଚାଲାଣ କରିଛି।
ସୂଚନା ଅନୁଯାୟୀ, ଅଭିଯୁକ୍ତ ଜ୍ଞାନରଞ୍ଜନ ରାଜ୍ୟ ପୋଲିସର କମ୍ୟୁନେଶନ ବିଭାଗରୁ ଏଏସ୍ଆଇ ଭାବେ ନିକଟରେ ଅବସର ଗ୍ରହଣ କରିଛନ୍ତି। ସେ ସହଯୋଗୀ କାହ୍ନୁଚରଣଙ୍କ ସହ ଶହୀଦନଗର ଓ ସତ୍ସଙ୍ଗବିହାର ଅଞ୍ଚଳରେ ବୁଲାବୁଲି କରନ୍ତି। ଲୋକଙ୍କ କାର୍ଯ୍ୟକଳାପକୁ ଲକ୍ଷ୍ୟ କରିବା ସହ ସୁଯୋଗ ଦେଖି ଏକୁଟିଆ ଦେଖି ବାଇକରେ ପିଛା କରନ୍ତି। ସେମାନଙ୍କୁ ଅଟକାଇବା ପରେ ନିଜକୁ ପୋଲିସ ବା ସ୍ପେଶାଲ ସ୍କ୍ବାଡ୍ କର୍ମଚାରୀ ଭାବେ ପରିଚୟ ଦେଇ ଭୟଭୀତ କରନ୍ତି। କେତେକ କ୍ଷେତ୍ରରେ ସେମାନଙ୍କୁ ଗିରଫ କରିବାକୁ ଧମକ ଦେଇ ଟଙ୍କାପଇସା ଲୁଟ୍ କରିଥାନ୍ତି। ନିକଟରେ ୨ ଅଭିଯୁକ୍ତ ନିଜକୁ ପୋଲିସ କର୍ମଚାରୀ କହି ମିଛ ମାମଲାରେ ଫସେଇ ଦେବାର ଧମକ ଦେଇ ଜଣେ ବ୍ୟକ୍ତିଙ୍କଠାରୁ ୮ ହଜାର ଟଙ୍କା ନେଇଯାଇଥିଲେ। ପୋଲିସ ଓ ସ୍ପେଶାଲ ସ୍କ୍ବାଡ୍ ମିଳିତ ତଦନ୍ତ କରି ଅଭିଯୁକ୍ତ ଓ ସେମାନଙ୍କ ଦ୍ୱାରା ବ୍ୟବହୃତ ଗାଡି ବିଷୟରେ ତଥ୍ୟ ହାସଲ କରିଥିଲା। ସେମାନଙ୍କୁ ଗିରଫ କରିବା ସହ ଅପରାଧରେ ବ୍ୟବହୃତ ଗାଡିକୁ ମଧ୍ୟ ଜବତ କରାଯାଇଛି। ପୋଲିସ ଘଟଣାରେ ଅଧିକ ତଦନ୍ତ ଚଳାଇଛି। ଅପରପକ୍ଷେ ଯଦି କୌଣସି ବ୍ୟକ୍ତି ଏହିପରି ଲୁଟ୍ର ଶିକାର ହୋଇଥାନ୍ତି, ତାହାହେଲେ ନିକଟ ଥାନା କିମ୍ବା କଣ୍ଟ୍ରୋଲ ରୁମ୍କୁ ଯୋଗାଯୋଗ କରି ତଥ୍ୟ ପ୍ରଦାନ କରିବା ପାଇଁ ଭୁବନେଶ୍ୱର ସହରାଞ୍ଚଳ ଜିଲା ପୋଲିସ ତରଫରୁ ନିବେଦନ କରାଯାଇଛି।