କଟକ ଅଫିସ,୩।୯: ରାଜ୍ୟ ଜିଏସ୍ଟି ଏନ୍ଫୋର୍ସମେଣ୍ଟ ୱିଙ୍ଗ ୧୮୧୯ କୋଟିର ଜାଲ ବିଲ୍ ର଼୍ୟାକେଟକୁ ଧରିଛି। ଏଥିସହ ସମ୍ପୃକ୍ତ ୨ଜଣ ମାଷ୍ଟରମାଇଣ୍ଡ୍ଙ୍କୁ ଗୁରୁବାର ଗିରଫ କରିଛି। ଚାର୍ଟାର୍ଡ ଆକାଉଣ୍ଟାଣ୍ଟ ଅମିତ କୁମାର ଅଗ୍ରୱାଲଙ୍କୁ ଝାରସୁଗୁଡାରୁ ଓ ସତୀନ୍ଦ୍ର କୁମାର ଯାଦବଙ୍କୁ ଭୁବନେଶ୍ୱରରୁ ଗିରଫ କରାଯାଇଛି। ଏହି ଜାଲ ବିଲ୍ ବଳରେ ସେମାନେ ୩୨୩ କୋଟିର ଇନ୍ପୁଟ ଟାକ୍ସ କ୍ରେଡିଟ(ଆଇଟିସି) ହାତେଇବା ସହ ମୋଟ ୫୮.୧୪ କୋଟି ଟଙ୍କାର ଜିଏସ୍ଟି ଠକେଇ କରିଛନ୍ତି। କଟକସ୍ଥିତ ବାଣିଜ୍ୟ କର ଭବନରେ ଆୟୋଜିତ ଖବରଦାତା ସମ୍ମିଳନୀରେ ସିଟି ଆଣ୍ଡ୍ ଜିଏସ୍ଟି କମିଶନର ସୁଶିଲ କୁମାର ଲୋହାନୀ ଏନେଇ ସୂଚନା ଦେଇଛନ୍ତି। ସମ୍ପୃକ୍ତ ୨ ଅଭିଯୁକ୍ତ ଅନ୍ୟମାନଙ୍କ ସହ ଦେଶର ବିଭିନ୍ନ ରାଜ୍ୟରେ ୧୩ଟି ଜାଲ୍ ବ୍ୟାବସାୟିକ ସଂସ୍ଥା ଖୋଲିଥିଲେ। ଏହା ମାଧ୍ୟମରେ ଜାଲ କ୍ରୟ ବିକ୍ରୟ ବିଲ୍ ପ୍ରସ୍ତୁତ କରି ଉକ୍ତ ଆଇଟିସି ହାତେଇଥିବାବେଳେ ତାହାକୁ ରାଜ୍ୟ ତଥା ରାଜ୍ୟ ବାହାରର ବ୍ୟବସାୟୀଙ୍କୁ ହସ୍ତାନ୍ତର କରି ରାଜ୍ୟ ସରକାରଙ୍କ ବିପୁଳ ରାଜସ୍ବ କ୍ଷତି କରିଛନ୍ତି। ଅଳ୍ପ ଦିନର ବ୍ୟବଧାନ ମଧ୍ୟରେ ସେମାନେ ଏହି ଜାଲ୍ କିଣା ବିଲ ଯୋଗାଡ କରିଥିବା ଜଣାପଡିଛି।
ଜାଲ୍ ବିଲ୍ ସମ୍ପର୍କରେ ସୂଚନା ମିଳିବା ପରେ ଜିଏସ୍ଟି ଏନ୍ଫୋର୍ସମେଣ୍ଟ ଓ୍ବିଙ୍ଗ୍ ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ଯାଞ୍ଚବେଳେ ଜାଲ୍ କାଗଜପତ୍ର ଓ କାରବାର ଧରାପଡିଥିଲା। ଅଭିଯୁକ୍ତମାନେ ଚାକିରି ଲୋଭ ଦେଖାଇ କୋଲକାତାରେ ରହୁଥିବା ଝୋଟକଳ ଶ୍ରମିକ, ଝାଡୁଦାର ଆଦି ଲୋକଙ୍କ ଫଟୋ ସହ ପରିଚୟ ପତ୍ର, ବ୍ୟାଙ୍କ ପାସବୁକ ଆଦି ହାସଲ କରିଥିଲେ। ସେଗୁଡିକୁ ବ୍ୟବହାର କରି ଜିଏସ୍ଟି ପଞ୍ଜୀକରଣ କରିବା ସହ ବିଭିନ୍ନ ବ୍ୟାଙ୍କରେ ଆକାଉଣ୍ଟ ଖୋଲି ଜାଲ୍ କମ୍ପାନୀ ପ୍ରସ୍ତୁତ କରିଥିଲେ। କୌଣସି ଦ୍ରବ୍ୟର କିଣାବିକା ବିନା ଜାଲ ବିଲ୍ ବ୍ୟବସାୟରେ ଲିପ୍ତ ରହିଥିଲେ। ୧୩ଟି ଜାଲ କମ୍ପାନୀ ମଧ୍ୟରୁ ୩ଟିର ପ୍ରୋପ୍ରାଇଟର ପଶ୍ଚିମବଙ୍ଗ ଡେଲହାଉସୀ ଝୋଟ କଳ ଶ୍ରମିକ ଓ ଝାଡୁଦାର ହୋଇଥିବା ଜିଏସ୍ଟି କମିଶନର ଲୋହାନୀ ସୂଚନା ଦେଇଛନ୍ତି। ଏପରିକି ଝାରସୁଗୁଡ଼ାର ଏକ ପଡ଼ିଆକୁ ମଧ୍ୟ କମ୍ପାନୀର ଠିକଣା ଭାବେ ଉଲ୍ଲେଖ କରାଯାଇଥିବା ସେ କହିଛନ୍ତି।