ପାଟଣା,୨୧ା୮(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଥାନା ପୋଲିସ ଗୁରୁବାର ଦୁଇ ବାଇକ ଚୋରଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଦ୍ୱୟ ହେଲେ ମୟୂରଭଞ୍ଜ ଜିଲା ଠାକୁରମୁଣ୍ଡା ଥାନା ଖୁଣ୍ଟାପଶି ଗ୍ରାମର ଶାନ୍ତି ଜ୍ୟୋତି ସିଂ(୨୮) ଓ ଭୀମ ମାଝ(୩୮)। ଏନେଇ ପାଟଣା ଥାନାରେ ଦୁଇଟି ପୃଥକ୍ ମାମଲା ୮୪ ଓ ୧୦୮/୨୦ରେ ରୁଜୁ ହୋଇଛି। ଏହି ଦୁଇ ବାଇକ ଚୋରଙ୍କ ମଧ୍ୟରୁ ଜଣଙ୍କୁ କରଞ୍ଜିଆ ଓ ଆଉ ଜଣକୁ ଠାକୁରମୁଣ୍ଡାରୁ ପୋଲିସ ଗିରଫ କରିବା ସହ ଏକ ଏଚ୍ଏଫ୍ ଡିଲକ୍ସ ଓ ଗୋଟେ ଟିଭିଏସ୍ ଆପାଚି ବାଇକକୁ ଜବତ କରିଛି।
ସୂଚନାଯୋଗ୍ୟ, ଗତ ଜୁଲାଇ ୨୪ ତାରିଖରେ ଧାନବେଣୀ ଗ୍ରାମର ଜଣେ ବ୍ୟକ୍ତିଙ୍କ ବାଇକକୁ ପାଟଣା ମୁଖ୍ୟାଳୟ ଦେଇ ଯାଇଥିବା ୨୨୦ ନମ୍ବର ଜାତୀୟ ରାଜପଥର ବାଇପାସ ନିକଟରୁ ଚୋରି କରି ଅଭିଯୁକ୍ତ ଦ୍ୱୟ କରଞ୍ଜିଆ ଅଭିମୁଖେ ନେଇଯାଉଥିବା ବେଳେ ଅନ୍ୟ ଯୁବକମାନେ ତାଙ୍କ ପିଛା କରି ଟେଣ୍ଡେରା ନିକଟରେ ଜଣକୁ କାବୁ କରି ପୋଲିସ ଜିମା ଦେଇଥିଲେ। ସେହିପରି ପୋଲିସ ଜୁନ୍ ୬ ତାରିଖରେ ଚୋରି ହୋଇଥିବା ପାଟଣା କରଞ୍ଜିଆ ରାସ୍ତାର ଗୋରାଣ୍ଡି ଯୋଡ଼ି ନିକଟରୁ ଆଉ ଏକ ବାଇକକୁ ମଧ୍ୟ ଜବତ କରିବାରେ ସଫଳ ହୋଇଛି।
