ଦିଗପହଣ୍ଡି,୨୮।୪(ଡି.ଏନ.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଅନ୍ତର୍ଗତ ଚଷାନିମଖଣ୍ଡି ପଞ୍ଚାୟତର ସଉରା ପାହାଡ ଗାଁ ନିକଟ ରାସ୍ତା ପାର୍ଶ୍ୱରେ ଗତ ଶନିବାର ପାଳଝାଡି ଗ୍ରାମର ୨ ବିଜେଡି ନେତା ସୁଦର୍ଶନ ସୁଆର ଓ ସୁଧୀର କାନ୍ତ ପାତ୍ରଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିଲା। ଏହି ଘଟଣାରେ ୬ ସନ୍ଦିଗ୍ଧ ପୋଲିସ କବ୍ଜାରେ ଅଛନ୍ତି। ତଦନ୍ତରେ ବ୍ୟାଘାତ ଆଶଙ୍କାରେ ସ୍ପଷ୍ଟ ସୂଚନା ଦେବାକୁ ମନା କରିଦେଇଛନ୍ତି ଚିକିଟି ଏସ୍ଡିପିଓ କୃଷ୍ଣ ଚନ୍ଦ୍ର ଭତ୍ରା। ସେମାନଙ୍କୁ ଏକ ଅଜଣା ସ୍ଥାନରେ ରଖାଯାଇ ମାରାଥନ ଜେରା କରାଯାଉଛି। ଶୀଘ୍ର ଘଟଣାର ପର୍ଦ୍ଦାଫାଶ କରାଯିବ ବୋଲି ସେ ପ୍ରକାଶ କରିଛନ୍ତି। ପୋଲିସର ୩ ସ୍ବତନ୍ତ୍ର ଟିମ୍ ଘଟଣାର ଛାନଭିନ୍ କରୁଛି। ସୁପାରି କିଲରଙ୍କ ସହାୟତାରେ ୨ ଜଣଙ୍କୁ ଅତି ନିର୍ଦ୍ଦୟ ଭାବେ ହତ୍ୟା କରାଯାଇଥିବା ନେଇ ସୂଚନା ମିଳିବା ପରେ ଅଧିକା କ୍ରିୟାଶୀଳ ହୋଇଛି ପୋଲିସ। ଟାର୍ଗେଟରେ ଥିଲେ ସୁଦର୍ଶନ। ସୁଦର୍ଶନଙ୍କୁ ଅଭିଯୁକ୍ତମାନେ ସଂଘବଦ୍ଧ ଭାବେ ଆକ୍ରମଣ କରିଥିଲେ। ହେଲେ ସୁଦର୍ଶନଙ୍କ ସାଙ୍ଗରେ ଥିବା ସୁଧୀର ନିଜ ଜୀବନ ବଞ୍ଚାଇବାକୁ ଦୌଡି ନଯାଇ ସେମାନଙ୍କ ମୁହଁରୁ ଘନିଷ୍ଠ ସାଙ୍ଗ ସୁଦର୍ଶନଙ୍କୁ ବଞ୍ଚାଇବା ପାଇଁ ଶେଷ ପର୍ଯ୍ୟନ୍ତ ଲଢ଼ିଥିଲେ। ହେଲେ ପାରି ନଥିଲେ। ଇଛା ନଥିଲେ ମଧ୍ୟ ଅଭିଯୁକ୍ତମାନେ ସୁଦର୍ଶନଙ୍କ ସହ ସୁଧୀରଙ୍କୁ ମାରିଥିବା ପୋଲିସ ତଦନ୍ତରୁ ସୂଚନା ମିଳିଛି। ହତ୍ୟାକାଣ୍ଡ ପରେ ଅଭିଯୁକ୍ତମାନେ ଏକ କାର ଯୋଗେ ଦିଗପହଣ୍ଡି ଦେଇ ଭୁବନେଶ୍ୱର ଭାୟା ବ୍ରହ୍ମପୁର ଦେଇ ଫେରାର ହେବାରେ ସଫଳ ହୋଇଥିଲେ। ପୋଲିସ ଉକ୍ତ କାର ନମ୍ବର ସଂଗ୍ରହ କରି ଅଭିଯୁକ୍ତମାନଙ୍କ ପାଖରେ ପହଞ୍ଚିଛି। ଟୋଲ ଗେଟମାନଙ୍କରୁ ସିସିଟିଭି ଫୁଟେଜ ଗୁଡ଼ିକୁ ପୋଲିସ ଯାଞ୍ଚ୍ କରି ସମସ୍ତ ତଥ୍ୟ ପ୍ରମାଣ ପାଇଥିବା ବେଳେ ଅଭିଯୁକ୍ତମାନେ ପୋଲିସ ନିକଟରେ ସମସ୍ତ ସତ ମାନିଥିବା ସୂଚନା ମିଳିଛି। ତେବେ ରାଜନୈତିକ ଆକ୍ରୋଶରୁ ଏହି ହତ୍ୟାକାଣ୍ଡ ଘଟିଥିବା ପୋଲିସକୁ ସ୍ପଷ୍ଟ ପ୍ରମାଣ ମିଳିଛି। ହତ୍ୟାକାରୀମାନଙ୍କୁ ଚିହ୍ନଟ କରାଯାଇଛି। ୨୦ରୁ ଊଦ୍ଧର୍ବ ବ୍ୟକ୍ତିଙ୍କୁ ଦିଗପହଣ୍ଡି ଥାନାକୁ ଡ଼କାଇ ପଚରାଉଚୁରା କରି ଛାଡ଼ି ଦିଆଯାଇଛି। ଅପରପକ୍ଷରେ ଗତ ପଞ୍ଚାୟତ ନିର୍ବାଚନରେ ସରପଞ୍ଚ ଭାବେ ନିର୍ବାଚନ ଲଢ଼ି ପରାଜିତ ହୋଇଥିବା ପ୍ରାର୍ଥୀନୀଙ୍କ ସ୍ବାମୀ ଓ ତାଙ୍କ ସହଯୋଗୀମାନେ ଏହି ହତ୍ୟାକାଣ୍ଡରେ ସମ୍ପୃକ୍ତ ଥିବା ମୃତକଙ୍କ ପରିବାର ପୋଲିସକୁ କହିଛନ୍ତି । ଅଭିଯୁକ୍ତମାନଙ୍କୁ ଶୀଘ୍ର ଗିରଫ କରାଯିବା ସହ ଏହି ଘଟଣାରେ ପୋଲିସର ଭୂମିକାକୁ ଭାଜପା ନେତା ଇଂ. ଉତ୍ତମ କୁମାର ପାଣିଗ୍ରାହୀ ତୀବ୍ର ନିନ୍ଦା କରିଛନ୍ତି। ବୁଧବାର ଦିଗପହଣ୍ଡି ଠାରେ ଆୟୋଜିତ ଖବରଦାତା ସମ୍ମିଳନୀର ସେ ଶାସକ ଦଳର ଗୋଷ୍ଠୀ କନ୍ଦଳରୁ ଏହି ପ୍ରାୟୋଜିତ ହତ୍ୟାକାଣ୍ଡ ଘଟିଥିବା ଅଭିଯୋଗ କରିଛନ୍ତି। ତେଣୁ ପୋଲିସ ପ୍ରକୃତ ତଥ୍ୟ ପ୍ରମାଣ ସଂଗ୍ରହ କରି ଏହି ମାମଲାର ପର୍ଦ୍ଦାଫାଶ କରିବାକୁ ସେ ଦାବି କରିଛନ୍ତି।