କଟକ ଅଫିସ,୧୮। ୯: ଦିନ ଦ୍ୱିପ୍ରହରରେ ଖୋଲା ବଜାରରେ ବେଧଡକ ଭାବେ ବିକ୍ରି ହେଉଛି ବ୍ରାଉନ୍ସୁଗାର। ଦୁଇ ଭାଇ ହିଁ ଏହି ବେଆଇନ ବେପାରର କର୍ଣ୍ଣଧାର। ଜଣେ ଭାଇ ବାଲେଶ୍ୱରର ଜଳେଶ୍ୱରରୁ ବ୍ରାଉନ୍ସୁଗାର ଆଣନ୍ତି। ପରେ ଦୁଇଜଣ ମିଶି କଟକରେ ଏହାକୁ ବିକ୍ରି କରନ୍ତି। ଏଭଳି ଘଟଣାରେ ଜଗତ୍ପୁର ପୋଲିସ ଅଭିଯୁକ୍ତ ଘୁଙ୍ଗା ଓରଫ କାର୍ତ୍ତିକ ଦାସଙ୍କୁ ଗିରଫ କରି କୋର୍ଟଚାଲାଣ କରିଛି। ତାଙ୍କ ନିକଟରୁ ୧୦.୩୦୦ ଗ୍ରାମ୍ ବ୍ରାଉନସୁଗାର ଜବତ ହୋଇଛି। ଏ ନେଇ ଥାନାରେ ଏକ ମାମଲା(ନଂ.୩୭୮/୨୦) ରୁଜୁ ହୋଇଛି। ଘୁଙ୍ଗାର ସାନଭାଇ ବୁଡୁ ଓରଫ ସନାତନ ଦାସ ବ୍ରାଉନ୍ସୁଗାର ଆଣନ୍ତି ବୋଲି ସେ ପୋଲିସ ନିକଟରେ ବୟାନ ଦେଇଛନ୍ତି।
ଜଗତ୍ପୁର ମାର୍କେଟ କମ୍ପ୍ଲେକ୍ସ ନିକଟରେ ବୁଧବାର ଅପରାହ୍ନ ପ୍ରାୟ ୧ଟାରେ ଘୁଙ୍ଗା ବ୍ରାଉନସୁଗାର ବିକ୍ରି କରୁଥିଲେ। ପୋଲିସ ଖବରପାଇ ସ୍ପେଶାଲ ସ୍କ୍ବାଡ୍ ଟିମ୍ର ସହାୟତାରେ ସେଠାରେ ଚଢାଉ କରି ଘୁଙ୍ଗାଙ୍କୁ ଗିରଫ କରିଥିଲା। ମାର୍କେଟ କମ୍ପ୍ଲେକ୍ସର ପଛ ପାର୍ଶ୍ୱରେ ସେ ଏହି କାରବାର ଚଳାଇ ଆସୁଥିଲେ। ଘୁଙ୍ଗା ପୋଲିସ ଆଗରେ ଦେଇଥିବା ବୟାନ ଅନୁଯାୟୀ, ଦୁଇ ଭାଇ କଟକକୁ ବ୍ରାଉନସୁଗାର ଯୋଗାଇ ଚାଲିଛନ୍ତି। ସନାତନଙ୍କର ଜଳେଶ୍ୱରର ବ୍ରାଉନ୍ସୁଗାର ମାଫିଆଙ୍କ ସହ ଯୋଗାଯୋଗ ରହିଛି। ସେ ପ୍ରତ୍ୟେକ ମାସରେ ଅର୍ଡର ଦେଇ କିମ୍ବା ନିଜେ ବାଲେଶ୍ୱର ଯାଇ ବ୍ରାଉନସୁଗାର ଆଣନ୍ତି। ସନାତନ ମଧୁପାଟଣା, କଲ୍ୟାଣୀନଗର, ନୂଆପଡ଼ା, ବାଦାମବାଡ଼ି ଆଦି ଅଞ୍ଚଳରେ ବ୍ରାଉନସୁଗାର କାରବାର କରୁଥିବାବେଳେ ଘୁଙ୍ଗା ଜଗତ୍ପୁର, ମହାନଦୀ ବିହାର ଆଦି ଅଞ୍ଚଳରେ ଏହାକୁ ବିକ୍ରି କରନ୍ତି। ମୋଟା ଅଙ୍କର ବ୍ରାଉନସୁଗାର କିଣିବା ପରେ ଏହାକୁ ଗ୍ରାମ୍ ପିଛା ବିକ୍ରି କରନ୍ତି। ଗୋଟିଏ ଗ୍ରାମକୁ ୪ଟି ପୁଡିଆ କରାଯାଏ। ପ୍ରତ୍ୟେକ ପୁଡିଆର ଦାମ୍ ୬୦୦ ଟଙ୍କାରେ ବିକ୍ରି ହୁଏ ବୋଲି ଘୁଙ୍ଗା ପୋଲିସ ନିକଟରେ କହିଛନ୍ତି। ସନାତନଙ୍କ ନାମରେ ଚାଉଳିଆଗଞ୍ଜ ଓ ଟାଙ୍ଗୀ ଥାନାରେ ଏକାଧିକ ମାମଲା ରହିଛି। ସେ ଜଣେ କୁଖ୍ୟାତ ଅପରାଧୀ ବୋଲି ପୋଲିସ ରେକର୍ଡରେ ଉଲ୍ଲେଖ ରହିଛି। ଏବେ ସେ ଫେରାର ଥିବାବେଳେ ସ୍ପେଶାଲ ସ୍କ୍ବାଡ୍ ଟିମ୍ ଖୋଜାଖୋଜି କରୁଛି ବୋଲି ଡିସିପି ପ୍ରତୀକ ସିଂ ସୂଚନା ଦେଇଛନ୍ତି।