ରାୟଗଡ଼ା,୧୧।୧୨(ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲାରେ ସରୁନି ଦାଦନ ଦୁଃଖ। କାଶୀପୁର ବ୍ଲକ ଟିକିରି ପଞ୍ଚାୟତ ମକାପଦର ଗ୍ରାମର ୨ ଭାଇ ରୋଜଗାର ଆଶାରେ ପଡ଼ୋଶୀ ଆନ୍ଧ୍ରପ୍ରଦେଶକୁ କାମ କରିବାକୁ ଯାଇଥିଲେ। ସେଠାରେ ଜ୍ୱରରେ ପୀଡ଼ିତ ହେବା ସହ ନିର୍ଯାତନା ମିଳିବାରୁ ବାଧ୍ୟହୋଇ ଶନିବାର ଲୁଚିକରି ନିଜ ଭିଟାମାଟିକୁ ଫେରୁଥିଲେ। ହେଲେ ୨ ଭାଇଙ୍କ ଅବସ୍ଥା ଗୁରୁତର ହେବାରୁ ସେମାନେ ଘରକୁ ନ ଯାଇ ଗତ ଶନିବାର ରାତିରେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ସେହିଦିନ ରାତିରେ ସାନଭାଇ ନାବାଳକ ରଙ୍ଗାଧର ମାଝି(୧୭)ଙ୍କ ମୃତ୍ୟୁ ହୋଇଥିବାବେଳେ ରବିବାର ରାତିରେ ବଡ଼ଭାଇ ମହେଶ୍ୱର ମାଝି(୨୦)ଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି।
ଗତ ୪ମାସ ତଳେ ମକାପଦର ଗ୍ରାମର ୨ ଭାଇ ମହେଶ୍ୱର ଓ ତାଙ୍କ ଦାଦାପୁଅ ଭାଇ ନାବାଳକ ରଙ୍ଗାଧର ବିଶାଖାପାଟଣା ଜିଲା ପାଲମନପେଟାସ୍ଥିତ ଚିଙ୍ଗୁଡ଼ି ଫ୍ୟାକ୍ଟ୍ରିକୁ କାମ କରିବାକୁ ଯାଇଥିଲେ। ସେଠାରେ କାମ କରିବା ସମୟରେ ନଭେମ୍ବରରେ ୨ ଭାଇ ଜ୍ୱରରେ ପୀଡ଼ିତ ହୋଇଥିଲେ । ଫ୍ୟାକ୍ଟ୍ରି ମାଲିକ ୨ଭାଇଙ୍କୁ ଅସୁସ୍ଥ ଅବସ୍ଥାରେ କାମ କରାଇବା ସହ ନିର୍ଯାତନା ଦେଉଥିଲେ। ଏହା ଅସହ୍ୟ ହେବାରୁ ୨ ଭାଇ ବାଧ୍ୟହୋଇ ଗତ ଶନିବାର ଲୁଚି ବିଶାଖାପାଟଣା ଆସି ଟ୍ରେନ୍ ଯୋଗେ ରାୟଗଡ଼ାରେ ପହଞ୍ଚି ଥିଲେ। ସେମାନଙ୍କ ଅବସ୍ଥା ଗୁରୁତର ହେବାରୁ ଶନିବାର ରାତିରେ ସେମାନେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ଚିକିତ୍ସାଧୀନ ଅବସ୍ଥାରେ ଶନିବାର ରାତିରେ ରଙ୍ଗାଧରଙ୍କ ମୃତ୍ୟୁ ହୋଇଥିବାବେଳେ ଏହାର ୨୪ ଘଣ୍ଟା ନ ପୂରୁଣୁ ରବିବାର ରାତିରେ ବଡ଼ଭାଇ ମହେଶ୍ୱରଙ୍କ ମୃତ୍ୟୁ ଘଟିଛି।
