ଲକ୍ଷ୍ନୌ,୧୯ା୮: ବିଜ୍ଞାନ ଯେତେ ଆଗେଇଲେ ମଧ୍ୟ କିଛି ଲୋକ ଅନ୍ଧବିଶ୍ୱାସକୁ ଜାବୁଡ଼ି ଧରିଛନ୍ତି। ଏପରିକି ଏହି ଅନ୍ଧବିଶ୍ୱାସ ଯୋଗୁ ପ୍ରତିଦିନ ନାନା ଅଘଟଣ ଘଟୁଛି। ଏହିପରି ଏକ ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶରେ। ଅନ୍ଧବିଶ୍ୱାସ ହେତୁ ଦୁଇ ଭାଇ ଶିବଲିଙ୍ଗଙ୍କୁ ପାଇବା ପାଇଁ ଘର ଭିତରେ ଥିବା କୋଠରିରେ ତନ୍ତ୍ର ପୂଜା ଚଳାଇଥିଲେ। ଏହି ସମୟରେ ଜଣେ ଭାଇଙ୍କ ମୃତ୍ୟୁ ପରେ ଆଉ ଜଣେ ଭାଇ ନିଜ ଭାଇକୁ ବଞ୍ଚାଇବା ପାଇଁ ଅନେକ ଦିନ ଧରି ସେହି ଘର ତନ୍ତ୍ର ସାଧନା କରୁଥିଲେ।
ତେବେ ଏନେଇ ଗ୍ରାମବାସୀଙ୍କ ସନ୍ଦେହ ହୋଇଥିଲା। ପରେ ସେମାନେ ପୋଲିସକୁ ସୂଚନା ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଜଣଙ୍କୁ ଗିରଫ କରିଥିଲା।
ସୂଚନା ଅନୁଯାୟୀ, ଏହି ଘଟଣା ଲକ୍ଷ୍ନୌର ଇଟୁଞ୍ଜା ଥାନା ଅନ୍ତର୍ଗତ ଉସରନା ଗାଁରେ ଘଟିଛି। ବ୍ରିଜେଶ ରାଓ୍ବତ ସ୍ତ୍ରୀ ଏବଂ ପିଲାଙ୍କ ସହ ଏଠାରେ ରହୁଥିଲେ। ଭାଇ ଓ ମା’ ମଧ୍ୟ ତାଙ୍କ ସହିତ ଘରେ ରହୁଥିଲେ। ପରିବାର ବର୍ଗଙ୍କ କହିବା ଅନୁଯାୟୀ, ବ୍ରିଜେଶ ଏବଂ ତାଙ୍କ ଭାଇ ମୂଲଚାନ୍ଦ ଶିବଲିଙ୍ଗ ପାଇବା ପାଇଁ କୋଠରିରେ ତାଲା ପକାଇ ତନ୍ତ୍ର ବିଦ୍ୟା ଆରମ୍ଭ କରିଥିଲେ। ଏହା ପରେ ବ୍ରିଜେଶ ଉଲଗ୍ନ ହୋଇ କୋଠରିରେ ପୂଜାପାଠ କରିଥିଲେ। ଏହି ସମୟରେ କୌଣସି କାରଣ ବଶତଃ ତାଙ୍କର ମୃତ୍ୟୁ ଘଟିଥିଲା। ମୃତ୍ୟୁ ପରେ ଭାଇଙ୍କୁ ବଞ୍ଚାଇବା ପାଇଁ ତନ୍ତ୍ର ବିଦ୍ୟା ଆରମ୍ଭ କରିଥିଲେ ମୂଲଚାନ୍ଦ । ପରିବାର ସଦସ୍ୟଙ୍କୁ ମଧ୍ୟ ଧମକ ଦେଇଥିଲେ ଯେ, ଯଦି କେହି ତନ୍ତ୍ର ଶିକ୍ଷାକୁ ବାଧା ଦିଅନ୍ତି ତେବେ ଏହା ନଷ୍ଟ ହୋଇଯିବ। ଏହା ପରେ ସେ ନିଜ ଭାଇଙ୍କ ମୃତଦେହ ସହିତ ଏକ କୋଠରିରେ ତନ୍ତ୍ର ପୂଜା ଆରମ୍ଭ କରିଥିଲେ। ପଡ଼ୋଶୀମାନେ ମୃତ ବ୍ରିଜେଶଙ୍କ ବିଷୟରେ ପଚରାଉଚରା କରିବା ପରେ ଘଟଣା ଲୋକଲୋଚନକୁ ଆସିଥିଲା। କବାଟ ନ ଖୋଲିବାରୁ ଗ୍ରାମବାସୀ ପୋଲିସକୁ ସୂଚନା ଦେଇଥିଲେ॥
ଘଟଣାସ୍ଥଳରେ ପୋଲିସ ପହଞ୍ଚି ଦୀର୍ଘ ସମୟ ଧରି କବାଟ ବାଡ଼େଇଥିଲା। କିନ୍ତୁ କୌଣସି ଉତ୍ତର ମିଳି ନ ଥିଲା। ପରେ କବାଟ ଭାଙ୍ଗି ପୋଲିସ ଭିତରେ ଯାହା ଦେଖିଲା ଆଶ୍ଚର୍ଯ୍ୟ ହୋଇଗଲା। ବ୍ରିଜେଶଙ୍କ ମୃତଦେହ ଘର ଭିତରେ ପଡ଼ିଥିବା ବେଳେ ମୂଲଚାନ୍ଦ ଭାଇଙ୍କ ମୃତଦେହ ନିକଟରେ ବସି ତନ୍ତ୍ର ସାଧନା କରୁଥିଲେ। ଏହା ପରେ ପୋଲିସ ମୃତଦେହ ଜବତ କରିବା ସହ ମୂଲଚାନ୍ଦଙ୍କୁ ଗିରଫ କରିଛି।