ବୁଗୁଡ଼ା,୨୯ା୪(ଡି.ଏନ୍.ଏ.): ବୁଗୁଡ଼ାର ଦୁଇ ପୋଖତ ଗଞ୍ଜେଇ ବେପାରୀ ଭାଇ ବନମାଳୀ ପ୍ରଧାନ ଓ ଅରୁଣ ଗୁରୁବାର ମଧ୍ୟରାତିରେ ଏସ୍ଟିଏଫ୍ ପଞ୍ଝାରେ ପଡ଼ିଛନ୍ତି। ସେମାନଙ୍କଠାରୁ ୧୧୦୦ କି.ଗ୍ରା ଗଞ୍ଜେଇ, ୧ କି.ଗ୍ରା ଅଫିମ, ୬୮୨ ଗ୍ରାମ୍ ସୁନା ଓ ୧୨୦ ଗ୍ରାମ୍ର ରୁପା ଅଳଙ୍କାର, ୨ କାର୍ ସମେତ ଅଚଳାଚଳ ସମ୍ପତ୍ତିର ବହୁ ଗୁରୁତ୍ୱପୂର୍ଣ୍ଣ ନଥିପତ୍ରକୁ ଏସ୍ଟିଏଫ୍ ଟିମ୍ ଜବତ କରିଛି। ପ୍ରକାଶ ଯେ, ଗୁରୁବାର ରାତି ପ୍ରାୟ ସାଢ଼େ ୧୨ଟାରେ ବୁଗୁଡ଼ା ରଘୁନାଥ ସାହିସ୍ଥିତ ବନମାଳୀ ପ୍ରଧାନଙ୍କ ଘର ଉପରେ ଏସ୍ଟିଏଫ୍ ଟିମ୍ ଅଚାନକ ଚଢ଼ାଉ କରି ଦୁଇଭାଇଙ୍କୁ ଗିରଫ କରିଥିଲା। ଉକ୍ତ ଚଢ଼ାଉ ବେଳେ ସ୍ଥାନୀୟ ତହସିଲଦାର ସଂଗ୍ରାମ କେଶରୀ ଜେନା ଓ ଅତିରିକ୍ତ ଥାନାଧିକାରୀ ଶର୍ମିଷ୍ଠା ପ୍ରଧାନ ଉପସ୍ଥିତ ରହିଥିଲେ। ଭୁବନେଶ୍ୱରରୁ ଆସିଥିବା ୭ ଜଣିଆ ଏସ୍ଟିଏଫ୍ ଟିମ୍ ୩ ଘଣ୍ଟା କସରତ ପରେ ଜବତ ସାମଗ୍ରୀ ସହ ଦୁଇ ଗଞ୍ଜେଇ ବେପାରୀଙ୍କୁ ଉଠାଇ ନେଇଥିଲା। ଏହି ଘଟଣା ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଥିବା ବେଳେ ବୁଗୁଡ଼ା ଅଞ୍ଚଳର ଛୋଟ ବଡ଼ ଶତାଧିକ ଗଞ୍ଜେଇ ବେପାରୀଙ୍କ ଛାତିରେ ଛନକା ପଶିଥିବା ଜଣାଯାଇଛି। ଅନ୍ୟପକ୍ଷରେ ପୂର୍ବରୁ ବୁଗୁଡ଼ା ସହରର ବହୁ ଦୋକାନରେ ବିକ୍ରି ହେଉଥିବା ଗଞ୍ଜେଇ ସିଗାରେଟ୍ ଅଚାନକ ଗାଏବ୍ ହୋଇଯାଇଛି। ଦୀର୍ଘ ୩୦ ବର୍ଷରୁ ଊଦ୍ଧର୍ବ ସମୟ ଏହି ଗଞ୍ଜେଇ ବେପାର କରି ଅଞ୍ଚଳରେ କାୟା ବିସ୍ତାର ସହ ଅଚଳାଚଳ ସମ୍ପତ୍ତିର ଅଧିକାରୀ ହୋଇଥିବା ସାଧାରଣରେ ଆଲୋଚନା ଜୋର୍ ଧରିଛି। ଯଦି ଏସ୍ଟିଏଫ୍ ତଦନ୍ତ ପ୍ରକ୍ରିୟାକୁ କଡ଼ାକଡ଼ି କରିବ ତେବେ ଏହି ବେପାରର ଚେର କେଉଁ ପର୍ଯ୍ୟନ୍ତ ଲମ୍ବିଛି, ତାହାର ପର୍ଦ୍ଦାଫାଶ ହୋଇପାରିବ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।
