ହାଟଡିହୀ,୧୪ା୭(ଡି.ଏନ୍.ଏ.): ସରକାରୀ ଅର୍ଥ ଆତ୍ମସାତ ନେଇ କେନ୍ଦୁଝର ଜିଲା ହାଟଡିହୀ ତହସିଲର ଦୁଇ ଜଣ ପୂର୍ବତନ କର୍ମଚାରୀଙ୍କ ନାମରେ ତହସିଲଦାର ଦିଲ୍ଲୀପ କୁମାର ସାହୁ ପ୍ରଶାସନର ନିର୍ଦ୍ଦେଶ କ୍ରମେ ନନ୍ଦିପଦା ଥାନାରେ ଅଭିଯୋଗ କରିଥିଲେ। କେସ୍ ନଂ ୧୩୭/୨୦.୬.୨୨ ଅଟେ। ମାମଲା ରୁଜୁ କରି ପୋଲିସ ତଦନ୍ତ ଜାରି ରଖିଥିବା କହିଛି l ଅପରପକ୍ଷେ ସେହି ସମାନ ଘଟଣାକୁ ନେଇ ୩ ସପ୍ତାହ ପରେ ଭିଜିଲାନ୍ସ ପକ୍ଷରୁ ଆଉ ଏକ ମାମଲା ଦାୟର ହୋଇଛି। କେସ୍ ନଂ ୨୦/୧୧.୭.୨୦୨୨ ଅଟେ l ଭଦ୍ରକ ଭିଜିଲାନ୍ସ ୟୁନିଟର ଇନ୍ସପେକ୍ଟର ସୁଲୋଚନା ନାୟକ ବୁଧବାର ତହସିଲକୁ ଯାଇ ତଦନ୍ତ କରିଥିବା ଏବଂ କ୍ୟାଶ ବହି ଜବତ କରିଥିବା କହିଛନ୍ତି। ତାଙ୍କ କହିବା ଅନୁସାରେ ଜିତେନ୍ଦ୍ର ରାଉତ ରାୟ ନାମକ ଜଣେ ବ୍ୟକ୍ତିଙ୍କ ଠାରୁ ରୟାଲିଟି ଏବଂ ପେନାଲ୍ଟି ବାବଦରେ ୪୦ ହଜାର ଟଙ୍କା ଆଦାୟ କରାଯାଇଥିଲା। କିନ୍ତୁ ସରକାରୀ ରାଜକୋଷରେ ୪ ହଜାର ଟଙ୍କା ଜମା କରାଯାଇଥିଲା। ଏହାକୁ ନେଇ ଓଡ଼ିଶା ଲୋକାୟୁକ୍ତଙ୍କ ନିକଟରେ ମାନବାଧିକାର କର୍ମୀ ହିମାଂଶୁ ଶେଖର ନାୟକ ଅଭିଯୋଗ କରିଥିଲେ। ଲୋକାୟୁକ୍ତରେ ହୋଇଥିବା କେସ୍ ନଂ ୧୨୨/୨୨ ଅଟେ l ଲୋକାୟୁକ୍ତଙ୍କ ନିର୍ଦ୍ଦେଶ କ୍ରମେ ଭିଜିଲାନ୍ସ ବିଭାଗରେ ମାମଲା ରୁଜୁ ହୋଇଛି। ତେବେ ଗୋଟିଏ ଘଟଣାକୁ ନେଇ ଦୁଇଟି ପୃଥକ୍ ମାମଲା ରୁଜୁ ହେବା ଆଶ୍ଚର୍ଯ୍ୟଜନକ। ତେବେ ଅଭିଯୁକ୍ତଙ୍କୁ ପୋଲିସ ନା ଭିଜିଲାନ୍ସ କିଏ ଗିରଫ କରିବ ତାହା ବଡ଼ ପ୍ରଶ୍ନ ସାଜିଛି। ଯାହାକି ଅଭିଯୁକ୍ତଙ୍କୁ ସୁହାଇବ l ବରିଷ୍ଠ ଆଇନଜୀବୀ ହରେକୃଷ୍ଣ ପଟ୍ଟନାୟକ କହିଛନ୍ତି, ଗୋଟିଏ ଘଟଣାକୁ ନେଇ ଦୁଇଟି ମାମଲା ରୁଜୁ ହୋଇ ପୃଥକ୍ ବିଚାର ହୋଇପାରିବ ନାହିଁ। ଦୁଇଟି ଯାକ ମାମଲା ମିଶି ଗୋଟିଏ ହେବ ଏବଂ ବିଚାର ହେବ। ଅପରପକ୍ଷେ ଶ୍ରୀକାନ୍ତ ଜେନା ଏବଂ ଅଭିମନ୍ୟୁ ଭୂୟାଁ ଜାମିନ ପାଇଁ ମାନ୍ୟବର ଓଡ଼ିଶା ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଏବିଏଲଏପିଏଲ କେସ୍ ନଂ ୭୬୪୭/୨୨ ଏବଂ ୮୩୫୬/୨୨ ଅଟେ l ଅଭିଯୁକ୍ତ ଶ୍ରୀକାନ୍ତ ଏବଂ ଅଭିମନ୍ୟୁ କହିଛନ୍ତି, ଆମର କୌଣସି ଦୋଷ ନାହିଁ l ଆମକୁ ଫସାଇ ଦିଆଯାଇଛି।