ଚେନ୍ନାଇ,୭ା୨(ପି.ଟି.)-ନିଜ ଶହେତମ ଟେଷ୍ଟରେ ଦ୍ୱିଶତକ ହାସଲ କରିବାରେ ଇଂଲଣ୍ଡ ଅଧିନାୟକ ଜୋ ରୁଟ୍ ବିଶ୍ୱର ପ୍ରଥମ କ୍ରିକେଟର ହେବାର ଗୌରବ ଅର୍ଜନ କରିଛନ୍ତି। ଶନିବାର ଭାରତ ବିପକ୍ଷ ପ୍ରଥମ ଟେଷ୍ଟର ଦ୍ୱିତୀୟ ଦିବସରେ ରୁଟ୍ ଏହି ସଫଳତା ହାସଲ କରିଛନ୍ତି। ଏହି ୩୦ ବର୍ଷୀୟ କ୍ରିକେଟର ଦ୍ୱିତୀୟ ସେସନରେ ଲେଗ୍ସ୍ପିନର ରବିଚନ୍ଦ୍ରନ ଅଶ୍ୱିନଙ୍କ ବୋଲିଂରେ ଲଙ୍ଗ୍ଅନ୍କୁ ଏକ ଛକା ମାରି ତାଙ୍କ ଦ୍ୱିଶତକ ପୂରଣ କରିଥିଲେ। ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ତରଫରୁ ଇଂଲଣ୍ଡ ଅଧିନାୟକଙ୍କର ଉଚ୍ଚ ପ୍ରଶଂସା କରାଯାଇଛି। ପୂର୍ବରୁ ୧୦୦ତମ ଟେଷ୍ଟରେ ଶ୍ରେଷ୍ଠ ସ୍କୋର ରେକର୍ଡ ପାକିସ୍ତାନର ପୂର୍ବତନ ଅଧିନାୟକ ଇଞ୍ଜାମାମ୍ ଉଲ ହକ୍ଙ୍କ ନାମରେ ରହିଥିଲା। ସେ ୨୦୦୫ରେ ବେଙ୍ଗାଲୁରୁଠାରେ ଭାରତ ବିପକ୍ଷରେ ୧୮୫ ରନ କରିଥିଲେ। ରୁଟ୍ଙ୍କର ଏହାଥିଲା ୫ମ ଦ୍ୱିଶତକ। ସେ ୨୦୦୮ ରନ୍ କରି ଶାହାବାଜ ନଦିମଙ୍କ ବଲ୍ରେ ଏଲ୍ବିଡବ୍ଲ୍ୟୁ ହୋଇଯାଇଥିଲେ। ୫ଟି ଦ୍ୱିଶତକ ହାସଲ କରିଥିବା ଅନ୍ୟ ଖେଳାଳିମାନେ ହେଲେ ଇଂଲଣ୍ଡର ଆଲିଷ୍ଟର କୁକ୍, ଦକ୍ଷିଣ ଆଫ୍ରିକାର ଗ୍ରେମ୍ ସ୍ମିଥ୍ ଓ ଭାରତର ରାହୁଲ ଡ୍ରାଭିଡ। ଶୁକ୍ରବାର ରୁଟ୍ ୯ମ ଖେଳାଳି ହିସାବରେ ତାଙ୍କ ୧୦୦ତମ ଟେଷ୍ଟରେ ଶତକ ହାସଲ କରିଥିଲେ। ଏହା ଥିଲା ତାଙ୍କ କ୍ୟାରିୟରର ୨୦ତମ ଟେଷ୍ଟ ଶତକ।