ଭୁବନେଶ୍ୱର,୫।୬(ବ୍ୟୁରୋ): ବିହାରର ଉପେନ୍ଦ୍ର ରାମ । ୧୭ ବର୍ଷର ପୁଅ ରେତୁଲ ରାମଙ୍କ ଟ୍ରେନ ଦୁର୍ଘଟଣାରେ ପ୍ରାଣ ହରାଇଥିବା ପୋଲିସଠାରୁ ଖବର ପାଇଥିଲେ । ଏହାପରେ ବିହାର ରାଜ୍ୟରୁ ପ୍ରାୟ ୮୫୦ କିଲୋମିଟର (୫୨୦ ମାଇଲ) ଯାତ୍ରା କରିବା ପରେ ରବିବାର ଓଡିଶାରେ ପହଞ୍ଚି ଖୋଜିବା ଆରମ୍ଭ କରିଦେଇଥିଲେ । ଏକ ଭଡା କାରରେ ବାଲେଶ୍ୱରରୁ କଟକ ବିଭିନ୍ନ ହସ୍ପିଟାଲରେ ବୁଲିବୁଲି ଖୋଜିଥିଲେ ମଧ୍ୟ ପାଇନଥିଲେ । ଫଳରେ ପୁଅକୁ କେଉଁଠି ନପାଇବାରୁ ଏକପ୍ରକାର କ୍ଲାନ୍ତ ହୋଇଯାଇଥିଲେ । ଶେଷରେ ସୋମବାର ଭୁବନେଶ୍ୱର ଏମ୍ସରେ ପହଞ୍ଚି ମୃତ ପୁଅର ଫଟୋ ଧରି ଘଣ୍ଟା ଘଣ୍ଟା ବୁଲିବା ପରେ ମଧ୍ୟାହ୍ନରେ ଚିହ୍ନଟ କରିଥିଲେ । ପୁଅର ମୃତଦେହକୁ ଦେଖି ନିଜକୁ ଆଉ ସମ୍ଭାଳି ପାରିନଥିଲେ । ମୁଁ କେବଳ ଶବକୁ ନେଇ ଘରକୁ ଫେରିବାକୁ ଚାହୁଁଛି । ସେ ବହୁତ ଭଲ ପୁଅ ଥିଲେ । କିନ୍ତୁ ପରିବାରର ଆର୍ଥିକ ସମସ୍ୟା ଥିବାରୁ ସେ ନିଜ ଇଚ୍ଛାରେ ପାଠ ପଢା ଛାଡି ପରିବାର ପାଇଁ ଟଙ୍କା ରୋଜଗାର କରିବାକୁ ଚେନ୍ନାଇ ଯାଉଥିଲେ । କିନ୍ତୁ ବିଧାତା ଏତେ ନିଷ୍ଠୁର ଯେ ମୋ ପୁଅକୁ ଏତେ କମ ବୟସରେ ଛଡାଇନେଲା ବୋଲି କୋହଭରା କଣ୍ଠରେ ଉପନ୍ଦେର କହିଛନ୍ତି । ଏହାସହ ସେ ଆହୁରି ମଧ୍ୟ କହିଛନ୍ତି ଯେ ମୋ ପତ୍ନୀ ଏବଂ ଝିଅ ଘରେ କାନ୍ଦିବା ବନ୍ଦ କରିପାରୁନାହାନ୍ତି । ସେମାନେ ଶରୀରକୁ ଶୀଘ୍ର ଫେରାଇ ଆଣିବାକୁ କହୁଛନ୍ତି ବୋଲି ସେ କହିଥିଲେ ।