ବ୍ରହ୍ମପୁର ଅଫିସ,୨।୬: ସଦର ଥାନା ଅନ୍ତର୍ଗତ ବାଲିପଡାରେ ଗୁରୁବାର ରାତିରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ବୋଲେରୋ ଗାଡି ଧକ୍କାରେ ଦୁଇ ଜଣ ଯୁବକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଯୁବକ ଗୁରୁତର ଆହତ ହୋଇଛନ୍ତି। ପୋଲିସ ଏମକେସିଜି ମେଡିକାଲରେ ପହଞ୍ଚି ମୃତଦେହ ଜବତ କରିଛି। ମୃତକ ଥହେଲେ ପତିତପାବନ ଗ୍ରାମର ଅମୀୟ ଦାସ (୨୬) ଓ ତାଙ୍କର ସାଙ୍ଗ ବାଲିପଡା ଇନ୍ଦିରା ଆବାସର ସୁଶାନ୍ତ କୁମାର ନାୟକ(୨୫)। ସେହିପରି ଗୁରୁତର ଆହତ ହୋଇ ଏମକେସିଜିରେ ଚିକିତ୍ସିତ ହେଉଥିବା ଯୁବକ ଜଣଙ୍କ ବାଇଗଣବାଢି ଗ୍ରାମର ସଂଗ୍ରାମ ସାହୁ(୧୮) ବୋଲି ପୋଲିସଠାରୁ ସୂଚନା ମିଳିଛି। ସେହିପରି ମୃତ ଅମୀୟଙ୍କ ମାମୁ ରବୀନ୍ଦ୍ର ଦାସଙ୍କ ଅଭିଯୋଗ କ୍ରମେ ପୋଲିସ ଏ ସଂକ୍ରାନ୍ତରେ ୨୮୬/୨୩ ରେ ଏକ ମାମଲା ରୁଜୁ କରିଛି।